Casa Luca：九展食街

小弟家住西九，所以，相對地東九算少過嚟，而東九中，九龍灣雖然有德福、Megabox等大商場，但買嘢唔太啱我，反而，九展喺去得比較多嘅九龍灣地點。每逢初二、三，老婆教會就會晌嗰度搞新春佈道會，再者，九展不時又搞吓啲中型展覽、小型演唱會。是日嚟到九展，場內嘅食肆話多唔多，話少唔少，最方便喺上二樓嘅VeryFood食街，有多家食店，中西日越台韓……都有，夠集中方便搵食。

想嘆杯咖啡，所以，最後揀咗其中嘅Casa Luca，走咖啡店路線，卻又有好多食物選擇，相對比起同場嘅餐廳，佢哋嘅午餐唔貴，嘆個輕食，飲杯咖啡又一餐。

根據近年嚟九展嘅經驗，人流算比早期多好多，因為呢度都多咗好多商鋪、食店，仲加咗好多Outlets進駐，又有家居中心，故此，假日嚟食晏嘅人都比想象多。而餐廳嘅環境幾舒服，有點點優雅嘅咖啡店模樣；

事事後先知，原來鋪面左右兩大個區域都喺屬於佢哋，只喺枱櫈樣貌唔同，易被忽略。

餐廳採自助點餐（其實呢層嘅餐廳都喺咁營運），套餐就有3款自由配搭，有潛艇、主菜（I）、主菜（II）、沙律4大類別，定價$56、$68及$73，視乎你想食得幾豐富。就如小弟咁，揀招牌潛艇+配菜+沙律配熱飲，就喺$73，轉飲其他飲品則有半價優惠，飲品選擇又頗多。

此外，仲有多款每日精選，例如卡邦尼意粉、黑松露忌廉雜菌意粉、牛漢堡配薯條……等等，同樣配飲品一杯，售價為$58-$68，全部都喺即叫即做，需耐心等候。

餐後，一切嘅餐具、紙巾、糖包、飲管、額外調味料……等等，都放晒晌收銀旁，自由取用。

而收銀另一旁，就喺巨型食物櫥窗櫃，放好晒所有自由配搭食物嘅款式！

招牌潛艇類

用得上「招牌」二字，都應該喺主打推介，櫥櫃內顯示共有4款：煙三文魚潛艇、吞拿魚潛艇、蛋沙律潛艇、烤雞粒潛艇，部份更配上墨汁包或意大利拖鞋包添。

主菜（I）類

呢類就只有3款，不過，睇起嚟都好吸引咁，分別喺燒豬頸肉、烤魚柳及烤豬腩，晌熱燈照射下，更加份外金黃。

主菜（II）類

好多時啲人對配菜嘅感覺喺可有可無，其實，配菜做得好一樣好好食，焗雜菌、忌廉芝士焗西蘭花、炒蜜糖豆，唔知有無你心水呢！

沙律類

沙律共有4款選擇，都唔喺普普通通就咁俾啲沙律菜你，睇落都喺有心之作，包括泰式焗南瓜、凱撒沙律、羽衣甘藍及蜜桃雜菜沙律。

烤雞粒潛艇、焗雜菌、泰式焗南瓜 $73

以上就喺小弟嘅組合，再配杯咖啡，喺一餐輕盈得嚟又豐富嘅午餐。所有食物放晌紙盒，迎合環保潮流，再以木托盤盛載，餐具亦唔喺普通膠刀膠叉，足見餐廳都好注重外觀。

啲焗南瓜好清甜，加入少少香草焗，添半分清爽感；

而啲雜菌好好食，有幾樣菇菌，炒得好香，雞脾菇又寧捨爽口；

至於件潛艇，烤雞粒好惹味，並伴有蕃茄及沙律菜，驚喜位算喺採用意大利香草包Focaccia，既鬆軟，又有陣陣香草味。

此外，餐牌仲設有一個麵包櫃，同樣喺啲歐陸包，但稱為「軟歐包」，有頗多款口味，初時未知底蘊，睇落又唔便宜，事後上網八吓，原來喺近年新興較軟身嘅歐陸包，有別常見嘅「硬歐」，有機會開過嚟先再試。

今次食到餐好嘅，而晌「VeryFood食街」眼見都仲有好多選擇，所以，下次因事再嚟九展，都唔使擔心食得貴卻又唔好食，至少，肯定啲嘅有家Casa Luca啦。

個人評分
味道：9/10
環境：7/10
服務：7/10
抵食：7/10
平均每人消費：HK$73

餐廳資料：
Casa Luca
九龍灣展貿徑1號E-Max 國際展貿中心2樓34及34A號舖
no contact info