OK德海南雞專門店 Cafe OK：德心應手

早前有朋友見我啲食評講行山，好似幾正、幾好玩，都喺架，如果路線啱，真喺風景正，加上行得攰攰哋，之後食嘢就更滋味。所以，叫我搞番一轉輕鬆易行，故就一於「小夏威夷徑」啦，西貢行到入將軍澳，輕鬆又有靚景。結束點，就喺寶琳，所以，順理成章落新都城搵食，因為嗰度集中啲且選擇多。晌電子水牌上，票選咗「OK德海南雞專門店」，所謂票選，都喺得我哋幾個啫，揀佢都喺因為有老友想食海南雞，見佢自稱專門店，就投其信心（搏一搏）一票。

睇佢門面，似似哋茶記，但踏入店內，左邊喺咖啡店風格，擺放多張舒服嘅梳化椅，另一邊嘅裝修，就帶工業風，水泥牆、水喉通搭烏絲燈膽喺慣常嘅設定，整間店再配上柔和嘅燈光，予人悠悠之感。 

嚟到目標當然喺海南雞飯，而晌門口放咗個午餐餐牌，只有3款，款款賣$68，無加一，海南雞飯亦喺其中一款，咁就啱晒啦。單睇呢個餐牌，就個佢哋賣嘅菜式一拘一國，絕對喺茶記精神。

翻一轉主餐牌，拍拍照俾大家參考，主餐牌嘅海南雞飯同樣標$68，但午餐就多杯飲品。此外，仲有多款碟頭飯、越式粉麵、意大利麵、私房主菜、特色小食、蔬菜菜式、各款飲品。

餐牌最尾一頁喺下午茶套餐，我哋離享用時間仲差一大截，無緣慳番啲錢。

餐具、牙簽、糖包整齊擺放好晌枱上嘅藤籃，更加上一句：「為珍惜食水，如顧客需要清水，請向本店服務員聯絡」，我幾鍾意呢類清清楚楚嘅說明，環保啲之餘，又減少誤會而投訴人家嘅服務……等等。

招牌去骨海南雞飯 $68（午餐）

賣相都幾靚仔，隻碟明顯都喺為上個海南雞飯而設，因為啱啱好3個「格仔」放上甜醬油、辣醬及薑蓉，啲醬油夠杰身，幾對辦。雞肉嘅份量亦唔少，更有少少蕃茄、青瓜作為伴菜。

先試件雞肉，由於去晒骨，食起嚟非常方便，而且皮爽肉滑，皮下無乜脂肪，小弟就覺得幾唔錯喇，同枱老支同樣覺得好食；而雞油飯做得幾好，雖然好似斑蘭香氣欠奉，但爽身有點油香，個人就喜歡加入薑蓉嚟一齊食。

越式香茅豬扒飯 $68（午餐）

其中一位朋友點咗香茅豬扒，豬扒炸得夠金黃，並切成一件件方便食用。小弟就無試過，但朋友就覺得好食，一來咬落去香脆卻唔油膩，肉質鬆化有肉味，二來香茅味十足。

秘製潮式滷豬脾飯 $68（散點）

晌主餐牌中，呢個飯喺店方嘅推介之一，雖然喺散點菜式，但飲品都有半價優惠。賣相無話咩特別，但淋上濃濃嘅女醬汁，睇起嚟都吸引。同樣無親口試過，但友人讚啲豬脾炆得夠腍夠透，入口有種骨膠不3爆棚嘅感覺，至於啲醬汁確喺香濃惹味。

熱奶茶（餐飲）

人人都飲唔同嘅嘢，不過都喺咖啡、奶茶、凍檸水……，佢哋飲乜就唔多寫喇，小弟就揀咗奶茶，其實既然店家定位為咖啡店，好應該試佢啲咖啡得唔得，不過，落咗單就算。奶茶嘅味道唔差，未至於好絲滑，但茶底夠香。更鍾意喺佢隻茶杯，杯口印有「信、望、愛」，店主你喺基督徒嗎？

既然條小夏威夷徑咁好行，就順便同大家分享吓，尤其由西貢井欄樹入，將軍澳寶琳（將軍澳村）出，全程下行，一路落山，非常輕鬆。有幾處溪流、瀑布、石澗、大石崖……都喺打卡位。

西貢井欄樹往「小夏威夷徑」入口

 「小夏威夷徑」正式起步點

友人嘅四葉妹，樹林下思考人生！ 

瀑布

石澗

溪流

大石崖

將軍澳寶琳「小夏威夷徑」入口

雖然只喺食個晏，但我哋就磨足兩個鐘咁滯，其實，就唔喺行得攰，因為小夏威夷徑真喺頗易行，只喺大家又討論番2020我哋嘅極光之旅，查實都唔知成唔成事呢！

個人評分
味道：8/10
環境：8/10
服務：8/10
抵食：8/10
平均每人消費：HK$68

餐廳資料：
OK德海南雞專門店 Cafe OK
將軍澳貿業路8號新都城中心3期地下G08-09號舖
2311 8885