2018年1月2日星期二

水蜜桃冰室 Peach Garden:桃出新天地

茶記、冰室喺懷舊嘅代名詞,但最近到訪嘅「水蜜桃冰室」,絕對跟個名喺兩回事,既唔喺以水蜜桃為主打食材,又唔喺玩懷舊嘅冰室裝潢,但賣嘅產品又有點特色,小弟就覺得佢喺一家幾玩味嘅港式西餐廳。
位處喺「女人街」內,還好鋪面都算幾顯眼,唔難搵。踏入餐廳內,估唔到裝修幾有特色,幾有個性,一室帶少少工業風嘅水泥牆,昏黃嘅燈泡,不過,襯深啡色皮梳化,感覺有點笨重,但又真喺幾好坐喎。
而裝修最吸晴喺啲花花階磚,唔止鋪晌部分牆身,仲連所有枱面都鋪埋,令整體感覺沉實而多添一點繽紛及活力。
此外,牆上所掛嘅帆船模型、美國色彩甚濃嘅懷舊廣告板,都睇得出老闆確喺花咗唔少心思。
翻一轉餐牌,選擇幾港式西餐格,由鐵板燒、沙律、焗飯、意粉、小食……等等,較為特別喺有一系列雪葩,以及仲提供懷舊港式特飲,如黑牛、忌廉溝鮮奶。
店員就推介我哋試試一款「期間限定」嘅套餐,會定期轉款,喺韓式火山石燒靚牛肉,或可加錢轉日式壽喜鍋,依家更喺做緊「老闆瘋了」價,打個六五折,就算喺宣傳策略,睇個折實價都極之「MK」吓。
bowl蒜蓉包
受人歡迎嘅餐前麵包,其實,有啲心機搽勻蒜蓉牛油,焗香佢,上枱時熱辣辣應該喺最基本,但有時有啲餐廳貪快,連基本都做唔好。「水蜜桃」嘅蒜蓉包就合枱有餘喇,有蒜香,帶微暖,再添多少少香草就更佳啦!
bowl羅宋湯
喺港式西餐嘅標準「紅湯」,做的酸香開胃,味道濃郁,而且,非常足料。餐湯更可以加12蚊轉酥皮湯,不過,好彩無加,因為啲主菜份量十足呀!
bowl紫薯忌廉湯
「白湯」就唔喺常見嘅蘑菇忌廉湯,而喺紫得夢幻嘅紫薯忌廉湯,質感挺順滑,但味道就有點玄,紫薯嘅甜味中帶點減,個人感覺就未算好夾。
bowl鐵板燒紐西蘭羊扒 $118
佢哋啲鐵板餐都幾抵,都喺$88-$125,當晚目測,都見唔少客人點鐵板餐,因為不時聽到隔離枱傳出吱吱響聲。而小弟就揀咗客中價嘅羊扒,包晒餐湯及飲品。
佢哋嘅鐵板唔喺就咁淋上醬汁,而喺先因應唔同肉類淋上唔同嘅酒,可能喺白蘭地、冧酒……,再點火增加香氣及可觀性;
之後,再淋上蘑菇洋蔥汁,發出「咋咋聲」,香煙四溢。
一客足有三大件羊扒,件件又大又厚身,堆到成塊鐵板都喺。件扒嘅肉質比預期要軟腍,帶微羶,唔食開羊嘅人都應該OK,咁嘅價其實好抵食,要挑剔就喺筋多,切起嚟帶少少麻煩。配菜亦無手緊,有青瓜、車喱茄、西蘭花,大量脆炸薯條,成份餐真喺大堆頭。
bowl熊本一口牛 $148
有熊本牛供應,標明220g,只喺賣嚿半水,所以,心裡已打個底唔會抱住最頂級嘅期望。而整個套餐,仲包埋生菜包、珍珠飯、餐湯、熱飲,石板之上早已放上多款野菜,食完真喺唔飽有鬼咯。
既然話喺韓式石燒,睇得韓劇多嘅朋友就知佢哋不時會以生菜捲住啲燒肉嚟食,啲生菜仲會配埋蘿蔔蓉、蒜片、醬油讓客人自行調味。
至於啲熊本牛切成一粒粒,一口一件超方便,單睇碟牛,又喺份量無欺場,睇出充滿油花,但有解凍未足嘅感覺。放落石板,雖然石板下有火酒糕加熱,但整體石板嘅熱度應該唔夠強,「咋咋聲」唔喺好響,辣唔出焦香嘅效果,但啲肉本身質素喺不俗嘅,既腍滑又帶點油香。以生菜包住,加點蘿蔔蓉、蒜片,個人就覺得更好食。熱騰騰嘅珍珠米又香又軟糯,一啖飯,一啖牛,沾點醬油,亦叫人滿足。
bowl熱檸茶、熱特濃唂咕 +$5
今晚全部都喺肉,所以,就改改餐後嘆咖啡嘅習性,而飲熱檸茶,有助消滯去膩;友人就喜歡唂咕,因為比朱古力更香濃。
店家嘅甜點就獨沽一味只有雪葩「日本Lisse雪葩」,其實,食完鐵板燒、石燒,以雪葩降吓火都幾好嘅配搭。有食開鮮果肉雪葩嘅朋友都知,單價一向都唔平,依家跟餐仲要平啲,簡直喺心動價,搞到我哋都各點一客試試,而且,款式頗多,睇得我哋十五十六。
bowl蜜桃雪葩 $35(套餐價)
寫明喺原個嘅,送到嚟就梗喺成個啦。啲雪葩釀晒入蜜桃裡面,味道清爽,蜜味不俗。由於桃肉本身都可以連皮食,所以,我哋夾手夾腳將成個蜜桃雪葩處理掉,哈哈!
bowl芒果雪葩 $32(套餐價)
本來首選喺菠蘿口味,可惜是晚缺貨,不過,芒果我都好啱。芒果喺半個份量,睇到外皮上帶少少果肉,可惜比較難刮嚟食。而雪葩嘅芒果味非常突出,清甜冰涼,且甜味自然。
無論環境,抑或食物,都睇得出花過心思,同埋有誠意,難得無話開天殺價。雖然位處MK,服務唔會爛撻撻,店員都非常有禮,整體都比預期好呀!

個人評分
味道:7/10
環境:7/10
服務:8/10
抵食:9/10
平均每人消費:HK$170

餐廳資料:
水蜜桃冰室 Peach Garden
旺角通菜街2Q-2Z號鴻輝大廈地下2R號舖
2796 6128

沒有留言:

發佈留言