2017年12月17日星期日

The Captain's House:鮮睹為快

海鮮喺好多人都喜歡嘅食材,無論中外各國,做法都相當多,美國「新奧爾良」嘅食法你又試過未?以一道搖一搖「海鮮袋」( 熱船長海鮮拼盤)打響名堂嘅「The Captain's House」,就喺一家提供多種海鮮嘅餐廳。是日選擇晏晝嚟,就貪其人客無咁多,食得寫意輕鬆。
餐廳位處食廈「H8」18樓,由於餐廳佔全層,一面電梯大堂,一面就水吧、廚房,另兩面全部都喺大玻璃,故此,採光十足,佈置簡潔。因為時近聖誕,多咗唔少聖誕裝飾,平添氣氛。
睇開小弟嘅食評都知,盡可能都介紹啦餐牌有咩選擇。先講佢哋嘅「熱船長海鮮拼盤」,始終喺餐廳嘅主打!
玩法好簡單,價錢分3層:$398(自選3種海鮮)、$548(自選5種海鮮)、$798(自選8種海鮮),當然,價錢越高,種類多之餘,份量亦越大,再睇埋下面幅相你就明白。
基本可選嘅海鮮就喺有8種,包括小龍蝦、蝦、青口、八爪魚仔、蜆、扇貝、翡翠螺及長腳蟹腳,每一種已列明大概有幾多件及約重220-250 gm。此外,想豪啲更可額外加錢要活龍蝦或虎蝦,但市價計,比較難預算到。
最後,就喺揀醬汁,有檸檬牛油汁、卡彊蒜蓉汁、胡椒牛油汁同雜錦供選擇。醬汁有提鮮嘅功效,唔想太搶嘅,可選前者,想惹味啲嘅,就梗喺後兩者啦。
除熱食海鮮之外,無理由無凍食嘅,佢哋提供一款「凍海鮮拼盤」,賣$1,298,抵喎!因為足有11款海鮮(麵包蟹、青口、生蠔、八爪魚仔、虎蝦、紐西蘭藍鮑魚、小龍蝦、翡翠螺、扇貝、蜆及長腳蟹腳),而且份量好足,因列明重量有數得計,睇佢餐牌張相超吸引,如果三幾個老友嚟試就最適合不過。
嚟到船長「屋企」就唔喺齋得海鮮嘅,仲有好多嘢食,種類如海鮮前菜、在地前菜、炸海鮮小食、意大利麵及意大利飯、魚柳菜式、主菜、蔬菜類、特色濃湯及沙律,夾夾埋埋超過50款,唔使擔心無選擇。
正所謂飲飲食食,咁就介紹埋有咩飲品選項,食海鮮好多人都會配杯白酒,食肉嘅就配上紅酒,此外,啤酒、汽水、果汁、咖啡、紅茶佢哋一樣有,務求大人、細路、年長、後生嘅都各有所好。
背頁,更有多款特調雞尾酒,唔飲得酒精嘅朋友都不用愁,因為,亦有多款非酒精雞尾酒(Mocktails),更有一款喺熱飲添,啱晒冬天享用,朋友見咁得意,就點了一杯試試。
bowlHot Apple Cider $58
由蘋果汁、原片厚薑、原條玉桂沖泡而成,伴有蜜糖及檸檬,故可先試「原味」,再按喜好加入蜜糖及檸檬。味道喺點我就無試喇,但友人講話飲落感覺舒暢,而且,有份暖和感。
bowl路易斯安那特色蟹餅 $95
美國嘅路易斯安那州未去過,唔知有咩特色,但食完依然蟹餅,最深印象嘅特色喺蟹肉超多,差唔多成件餅都喺蟹肉搓成,真正啖啖蟹肉。而且,外層煎得甘脆不膩,蟹肉鮮甜,拌上一種辣蛋黃醬汁(remonlade sauce),微微辣,酸香惹味。
bowl特色鵝肝拼盤 $168
雖然喺鵝肝菜式,但賣相好有田園色彩,一道拼盤包含煎鵝肝、鵝肝慕絲配多士及鵝肝法式燉蛋,一次試到鵝肝嘅3款唔同食法。
bowl煎鵝肝
件鵝肝唔細件,但似乎薄身咗少少。煎得油潤豐腴,入口有即化嘅感覺,配上蘋果醬,又伴有玉桂蘋果粒,更去走油膩感,效果不俗。
bowl鵝肝慕絲配多士
將鵝肝做成慕絲,滑溜到不得了,口感絲滑細膩,配脆口多士同食,再唧咗少許紅桑莓醬,油香得以更平衡。
bowl鵝肝法式燉蛋
印象中,唔喺第一次食呢個配搭,但友人第一次試就驚喜度十足。面層嘅焦糖做得既薄且脆,而燉蛋幼滑,帶有鹹鹹哋嘅鵝肝味,確喺充滿趣味。
bowl熱船長海鮮拼盤(3款海鮮)$398
是日嘅主角隆重登場,大大袋海鮮先睹為快,睇落好似無乜嘢,店員俾我哋影完相,再大力搖兩搖,令蒸熟嘅海鮮跟卡彊蒜蓉汁徹底混合。當一打開袋,熱力四散,香氣四溢,非常誘人。我哋揀咗青口、翡翠螺及長腳蟹腳作為配搭,份量唔講得少,堆到一大盤。
正所謂工欲善其事,必先利其器,枱上已備有硬淨嘅鉸剪較、長叉、骨桶,以及印有餐廳招牌嘅膠圍裙,避免食海鮮時彈到一身都喺。仲有,如有需要,可要求索取膠手套,當然,搵手拎住食就更具風味。
bowl青口
雖然無標示青口來源地,但無論外觀,抑或肉質,都喺高質貨,咬落唔會韌到好似擦紙膠咁,軟腍有鮮味,沾滿卡彊蒜蓉汁,充滿蒜香而帶點辣勁,十分惹味。
bowl翡翠螺
呎碼都喺大隻靚貨,口感夠晒爽彈,就咁食都OK,何況沾滿醬汁。啲汁確喺好味,有興趣嘅不妨再點一客法包沾埋啲醬汁唔好嘥。
bowl長腳蟹腳
平時晌自助餐度食長蟹腳都有種偏鹹嘅情況,但今次由於沾咗醬汁就無咁嘅問題。而蟹肉入口仍保持到鮮甜味,果然用料不賴。
咪以為海鮮袋得海鮮怕食唔飽,內裡仲有啲飽肚嘢,包括香草豬肉腸、薯仔及粟米,有肉、有菜,薯仔更喺飽肚之最。而且,撈勻啲汁,味道一啲都唔會寡。
甜品有另一個黑板餐牌顯示,由於不時轉款,所以,店員話唔寫入主餐牌度,索性寫晌黑板仲方便。是日就有6款,定價$68-$78,份量足可以共享。
bowl南瓜批 $68
我哋議決揀南瓜批,因為,平時不常遇到,但最意外喺竟然可以揀榴槤雪糕,真喺估佢哋唔到。件南瓜批做得唔錯,批殼脆身且富牛油香,而南瓜蓉軟滑南瓜味突出,添加咗啲忌廉,口感更覺滑溜。至於球榴槤雪糕,堅重榴槤味,又夠軟滑,整道甜品嘅賣相仲花過啲心思添。
「船長」所做嘅菜式果然了得,咁食法又真喺幾特別,無論海鮮袋,還是個蟹餅,都喺「鮮」入為主,叫人食得滋味。再者,店員招呼醒目,天氣凍,特別倒啲熱水俾我哋,見骨桶差唔多滿,都主動更換。海鮮喺頗多香港人喜愛嘅食材,大家又多一個選擇。

個人評分
味道:9/10
環境:8/10
服務:8/10
抵食:8/10
平均每人消費:HK$290(優惠券)

餐廳資料:
The Captain's House
尖沙咀厚福街8號H8 18樓
2366 5600

沒有留言:

發佈留言