Van Gogh Senses：感觀世界，平凡中嘅不平梵！

好耐無同一班相熟食友聚一聚喇，難得老友吹雞，就算揀嚟尖沙咀地標1881 Heritage嘅「Van Gogh Senses」（VGS）藝術餐廳，小弟都當然要捧場。雖然藝術嘅嘢小弟真喺唔多識，但無論晌香港或外地，都會逛吓博物館、美術館咁架。第一次到訪Van Gogh Senses，由門面，至入到店內，再走到用餐區，所帶嚟嘅印象，絕對唔喺一間餐廳咁簡單，可以講喺一間以梵高為主題嘅小型精品館。

店子集咖啡室、零售及餐廳於一身, 而一入門口，第一眼見到就喺對住正門嘅咖啡店。提供多種咖啡，包括手沖咖啡都有，而特色嘅茶品更唔少得，如伯爵配薰衣草，熱情果搭烏龍，非常特別，仲有梳打及其他非咖啡類。

而餅櫃陳列嘅除色彩繽紛馬卡龍之外，據店員介紹，櫃內嘅每款蛋糕，都以梵高嘅畫作為主題，賣相精緻吸引，定價都喺$58件。

左右兩旁，就喺零售區，產品極之多元化，又精緻，如茶杯、茶壺、香薰、蠟燭……等精品，又有茶葉、咖啡豆、朱古力、餅食……等精裝禮盒，用嚟送禮非常得體。最估唔到更有鮮花售賣，以花藝店形式營運，同樣帶有唔少「梵高概念」。

店長介紹時，強調店名加入「Senses」就喺想強調吓佢哋喺家體驗型藝術空間餐廳，唔單單從飲食，更從唔同嘅感覺（如視覺、觸覺……）去細賞梵高嘅一切。故此，由零售區再走入用餐區，都喺延續呢個藝術空間。

其中，最觸目相信喺由梵高博物館跟富士合作，以三維打印技術所做出嚟梵高嘅名作之一「向日葵」仿畫，全球發行量唔多，雖然喺仿畫，都價值成廿幾萬港紙。

繼續沿路走，就會發現更相跟梵高相關嘅裝飾、書籍、物品……等等。

介紹到用餐區，其實晌門口對出有數張露天枱，方便客人飲杯咖啡，食件餅，享受一下陽光。不過，怕熱嘅就可以選裡面一排高腳枱櫈嚟享用咖啡店嘅食品。

而主用餐區地方非常闊落，枱椅編排寬敞，加上燈光柔和富情調，枱上嘅餐具都優雅精細，令整個環境都整有氣氛。更有興嘅喺一排「掛畫」，除咗映出梵高唔少名作之外，原來，喺會不停播放有開餐廳嘅事物，甚至菜式嘅製作過程，所以，令用餐都變得有趣味。可惜當晚最入面嘅用餐區有包場，未能一窺全貌。

至於入到正題講食，如其他1881嘅餐廳，都喺屬中高檔嘅消費層。呢度晚市只有兩款套餐供應，分別喺5道菜嘅Almond Blossom（$680+10%）同8道菜嘅Sunflower（$980+10%），並奉送餐飲一杯。兩者唔止菜式數量有分別，當中大部份菜式都唔一樣。

順帶一提，枱上嘅擺設及餐具都精緻美麗。

麵包籃

既然作為高檔次嘅餐廳，高質素嘅麵包籃喺期待之事。籃內有3款自家製嘅麵包：無花果合桃軟包、亞麻籽法包及酸種麥包，並伴上法國海鹽牛油。幾款包都各有特色，最討喜心喺隻軟包，入口喺外脆內裡卻好軟綿。順帶一提，就喺每道菜上枱店員都有詳細介紹，唔止菜式嘅用料、製法，更會解說跟梵高作品嘅關聯，點樣構思啲菜式。

挪威三文魚配珍珠西班牙蕃茄冷湯，青瓜冰

既然以「藝術」掛帥，菜式嘅賣相真喺唔可以隨隨便便，先上場嘅前菜，雖然喺見慣見熟嘅三文魚，但整體賣相配襯鮮明，甚有藝術氣息。三文魚原來搵過啲紅菜頭汁醃過，所以先咁鮮紅，而口感油潤，捲住啲沙律菜增加啲爽口感，伴住啲「三文魚籽」其實喺西班牙蕃茄冷湯嘅分子料理；試吓青瓜冰伴啲三文魚，感覺又唔同，實在別出心裁。

青豆煙燻火腿湯配手工麵包

第二道登場喺湯品，而呢款湯喺屬於少見嘅荷蘭菜式，感覺新鮮。單睇表面真喺唔見真章，濟5一羹試3嚟非常足料，原來湯內加入大量蔬菜，如黃豆、青豆、西芹……等等，更混有好多豬肉絲，口感豐富，酸爽開胃。而嗰條手工麵包條亦甚具特色，因為麵包條鬆脆到不得了，唧上酸忌廉芝士及插上食用花，吸晴又好食，精彩。

意大利軟芝士雲吞配杏仁奶泡沫，杏仁脆片

店員介紹時用咗開放式意大利雲吞嚟形容，又話靈感喺取材自梵高一幅名著「臥室」，搞到好好奇。原來塊意大利雲吞喺模仿畫作中嘅床單，再鋪晌啲較淡味嘅乳清芝士Ricotta，食起嚟唔會太飽滯。不過，由於加有杏仁奶泡沫及杏仁脆片，食味絕不單調。伴菜嘅露荀，入口鮮嫩無渣，食得出都喺靚貨。

日本麵豉醬鱈魚配荷蘭燈籠椒意大利西蘭花

主菜就3揀1，有鱈魚、羊扒及牛柳（+$128），友人就揀上心愛嘅鱈魚，味道喺點？友人話好有驚喜，鱈魚以清酒、麵豉、味醂先醃後燒，燒至金黃添香，入口魚肉嫩滑細緻；其他配菜，令賣相多添幾分意境，而碟中紅色及綠色粉末喺墨西哥辣椒粉及日本海藻粉，用作沾魚肉食，令味道多點變化。

法式慢煮羊扒配雅枝竹，薄荷葉

有羊扒，就唔使多諗成為小弟要揀嘅主菜，相比上述嘅菜式，份羊扒嘅外觀就顯得比較平實，無咩花巧，不過，平凡中嘅不平凡就喺件羊先經慢煮再燒香，啲肉呈粉紅色，質腍滑到呢……正呀，而且，肉味帶點羶香，對啱晒胃口。墊底仲有啲南瓜蓉、雅枝竹，實在喺有水準嘅一道主菜。唯一挑剔位喺無特別咨詢客人要幾多成熟，睇色澤喺設定5成，小弟當然啱晒啦，喺怕有啲客人本身怕怕哋生啫。

1888梵高特濃朱古力荷蘭薯仔配西班牙炸甜脆

最後喺甜品嘅登場，個名就夠晒霸氣，但其實賣相唔會好嚇人，而喺貫徹精美，最有心思喺將條「西班牙油炸鬼」撓成繩結似的，顯得更精巧，入口香脆不膩，淋上特濃朱古力漿，令味道更上一層樓。伴以荷蘭薯仔片、紅桑莓、迷你蛋白餅，顯出喺花咗心機嘅出品！

鮮奶咖啡

友人就要咗花茶，配甜點，鮮奶咖啡始終都喺小弟首選，之前晌網上都有見過拉花喺梵高公仔，點嗰時都無期望，但上枱時就喺「佢」，雖然對味道唔會有咩提升，但自我感覺會良好啲。不過，杯鮮奶咖啡確喺沖調高水平，口感柔和而平均，溫熱而醇香。並配上一小件88%純黑朱古力，為今餐完美作結。

曾經有人講，食法國大餐動輒三幾小時，好嘥時間，嚟到VGS如果喺諗住匆匆試完、匆匆閃，又或你自認對藝術識條鐵咩，就真喺勸你無謂嚟，只會錯過好多「感觀」同浪費悠閒嘅享受。除咗富藝術氣息，食物、環境都予人高水準，更值得晌特別嘅日子嚟用餐慶祝！

個人評分
味道：9/10
環境：8/10
服務：8/10
抵食：8/10
平均每人消費：HK$750

餐廳資料：
Van Gogh Senses
尖沙咀廣東道2A號1881 2樓208號舖
2622 2887