許留山 Hui Lau Shan：從善如留

天寒地凍，兩公婆拍拖到葵芳，一時興起，想食個熱辣辣嘅糖水潤吓，就走咗入地鐵旁嘅「許留山」，呢間由涼茶變身為芒果甜品專門店唔使多介紹。近年，佢哋都不時有啲新產品推出，正所謂從善如流，吸納人家嘅特點。

佢哋大多數啲鋪位都有少少蚊蠅鋪，又放咗好多位做堂食，所以，感覺喺有點逼。但點都唔及綠林、松記、B仔嗰啲，間直喺背貼背。

趁冬季，店家出咗Love Pink系列，加入草莓為標題元素，不過，一貫許留山招牌產品，當然一樣有供應。

椰皇燉奶配紫薯小米露 $49

原個椰皇裝起燉奶、紫薯粒、細粒西米嘅組合，而糖水底加埋椰青水，清潤又清甜。

撈一撈，有好多燉奶及紫薯粒，前者軟滑富奶香，後者粉香有薯味，最後，梗喺刮埋啲椰青肉食啦，刮乾淨嘅話有唔少椰青肉，睇我哋刮得幾清。

本來小弟都打算叫個暖粒粒嘅糖水，但見枱上印住凡堂食惠顧滿$15可以優惠價加配一款小食，有芒果糯米糍、忌廉芝士蘑菇釀雞翼、D24榴槤芝士千層酥及草莓布丁。「榴槤」，啱晒我啦，仲要夾千層酥！

D24榴槤芝士千層酥 $26

小弟點嘅千層酥焗製需時，送到嚟熱辣熨口，外皮香脆酥香，效果唔錯；內裡嘅榴槤饀跟芝士混為一體，入口香濃得嚟榴槤味依然突出，非常對胃口。

許留山好間唔時會幫襯吓，除芒果甜品，佢哋都偶有佳作，今次所品嚐嘅兩款甜品，均十分滿意。加上下午茶時段嚟，人唔太多，招呼都好少少呢！

個人評分
味道：8/10
環境：6/10
服務：7/10
抵食：8/10
平均每人消費：HK$38

餐廳資料：
許留山 Hui Lau Shan
葵芳葵義路2-10號葵芳花園地下16-37號舖
2413 4338