2017年11月28日星期二

施心畢老撾餐廳 Sisombath:一施不苟

從飲食雜誌睇到「Sisombath」嘅介紹,賣老撾菜,超冷門喎,咁啱就開晌中環,就晒我啦,真喺要會一會見識吓咩叫老撾菜。不過,從雜誌嘅文章,已概略了解到由於老撾就晌越南泰國隔離,所以其菜式都近似呢兩個國家。
餐廳位處一商廈,一出電梯就喺餐廳,門面無過多裝潢,單單主要就喺餐廳嘅標誌。 
入內裝修設計亦非常簡單,水泥地、不鏽鋼枱、木櫈,柱位有啲塗鴉,感覺帶點粗獷味。由於三邊都喺偌大玻璃窗,採光十足,見外面好似有啲露天位,不過,又未見有客人坐出面,所以,都唔知開放未。
餐牌午市跟晚市唔知有無分別,而午市嘅餐牌好簡單,底面兩頁紙睇晒,10款小食、4款沙律、4款老撾粉、4款老撾見求(即喺白咖喱飯),可加錢配冷熱飲品及無糖豆漿。不過,雜誌介紹嘅牛皮醬沙律就未見有供應,未知喺咪只得晚市先有!
bowl是拉差牛油雞翼 $35
啲小食唔貴,定價都喺$28-$40,所以,點一客雞翼,一客6隻,都喺做成單骨雞翼,食起嚟較方便。雞翼以牛油及泰國是拉差辣醬做,故色澤艷紅,入口頗有辣勁,都幾惹味。最好晌餐牌標示隻辣椒公仔俾佢,因為,都真喺越食越辣。
bowl老撾雞肉粉 $58 
老撾粉只有4款口味,雞牛海鮮及素菜,友人揀咗雞肉粉,雖然叫雞肉粉,其實雞肉都喺大配角之一,餸料仲有其他丸類、豆卜、銀芽、蘿蔔……等等,材料算幾豐富。無詳細問朋友覺得點,但見佢清晒成碗粉,應該唔差得去邊。
bowl老撾牛肉粉 $68
小弟就揀牛肉粉, 但跟越南生牛河好唔同,牛骨湯無越南牛河嘅牛骨湯咁濃重,相反多咗少少香料味,啲生牛肉嫩滑得嚟有肉香,加上又有唔少配料,如牛丸、牛筋、豆卜……等等;而米粉聽店員介紹,喺晌番老撾嘅粉麵廠攞貨,夠地道,真喺又幾有米香,口感都比較有韌勁,兼且份量十足,食完一碗真喺超飽。
臨走,見佢哋有啲單張,拎咗張嚟八一八,原來,佢哋設立呢間餐廳仲有另一個目的,就喺培訓年青人加入廚師巳行列,真喺有心、有力!
中環各食肆嘅午市都好旺,呢度都唔例外,不過,始終喺食粉麵,翻枱都算幾快,要等亦唔需要等好耐。晌中環返工嘅朋友,又多一個選擇喇。

個人評分
味道:8/10
環境:7/10
服務:7/10
抵食:7/10
平均每人消費:HK$90

餐廳資料:
施心畢老撾餐廳 Sisombath
中環威靈頓街98號翡翠中心4樓
2117 0788

沒有留言:

發佈留言