2018年2月21日星期三

東海堂 Arome Bakery:好友狂嚐曲(75)

上次食友聚會,一連收到多份小禮物,其中兩份喺曲奇類, 除咗「理想餅店」出品嘅綠茶蝴蝶酥之外,另一份喺「東海堂」出品嘅沖繩黑糖曲奇,黑糖產品一向甚得小弟歡心。
個包裝袋面影到啲曲奇好似好細片,其實,每塊都唔細片,只喺細過塊麥維他消化餅少少,一包有8片,三兩吓手勢就食鬼晒。
查實小弟曾經食過呢款曲奇,就喺晌多年前收過友人所送嘅東海堂「和風曲奇禮盒」,其中一款就喺呢隻黑糖曲奇。不過,今次再食番,好似無咁好,雖然口感都好鬆脆,但主因喺黑糖味好淡、好輕,近乎食咗都唔覺嘅感覺,無咗份醇厚天然嘅甜味。
再睇吓啲成份,除加入多種化學劑,黑糖味嘅來源,喺左溝右溝嘅黑糖粉,味道肯定會差啲,甜味又無咁自然啲囉。
對東海堂嘅產品一向都幾好印象,但今次嘅沖繩黑糖曲奇,就令小弟對其好感有啲回落喇。

個人評分
味道:6 /10
環境:- /10
服務:- /10
抵食:- /10
平均每人消費:HK$0(好友送贈)

餐廳資料:
東海堂 Arome Bakery
大圍美田路16號富嘉花園地下G21號舖
2175 3755

沒有留言:

發佈留言