理想餅店 Lily's Bakery：好友狂嚐曲（74）

理想喺乜？小弟只想起「遙遠」一詞，我呢啲穩陣派，無咩太多理想，硬要講嘅，希望就喺有生之年，走訪到半個地球。無啦啦講乜嘢理想，皆因有心嘅食友送小弟一包小店「理想餅店」出品嘅綠茶蝴蝶酥，睇見店名，就諗咗一諗。

包裝好簡單，一包有8片，片片均做得頗大件，塊塊大細一致，外形工整對稱，夾雜嘅綠茶粉，令蝴蝶酥外觀份外搶眼。

型態如心嘅綠茶蝴蝶酥，咬一口，綠茶味好搶、好突出，幽香而帶點甘味，細嚼牛油香慢慢滲出，兩者嘅味道都極之平衡，唔會被單一味道搶走；睇睇咬開嘅蝴蝶酥，層次清晰而細密嘅酥皮層就知有幾酥化，故口感喺酥脆到不得了，絕對喺一件做得好「理想」嘅蝴蝶酥。

雖然「理想餅店」喺家唔太出名嘅小餅店，但其蝴蝶酥真喺高水準，唔差得過一啲所謂知名專做蝴蝶酥嘅餅店。再次多謝好友，醒我一包咁高質嘅出品，讓小弟有頓美味嘅下午茶！

個人評分

味道：9 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
理想餅店 Lily's Bakery
新蒲崗康強街32-34號康強洋樓A座地下7號舖
2772 1328