2017年12月18日星期一

S2 Teppanyaki:鐵板樂燒遙

晌過去嘅11月初,到訪過中環嘅「S2 Kitchen」,卒之一嚐其招牌海膽杯,順道賀一賀表姨甥女嘅新書。當時聽店員講,佢哋正籌備緊另一家分店,開晌佐敦,但就唔喺以居酒屋咁經營,而喺主打鐵板燒。鐵板燒對小弟嚟講,唔陌生,但又唔算認識深,不過,就鍾意坐晌鐵板燒枱面前,睇住師傅「表演」。
餐廳開晌佐敦一條細街中,兩邊都開有唔少食肆,但環境比較淨。門外掛上巨型燈籠,唔會過門不入留意唔到。走入鋪內,跟中環店有啲似,就喺細,整體地方唔大,一眼睇晒,目測大概廿零個位,圍住鐵板燒枱嘅座位喺最搶手。
雖然有點擠,但氣氛唔錯,柔和燈光,配以好多和式布幡,加上是夜近門口有枱大客,喺就喺嘈咗啲,但炒熱吓氣氛都唔錯。由於全場爆滿,成晚鐵板燒不停製作,抽風卻喺唔錯,而得師傅一人,佢卻喺有條不紊咁「嘭嘭聲」做菜,完全無出錯單,勁呀!
餐牌內以套餐為主,共有5款選擇,樂師傅海膽盛宴($1,380)、香蒜薄燒牛肉鐵板餐($450)、日本十勝豚肉($450)、A5熊本和牛($780)、龍蝦海鮮($780),全部喺一人份量嘅價錢,有9到10道菜,所以,非常夠飽。
另外,亦有鐵板燒嘅單品供散點,無論喺海鮮、肉類,抑或飯品、烏冬,再加埋爐端燒及佐酒小食(10時後先供應),數數埋埋合供足有50款食物,套餐唔啱,散點都大把嘢揀啦。
bowl柑橘茶
坐低先送上一杯柑橘茶,原粒柑橘浸晌茶中,柑橘嘅香味隨隨滲出,微酸而幽香,食住鐵板燒,確感覺到有解膩嘅功效,非常貼心。
靜心睇過餐牌後,最後我哋所試嘅套餐喺「香蒜薄燒牛肉鐵板餐」($450)及「龍蝦海鮮餐」( $780),基本上兩個餐嘅沙律、刺身、3道食事、甜品都相同,喺中間3道主菜嘅分別。師傅都好貼心,就算大家主菜唔同,都會刻意平均分俾我哋,變相讓我哋可以試勻6款主菜。
bowl沙律杯盛合
雖以雞尾酒杯盛載,但離不開日式西餐慣見嘅「田園沙律」,由沙律菜、甘筍絲、青瓜片、車厘茄、滑豆腐再拌入胡麻醬,簡單清爽,為今晚嘅鐵板盛宴作揭幕禮。
bowl三點刺身
食完道沙律,剛好送上刺身,有牡丹蝦、帆立貝及三文魚,外表均喺色澤亮麗,牡丹蝦鮮甜而肉質帶點黏;帆立貝則清爽彈牙;三文魚油潤富魚鮮味 ,心諳都喺好貨色。
bowl西京醬煎煮銀雪魚(香蒜薄燒牛肉鐵板餐)
因為嚟嚟去去都喺做上述5款套餐,所以,不時見到師傅一做就做幾客。鐵板上放咗幾個摺花錫紙盤就喺預備第一道主菜「銀雪魚」,一邊將盤內嘅甜麵豉醬燒香,另一邊晌鐵板上煎香啲銀雪魚,煎到帶焦香就完成。銀雪魚入口細嫩,富油香,沾到點點甜麵豉,令魚味更突出。
bowl香煎牛脷伴海膽他他汁(香蒜薄燒牛肉鐵板餐)
不知不覺間,師傅已經煎好件牛脷,坐晌佢前邊,都唔知喺幾時開始煎。牛脷切得厚薄適中,口感柔韌,帶獨帶羶香味,而海膽他他汁酸酸哋,襯牛脷,效果唔錯,頗有特色。
bowl美國薄燒牛肉(香蒜薄燒牛肉鐵板餐)
唔喺就咗薄燒一片牛肉,而喺先將蒜片煎香,再加入大量蔥花,放入輕煎過嘅牛肉片,捲起做成呢道牛肉卷。一個餐有3件,所以,我哋每人分到條半,而且,師傅細心咁軋開一半,變成一口一小件,方便食用。入口牛肉片半生熟咁充滿油香,嫩滑又富肉汁,蒜片、蔥花大大提升味道嘅層次,尤其蒜片,多添一份脆口感。
bowl鐵板醬汁焗原隻龍蝦(龍蝦海鮮餐)
講到最多「花臣」嘢就非依道龍蝦莫屬, 原隻龍蝦既要加清酒煎香,又倒入自家調嘅沙律醬及撒下大量芝士,最後又焗又燒,喺咪好有可觀性呢!因為龍蝦已斬成一件件,部份位置嘅殼亦破開,所以,食起嚟唔會好難搞,入口啖啖龍蝦肉,爽甜都不得了,伴了芝士,鹹香味鮮,正呀喂!
bowl鐵板焗岩蠔(龍蝦海鮮餐)
岩蠔嘅烹調比較簡單,都喺放上鐵板慢慢等佢燒,最後加入少許松露醬、蒜粒、蔥花。由於原隻燒,保留到海水嘅鮮味,肉質有點爽,蠔味足,唯蠔肉比較細,食落好似到喉唔到肺,哈哈!
bowl鐵板脆皮煎鰻魚(龍蝦海鮮餐)
是晚應該有唔少客點龍蝦海鮮餐,所以,見師傅一次過製作多客煎鰻魚。鰻魚食唔少,蒲燒嘅多,但今次嘅鐵板脆皮煎有驚喜喎,層面皮真哋脆到好似薯片咁,再咬落去肉質柔滑,配上香濃嘅鰻魚醬,滋味無窮。
bowlS2特色黑松露炒飯
炒飯雖然喺簡單嘢,但未必人人炒得好,睇師傅手起剷落,將飯粒、西芹粒、甘筍粒、煙肉,輕鬆兜勻炒香,最後加入黑松露醬,飯粒又炒得夠爽身,唔好食才怪,絕對喺手藝取勝。
bowlS2鐵板紙包龍蝦湯
本來個香蒜薄燒牛肉鐵板餐喺「S2鐵板時令紙包蜆湯」,但師傅話費事煩,兩個湯都做晒「S2鐵板紙包龍蝦湯」,真喺好人。個湯都幾特別,以特製疑似嘅玻璃紙袋住啲湯,可直接放晌鐵板度加熱,打開個袋,溢出滾燙嘅輕煙。湯底喺昆布湯,清香輕盈,內有蜆、龍蝦及其他配料,正正可突出番海鮮嘅鮮味。
bowl燒野菜
喺鐵板燒常備菜式,椰菜再加多數種蔬菜,甘筍絲及青椒喺常客,貪佢有點顏色,下點鹽及黑椒炒幾炒就成。
bowl雪糕泡芙
最尾嘅雪糕泡芙,雖然唔特別,但讓人食過有種「暑」氣全消嘅感覺。
bowl焦糖多士
初時以為食過雪米糍呢一餐就完結,師傅話仲有一道額外甜點「焦糖多士」,大量牛油將方包煎香,再灑沙糖做成焦脆效果。口感幾似西班牙油條,焦香甘脆,入口熱辣辣,得意好食。
今餐飯,有得睇又有得食,而且,食材有質素,師傅做菜有水準,輕輕鬆鬆咁邊食邊欣賞,真喺歡樂今「燒」。

個人評分
味道:9/10
環境:7/10
服務:8/10
抵食:8/10
平均每人消費:HK$600(扣減優惠券)

餐廳資料:
S2 Teppanyaki
佐敦偉晴街29-37號地下6號舖
2885 8955

沒有留言:

發佈留言