2018年4月20日星期五

Tea Hub:明茶.暗訪!

由於有親友住晌長沙灣,所以,久唔久都走過嚟呢一帶,呢區都算喺老區啦,區內舊唐樓極多。不過,隨着市區重建,附近幾幢嘅「喜」字頭嘅新樓以及蘇屋村陸續落成、入伙,連帶順寧道一帶都變化緊,較明顯喺多咗唔少餐廳進駐,避開青山道大街平租啲,客源亦相信會多起嚟。其中,較吸引人眼球喺主打以茶入饌嘅「Tea Hub 」,尤其一入夜,燈火通明鋪面晌幽靜嘅順寧道就更突出。
全店一室雪白,木地板再襯以淺木系枱櫈,加上高樓底,牆上及天花添上少少擺設,一派文青小清新嘅格局,從外面望入去已有一份簡約通透感,確讓人有份悠然慢活嘅感覺。
而門口,兩排對立嘅高腳枱櫈,喺輕鬆坐低飲杯嘢嘅打卡位,對出門外嘅街景,喺一幅幅活生生街坊嘅生活寫照。
再者,對面仲喺得幾層高嘅舊唐樓,經過嘅街坊又多數喺「老」友記,細看似喺時空霎時凝住嘅70年代場景。
餐廳喺採自助形式,先到收銀處落單,再由店員將食物送上。晌落單時,已番意到櫃枱位刻意設計成一間「小木屋」,貫徹店名嘅精神,煞有心思。
既然喺自助形式,餐巾、清水、調味料就得要自己動手攞,不過,嚟得依類小店,服務自助喺絕唔介意。況且,餐廳唔收加一服務費,就更應該自己動吓手腳啦。但基本上,如唔喺太多客人,店員都樂意幫你拎埋。
此外,作為一家茶品小店,茶葉嘅相關產品自然唔少得,如茶葉、茶餅、茶壺及茶杯……等等。
但不得不提,店家嘅營業時間喺超「刁鑽」,有心想嚟試,就先留意吓佢咩日子、鐘數開門,免得摸門釘。
餐牌第一版就喺主打嘅「茶食套餐」($78),相當划算嘅套餐,因為無註明時間,理解為全日都有供應。包前菜,而主食喺以茶入饌嘅茶漬飯、茶湯麵或茶湯冷麵,配以自選兩款餸料(4揀2),同樣跟茶有關,再奉送指定餐飲一杯,亦可選取其他,過額先要補錢而已。
除「茶食套餐」之外,另一款有賣嘅套餐就喺「蛋糕套餐」,一款精選蛋糕加一杯$35以下飲品,只賣$58,同樣無講明咩時間供應,相信全日都有供應。
此外,後面並有一版「輕食Light Meal」嘅餐單,有多款三文治包類及比利時窩夫提供,如想配一杯飲品,有減$8優惠,想食得輕怡啲都有得揀。
其後,就喺店家嘅亮點產品,各式各樣嘅花草茶、併配花茶、特色茶、不同地區嘅純茶茶飲。
bowl山渣洛神花茶(套餐)
點咗兩客茶食套餐,製作需時,故先嚟餐飲。老婆揀山渣洛神花茶,貪佢開胃健康,有咩效用就唔多講,上網一查就知,難得杯花茶無過酸嘅問題,飲一口已好醒神。
bowl有氣荔枝蝶豆花茶 +$6
天氣轉熱,我就揀杯凍凍哋嘅有氣荔枝蝶豆花茶,蝶豆花類嘅飲品非第一次,所以,對佢會變色嘅「特效」一啲都唔陌生。店定亦好好安排,將荔枝梳打跟蝶豆花分開上,先讓人飲一口蝶豆花茶喺咩味,其實味道唔重,只喺有少少草香味。
再將蝶豆花茶慢慢倒入荔枝梳打,花茶即時由藍變紫,非常夢幻吸晴,當然,入口主要都喺荔枝嘅清香味,絕對唔會怪怪哋。
bowl茶湯麵配茉莉花豆腐、烏龍茶雜菇
先嚟喺老婆嘅套餐,佢偏素,所以,餸料都好自然揀雜菇同豆腐,前菜則選上蔬菜沙律。
bowl蔬菜沙律
細細碗嘅沙律菜,簡單淋上油醋而已,肯定無咩特別,勝在食材新鮮,咬落「索索聲」。
bowl茶湯麵
既然叫得「茶湯」,就梗喺加入茶味元素,就喺烏龍茶,配以昆布、鰹魚去做,由於茶味淡淡,所以,都唔會覺得好古怪,而麵條幼細絲滑,口感好好。
bowl茉莉花豆腐、烏龍茶雜菇
雜菇計有冬菇、秀珍菇及、雞脾菇,簡單以烏龍茶葉清炒,不過,始終啲菇菌本身有一定嘅香味,所以,烏龍茶嘅味道唔會話好突出。而啲豆腐煎得皮脆金黃,入口卻喺十分嫩滑富豆香,茉莉花嘅香味較為清香淡雅,所以,整體感覺輕怡。
bowl茶漬飯配柚子煎茶雞翼、香茅薑茶脆魚塊
繼而喺上小弟嘅茶食套餐,既然主食嘅餸料共4款選擇,佢揀咗兩款素嘅,我就揀餘下兩款嘅魚脆及雞翼。
bowl冰鎮洛神花車厘茄
比起個蔬菜沙律,另一款前菜車厘茄就有啲賣點,去晒皮嘅車厘茄利用洛神花去增加一份酸香味,入口涼涼哋,好清爽。
bowl茶漬飯
茶湯以日系小茶壺盛載,再自行倒入飯內,感覺會更好玩,而飯粒分明,亦明顯煮得硬少少,撈埋茶湯一起食,小弟就覺得口感啱啱好,茶湯帶點鹹香,恰到好處。
bowl柚子煎茶雞翼、香茅薑茶脆魚塊
香茅薑茶作為茶飲都不足為奇,但用嚟炮製菜又頗有心思,為咗保持啲魚塊夠脆口,個香茅薑茶汁以小罌另上,盡見細節位。而魚塊唔單單粉漿薄,且脆口嫩滑,個汁仲帶少少橙香,喺嫌香茅味薄咗啲,但件魚塊入口喺完全無油膩感。而雞翼外觀煎得金黃焦香,咬落皮脆肉滑,而柚子味道非常突出,反而,煎茶味嘅效果唔明顯,要睇睇點改善令佢變得更有「茶」香,否則跟一般蜜糖雞翼無分別。
食完個茶食套餐,兩公婆仲有啲位,一於追加甜品,除蛋糕套餐,就只有散點,無加配蛋糕嘅優惠。而蛋糕款式就放晒晌餅櫃,是日就有豆腐芝麻芝士蛋糕、抹茶榛子朱古力蛋糕、蜜糖蘋果芝士蛋糕及百利咖啡酒芝士蛋糕,款款都賣$32,唔算貴,而且,更以膠蓋冚實,衛生又能保存新鮮度,減少乾化,小弟都算晌啲咖啡店食餅無數,見唔少店就咁放入凍櫃雪到乾晒。
除餅櫃嘅幾款蛋糕,原來仲有「自家製」戚風蛋糕,點解強調自家製,因為店員好老實咁講蛋糕喺托朋友做,而戚風蛋糕喺晌店內做,新鮮度自然無得輸。既然喺咁,就試試一款芝士餅及一客戚風蛋糕吧!
bowl豆腐芝麻芝士蛋糕 $32
雖然話喺托朋友做,但水準絕不失禮,可媲美酒店嘅級數。好欣賞佢消化餅底層做得夠薄,所以,入口十分鬆化;再上一層嘅豆腐芝士口感軟熟,有豆腐嘅香味,又帶少少芝士鹹香;頂層嘅芝麻慕絲口感幼滑且芝麻香氣十足,老婆激讚,所以,賣$32確喺抵食。不過,如果啲蛋糕能加入多啲「茶」嘅元素就更貼合餐廳嘅路線。
bowl抹茶戚風蛋糕 $55
賣到$55一客確喺唔平,過江龍「La Famille」嘅戚風蛋糕都喺賣四十零蚊左右,但食落都會覺得物有所值。是夜,剩番抹茶口味,個戚風蛋糕頗大個,裝飾完一輪先上碟,配上紅豆、抹茶威化薄脆,灑上抹茶粉及糖霜,所以,外觀份外靚仔。蛋糕嘅回彈力強,口感輕盈,茶味幽香,中心嘅忌廉打得超輕怡,質感柔滑,實在具水準。
食過兩件甜品後,就真喺滿足晒咁離開。離開時,其實都唔喺好夜,只喺八點左右,周邊嘅鋪頭都閂晒門,只剩下幾家食店,感覺好寧靜,更有份慢活嘅感覺!

個人評分
味道:8/10
環境:9/10
服務:8/10
抵食:8/10
平均每人消費:HK$125

餐廳資料:
Tea Hub
深水埗順寧道439號順寧居地下2號舖
2337 7278

沒有留言:

發佈留言