2018年5月9日星期三

Check-In Taipei:勢北可擋

近年台灣菜館越開越多,一不離二,二不離三,早前先去過兩家餐廳食台菜,是晚又喺台菜之夜,不過就有點唔同,同親友嚟到中環差館斜對面嘅「 Check-In Taipei 」,食到嘅既有傳統台菜,亦有新派加入多種元素嘅台灣美食。事隔兩年半多再訪,睇睇水準又如何。
雖然同樣叫做賣台灣菜,但絕對喺不一樣嘅台菜餐館,因為始終位處荷李活道、雲咸街一帶,加入酒吧元素,所以,近門口嘅霓虹招牌「我愛台妹」已成功吸引路人眼球,而店內環境摩登型格,一邊喺酒吧區,另一邊喺用餐區,氣氛輕鬆無拘束。
餐牌就喺一張好似枱墊嘅大餐卡(初時真喺以為枱墊,點完餐由侍應拎走先知唔喺),底面兩面,印有各類菜式,包括:涼拌小菜、台式蛋餅、鹽酥雞、夜市小食、青菜、鎮店滷味、鐵板酥皮蛋捲、魯肉飯、乾拌意麵及牛肉麵。
而另一張喺飲品餐單,既然「Check-In Taipei」有以酒吧定位,酒類飲品自然不少,如雞尾酒、清酒、啤酒、餐酒,唔飲得酒嘅可以揀台式特飲、牛乳、苦瓜汁或台式經典飲品。
近門口收銀處吊起有個細燈箱,寫住「苦瓜汁大王、綠豆沙牛乳專門店」字樣,所以,點都要試一試吓先。
bowl綠豆沙牛乳 $48
晌台灣啲夜市,最常見就喺啲乜乜乜牛乳,而小弟最鍾意喺木瓜牛乳,友人則揀咗店家推介嘅綠豆沙牛乳,綠豆沙煮得好綿又起沙,綠豆味好突出,混入鮮牛乳,奶味濃郁,友人更讚其口感綿滑。
bowl鮮芭樂苦瓜汁 $48
雖然小弟鍾意飲木瓜牛乳,但相反苦瓜汁就真喺好少飲,所以,貪得意先揀咗杯鮮芭樂苦瓜汁,芭樂即喺我哋慣叫嘅蕃石榴。色澤似甘蔗汁,但入口苦瓜味好出,帶點點甘味,然而,芭樂嘅味道就似有還無。
bowl梅子蕃茄 $38
我哋因為想慢慢食、慢慢傾,所以,先上啲冷盤及小食。梅子蕃茄率先登場,以梅子做嘅酸汁淋落新鮮嘅蕃茄上,蕃茄食落鮮甜多汁而有點點酸香,的確醒胃;啲洋蔥亦索晒啲梅子汁,故亦唔好錯過而唔食喔。
bowl窩夫鹽酥雞 $65
鹽酥雞喺台灣小食嘅名物之一,唔使多介紹喺乜嘢嚟,而呢道窩夫鹽酥雞就稍作升級,墊底加片迷你窩夫,再淋上由葡萄醋混入楓糖調成嘅醬汁,令酥脆嘅雞肉味道更具層次,亦有去膩之效;最驚喜喺鹽酥雞底下仲有啲菠蘿蓉,令酥香中多一份清甜,果然頗有心思。
bowl黑松露玉米蛋餅 $68
我仲記得第一次食蛋餅喺晌高雄,蛋餅更喺台灣人傳統早餐食品之一。而呢度做嘅蛋餅雖然比較厚身啲,但質感軟軟綿綿,內裡塞滿清甜嘅粟米粒,似喺搵牛油炒過,因為有陣陣牛油味;蛋餅面層唧滿自家製黑松露醬,其實一上枱已散發出好香嘅黑松露香氣,入口就更加明顯嚐到黑松露嘅幽香味。
bowl紫薯芝士乒乓 $75
對上一次嚟都有試呢道菜,好嘢自然就會仲保留晌度。因為做成球狀,所以叫乒乓,將麻糬加入紫薯蓉內搓成球,炸香之後外層香脆,內層煙糯,入口甚有蕃薯香;而整道菜灑滿巴馬臣芝士碎,仲一啲都無手軟,令芝士香氣更狂熱爆發,越食越過癮。
bowl主廚牛四寶湯麵 $98
食咗幾道小食,喺時間搵啲粉麵墊肚,飽肚嘢都有幾多選擇,原條慢煮嘅牛肋骨湯麵夠氣勢,當然想試啦,不過,份量睇落太多喇。次選喺主廚牛四寶湯麵,除咗喺店家推薦之外,更因為一碗麵有齊半筋半肉、牛坑腩及金錢肚,心多嘅人就梗喺揀佢啦。
咪睇少佢,分完兩碗仲有剩唔少麵晌湯碗內,可講得喺份量十足,其實,唔只啲麵條,餸料亦非常足秤,件件肉都大大嚿,絕無欺場。牛筋炆得超腍,牛坑腩鬆化肉味濃,金錢肚好爽口,而且,幾樣嘢都極之入味,帶濃郁滷水香,怪唔得食物中有一項鎮店滷水啦。個湯底亦真材實料,濃而不濁,啖啖精華,不過,喺啲麵條有些微偏腍嘅情況,我就喜歡咬口啲嘅。
bowl伯爵茶凍QQ芋圓 $58
甜品就只有一款,而且,仲喺好地道嘅款式添,由自家製嘅伯爵茶凍、台灣直送嘅芋圓及地瓜圓、檸檬愛玉、黑糖珍珠、綠豆,淋上花奶及煉奶組合而成,堆得豐富,兩個人共享就啱啱好。啲伯爵茶凍口感比較古怪啲,比果凍硬身啲,但嗰朕伯爵茶勁突出,芋圓及地瓜圓十分咬口,檸檬愛玉滑嘟嘟,黑糖珍珠就口感非常QQ,黑糖味香濃,食過再食都覺得好食。
今晚多道菜式都有心思及做得具水準,碗主廚牛四寶湯麵用料更見誠意十足。雖然環境有少少逼,但服務招呼周到,好似上湯麵時,幫我咃換過兩隻大啲嘅碗,到上甜品時,亦換上小碗,而且,按足指示上菜,唔會堆到一枱都喺嘢食。兩年半後再嚟過,水準無跌喎,今晚都只喺閒日都咁爆場,認真勢不可擋!

個人評分
味道:8/10
環境:7/10
服務:8/10
抵食:8/10
平均每人消費:HK$275

餐廳資料:
Check-In Taipei
中環荷李活道27號地下
2351 2622

沒有留言:

發佈留言