丼瀛 J-City：丼務之急

好友見我早前食過幾家日本餐廳唔錯，又話想食吓日本菜，橫掂大家都好似耐無聚，所以，是夜嚟到新開無耐嘅「丼瀛」，一來喺朋友嘅新店，撐撐場，二來觀塘算喺大家工作地點嘅中間位，都事隔一段時間無嚟呢區區食嘢。

餐廳位處廠廈之內，果然喺新開無耐，門口仲擺咗啲祝賀花籃。踏進店內，地方頗大，裝修簡單，細心啲睇，應喺沿用上手嘅裝修，因為見到仲有啲聖誕嘅裝飾，只喺晌店內加點日系佈置增添番和風味。

初頭睇見店名，以為喺以做「丼」為主，翻一轉餐牌，包羅萬有，如沙律、佐酒小食、刺身、創作壽司、特色卷物、爐端燒、食事。

精選3點什錦刺身 218
老友喺刺身迷，就點一客精選什錦刺身，有分3、5、9點，當然越多就越貴啦，平平哋點一道3點嘅，有魴鮄、帶子、牡丹蝦，3款刺身都好高質，鮮甜味十足，魴鮄口感紮實清甜、帶子爽口彈牙、牡丹蝦肉質帶黏，兼且賣相靚仔，絕無馬虎。

海膽醬燒原隻帆立貝 $78 x 2

老友亦喺海膽粉絲，原隻嘅帆立貝夠晒睇頭，大大隻加上自家製嘅海膽醬嚟燒，啲海膽醬味道又幾特別，反起件帆立貝，真喺原隻架，啲肉幾鮮甜，有點爽口感。

油甘魚牛油果洋風海蟾沙律 $138

哈哈，果然喺超喜歡魚生及海膽嘅朋友，就連沙律都揀一道有以上兩者。洋風，主要喺以橄欖油作調味，墊上大量火箭菜，油甘魚鮮得嚟油份足，牛油果軟腍夠熟，不過，小弟就覺得配黑醋好啲，因為魚油加上橄欖油，口感稍稍油咗啲。

楊枝甘露卷 $88

店長推介呢一款創作卷物，究竟點樣「楊枝甘露」法呢？都頗好奇。原來，捲住三文魚，再晌面面放上芒果肉及淋上芒果汁，並添啲蟹籽做所成嘅卷物，賣相繽紛。可能啲飯比較黏腍，食落有點似泰式嘅芒果糯米飯，如果稱為「楊枝甘露」，不如以柚子肉代替三文魚試試喇。

牛舌 $38 x 2

牛舌喺小弟鍾意嘅爐端燒之一，友人都喺心水，所以，打孖兩串唔使爭。入口口感柔韌，又有一股獨特嘅羶香味，就咁鹽燒已好唔錯，當然俾多檸檬角唧點檸汁落好，牛羶香更出。

原條蒲燒鰻魚飯 $208

原本想點一客丼墊肚，但店長推介佢哋嘅原條蒲燒鰻魚，鰻魚我哋都啱，即管投佢一票試試。本以為一大碗咁上，點知採用較西式嘅賣相，一大條蒲燒鰻魚非常大燒，塗滿醬汁，十分惹味，而魚肉細滑，真喺唔錯；糖心蛋亦製作不賴，蛋黃香凝滑溜。

如果諗住嚟廠廈搵食可以慳住個荷包，但以同區而言，「丼瀛」嘅定價唔算得便宜，當然，視乎你揀咗食咩，然而，食得出舍得用較好嘅食材！當務之急，小弟就覺得先推出啲優惠吸客，得大家都認識，並慢慢做出啲名氣，之不過，要做到獨「丼」一面，小弟覺得還需要啲時間。

個人評分
味道：8/10
環境：7/10
服務：7/10
抵食：6/10
平均每人消費：HK$490

餐廳資料：
丼瀛 J-City
觀塘巧明街109號榮昌工業大廈5樓A室
3708 8705