一紙主餐牌底面兩版，顯示晒有咩選擇，包括全日早餐、沙律、小食、意大利麵、燉菜及扒類，選擇唔算多，以精為主，順帶一提，小店唔收加一服務費。
晌午市時段嚟，主餐牌有其他加配組合，如加沙律，加湯，加飲品都有優惠。
不過，店長知我中環返工，亦順道介紹我佢哋嘅午餐餐牌，不過，距離我公司都比較遠，午市過嚟就真喺幾趕吓。
煙三文魚意大利青瓜及香草忌廉汁 $98
每一款意大利麵都可以選幼蛋麵、闊條麵或迷你意大利雲吞，而呢道煙三文魚我哋揀咗幼蛋麵。甫上枱，睇到份量十足，好多料，而啲麵條跟平時食到嘅喺有啲分別，感覺喺比較「新鮮」啲，似喺新鮮即製，入口有煙韌感，個汁底都好香滑，只喺嫌少少削身，未喺好掛汁；而煙三文雖然多，個人口味嚟講，就稍為偏鹹，但意大利青瓜好清爽。
牛腩蕃茄濃湯 $98
另一道湯意大利麵我哋就揀迷你意大利雲吞，而雲吞亦有兩款口味：野菌或芝士菠菜，我哋揀後者。整道菜一大碗濃湯，色澤深沉，散發出蕃茄香味，先呷一口，個湯又真喺堅濃郁，微酸鮮活，湯中嘅牛腩都炆得鬆化；不過，芝士菠菜雲吞未有預期般咁正，口感不俗，但芝士冚晒啲菠菜味。
檸檬撻 $28
雖然晚市無咩加配優惠，不過，啲甜品定價都唔貴，但就唔多款，當晚所見就只有芝士餅，朱古力撻及檸檬撻。選最後者，皆因主菜都喺啲味濃嘅食物，店長不違言啲甜品都喺來貨，但質素又唔差喎，撻殼始終擺咗段時間，唔叫得好鬆脆，但個檸檬餡酸香清新，軟滑細緻。
鮮奶咖啡 $34、熱檸茶 $26諗住喺意大利小店，咖啡會有一定水準，所以，專登點一杯鮮奶咖啡嚟襯件檸檬撻，不過，咖啡喺以即沖咖啡機沖製，拉花自然免問，奶泡更喺咖啡還咖啡，奶泡還奶泡，所以，入口雖然都醇香，但就無鮮奶咖啡嗰份順滑均勻感。
是晚，客人唔算多，店長都有時間同我咃傾幾句，又問問意見，始知原來其前身喺樓上鋪，並做開精緻私房菜晚餐，依家「落咗地」就想轉變吓，做上軌道再搞啲新點子。
個人評分
味道：6/10
環境：7/10
服務：8/10
抵食：7/10
平均每人消費：HK$140
味道：6/10
環境：7/10
服務：8/10
抵食：7/10
平均每人消費：HK$140
餐廳資料：
La Casa Bistro
上環文咸東街2號地舖
2505 0555
La Casa Bistro
上環文咸東街2號地舖
2505 0555
沒有留言:
發佈留言