2018年1月5日星期五

薩莉亞意式餐廳 Saizeriya Italian Restaurant:點菜,唔使費薩思量!

嚟自日本嘅連鎖意式餐廳「薩莉亞意式餐廳」,晌小弟心目中,可以講喺打破平嘢無好嘢定律嘅一家餐廳。佢哋以平價、抵食作招徠,主菜廿零三十蚊就有交易,自助飲品吧收費$12位就可以任飲,所以,食乜?真喺唔使費煞思量,想點乜就乜,難怪經常人山人海。
一行3人,有我、老婆同佢姨甥仔,等咗無耐就有位,因為呢度流轉快。簡約嘅西餐廳格局,光猛,整潔,被安排4人卡位,更闊落舒服,簡單貼張相交特待餐廳環境嘅一角。
佢哋嘅餐牌大大本,印刷精美,全部都圖文並茂,且影得好靚。菜式選擇非常多,定價極有吸引力,唔收加一,但溫提一下只收玩金。
bowl中華海草 $9
海草翠綠清新,又喺有益健康之物,口感爽爽哋,灑上芝麻,作為前菜過吓口癮,確喺唔錯,況且,只賣$9,唔啱食都唔覺大損失嘛。
bowl羅勒墨魚仔 $17
晌美孚店都食過一次,$17俾到一大碟,唔可以唔講多次抵食。墨魚仔完整唔會碎濕濕,冰涼軟熟而有咬口,仲落咗好多羅勒醬,清爽不俗。
bowl黑椒雞肉薄餅 $35+雙重芝士 $6
依度啲份量相對比較細,所以點個薄餅質飽大家。批底厚度為所謂薄批與厚批之間,直徑9吋左右,有唔少雞肉晌面,但雙重芝士就無花假,堅多,食起嚟寧舍「芝」味。
bowl肉醬多莉亞 $27
喺店家嘅招牌菜式,其實,就喺肉醬白汁焗飯,一大層白汁之上放上大量肉醬,焗得香噴噴,將啲肉醬、白汁、飯底撈勻,得確香濃滋味,最緊要喺飯粒無煮爛,粒粒分明。
bowl甜蝦粗管麵 $29
粗管麵聽落幾得意,查實有啲似長通粉,但就喺更加大呎碼嘅長通,但口感真喺幾好喎,軟腍具嚼勁,掛滿白汁,比預期好食,而且,甜蝦亦鮮甜爽口,喺小弟今晚最欣賞嘅菜式。
bowl吞拿魚蕃茄辣汁意大利粉 $29
吞拿魚就當然喺講緊罐頭貨色啦,配合蕃茄蓉及辣汁,惹味而帶點刺激,意粉夠咬口,略嫌個汁底比較稀薄。
3個人,兩道冷盤、四道主菜,我同佢姨甥仔選埋任飲,埋單都喺$176,抵食絕對喺無講錯。雖然咁平,但都唔需要大開「薩」界搏命嗌,人均消費唔使60,已經食到飽一飽,用料方面,你唔會拉啲高級薄餅店嚟比呀嘛!

個人評分
味道:7/10
環境:7/10
服務:7/10
抵食:9/10
平均每人消費:HK$60

餐廳資料:
薩莉亞意式餐廳 Saizeriya Italian Restaurant
大角咀櫸樹街88號奧柏‧御峯201&202號舖.
2205 0318

沒有留言:

發佈留言