開飯主義 Hoi Fan Cafe：開飯主意

一年總會入嚟太和一次，因為同親友入嚟掃墓，以往就多數揀正午時間，今年就改為晏晝，所以，就先晌大埔搵個地方食晏，食完再跟親友匯合。大埔真喺唔多熟，所以，請教咗地膽嘅舊同事，佢推介呢間「 開飯主義 」，話定價親民，「熔岩系列」有特色，性價比高。

午市果然人氣旺，座無虛席，咁人氣就自然有信心啲。環境方面，有點港式西餐格局，算幾骨子，近門口有啲有梳化卡位，喺較舒適嘅選擇，內裡則以2人、4人枱為主。

翻一翻餐牌，印刷頗精美得意，因為加入少少美式漫畫風格。菜式上，種類繁多，店員講午市會比晚市選擇少啲。

煉奶油脆脆豬（跟焗意粉）

脆豬焗得香脆，包心軟綿，伴上奶油，簡單好食，只可惜得半個，同友人再「些牙」埋，真喺唔夠喉。

燒牛肉芝士黑椒焗意粉 $54

「溶岩系列」喺心水菜式，就揀咗一客焗意粉，凡喺焗製嘅菜式都需要等吓。以芥辣黃色嘅瓷盅盛載，寧舍醒目，拉起啲意粉，溶岩芝士嘅效果唔喺好強，但意粉個黑椒味好有辣勁，口感咬口，啲燒牛肉比預期嫩滑。

雞皇拼去骨烤蘆筍雞中翼 $58

另一客就揀「泰皇咖喱系列」，串去骨烤蘆筍雞中翼好好食，燒得甘香，不過，得兩小件就梗肯喺到喉唔到肺啦！至於兜咖喱雞皇，有好多嫩滑嘅雞件同薯仔，個咖喱汁底唔錯，撈飯食就當然喺最夾啦。

熱菊花蜂蜜（+$1）、熱奶茶

呢幾日天氣突然超乾燥，低見濕度35%，平常就梗揀咖啡喇，但今回想潤吓，要咗杯熱菊花蜂蜜，滋潤而有菊花香；另一杯喺奶茶，就唔及啲茶記好啦，但個茶底算香。

雖然只喺試咗兩款菜式，但確喺有水準，唔怪之得有咁多街坊支持嚟依度開飯，真正開飯好主意！

個人評分
味道：8/10
環境：7/10
服務：7/10
抵食：8/10
平均每人消費：HK$57

餐廳資料：
開飯主義 Hoi Fan Cafe
大埔大埔墟大明里9號寶華樓C座地舖
2638 5589