2018年3月16日星期五

Cafe Prince Royal:太子,我有我太度!

咖啡店向來都喺小弟喜歡到訪嘅餐廳類別,除咗可以嘆到啲靚咖啡之外,大多數嚟講,環境都夠別緻,讓人感到寧舍舒服,無拘束感。故此,約咗朋友趁快樂周五,輕鬆食餐飯,嘆嘆咖啡。
揀咗Cafe Prince Royal,純粹跟朋友都就腳,就晌太子地鐵附近,再者,之前睇過啲食評,餐廳內嘅環境好唔錯,裝修花咗唔少心思,天花嘅屋頂架、牆上嘅油畫、大量小盆栽、別緻嘅小掛燈……文青得嚟,又有點北歐風!
餐具已放晌枱上,但清水、餐碟、調味料則放晒晌收銀機旁嘅地櫃,自由取用。
順帶一提,啲餐碟每隻有唔同圖案,可以講喺得意可愛。
翻一翻餐廳,雖然食物選擇唔太多,但以咖啡店而言,算喺咁上下啦,有全日早餐、意大利麵、多士 / 牛角包及沙律。不過,晚市就不設套餐,全部都要散點。
就算有啲套餐,都只喺晌啲非繁忙嘅時間供應。
仲有另一頁餐廳牌,唔使多講,既然喺咖啡店,就梗喺賣咖啡啦,以及一啲花果茶、風味鮮奶、朱古力、梳打……等等。
至於甜品,有咩供應就晌晒個餅櫃裡面,是晚所見,就有3款蛋糕。本來都好有興致餐後嚐甜,不過,發生咗啲小插曲,成餐飯食得唔太開心,甜品都無試,食完就走人。
bowl經典大早餐 $98
揀啲全日早餐,純粹貪佢多嘢食,的確喺幾豐富嘅,一大碟有菠蘭腸、德國腸、芝士大蘑菇、煙肉、太陽蛋、沙律菜、茄汁豆、意大利香草包,睇得出用料都唔差,好似德國腸用上大條嘅豬肉腸,煙肉又唔會肥膏多過肉,睇落都吸引。味道整體都真喺唔錯,大蘑菇爽口多汁,香草包鬆軟富香草香,又夠晒份量。
bowl自家製南瓜汁肉丸意大利粉 $78
睇見「自家制」就投以其信心一票,雖然睇樣好似普通啲,但啲肉丸入口真喺好唔同,非雪藏貨可比,有肉香,口感鬆化,唔會雪到死實;意粉亦有點兒咬口,南瓜汁清甜,但個人就覺得稍杰,口應比較漿,有過黏嘅感覺。
bowl鮮奶咖啡 $34
講明嚟嘆咖啡,就梗喺點一杯至喜歡嘅鮮奶咖啡,天鵝拉花好細緻,無需加糖,入口口感已感到好平衡,咖啡嘅香味亦好順和,奶泡撞入咖啡嘅手勢好唔錯。唯一挑剔,咖啡嘅醇香度有點淡薄啫。
bowl英式蜜桃茶 $45
花果茶以深湖水綠茶壺盛上,更加上小巧木托盤,顯得精緻,而花果茶都喺以茶沖泡,見啲茶放晌櫃枱,可作零售,而茶嘅味道,友人話只喺不過不失,比預期淡口,亦欠果香。
成間店嘅硬件配套好好,環境、裝潢、杯碟都喺店主嘅心思;然而,軟件唔得,成晚所見,得一個員工,落單喺佢,煮菜泡咖啡喺佢,上菜收拾亦喺佢,相信洗碗都應該得佢,唔知喺咪咁,啲服務態度呢……!

個人評分
味道:8/10
環境:8/10
服務:3/10
抵食:7/10
平均每人消費:HK$130

餐廳資料:
Cafe Prince Royal
太子花園街232-242號禮賢大廈地下F舖
2762 7608

沒有留言:

發佈留言