2017年10月29日星期日

伊賀日本燒肉料理:伊不稱心

雖然表哥一家都去過好幾次日本關西,傾開偈,原來都未曾試過食日式燒肉,所以,專登搵個星期日晏晝,一齊去試試。晌FB見到呢間「伊賀」,燒肉放題任食兩小時,有唔少優惠,再睇睇風評不俗,而且,午市食燒肉放題又有75折,午市相信亦無咁多人,招呼都應該會好啲。
餐廳佔食廈全層,中午12:45pm到達,甫進入餐廳,意外地無乜客。環境一貫和風裝修,以卡位佔多數,卡位挨背刻意設計高啲,減少前後枱嘅騷擾。
我哋被安排坐晌窗口位,落地大玻璃,雖然只喺樓景,但感覺開揚好多。而爐嘅抽風,採用上下式抽風,感覺不俗,不過,由於我哋燒嘅時間客唔多,評估唔到整體抽氣能力掂唔掂。
一般放題店都備有多款點菜紙,但「伊賀」就型格啲,以平板點菜,操作簡易,好處梗喺夠晒環保啦,而且,缺貨嘅食材亦一目了然。但有好亦有壞,壞處喺一枱一部平板,成日要傳嚟傳去俾其他人睇有咩選擇,亦唔及一眼見晒所有食物般方便,經常要「碌嚟碌去」搵食物。
更要小心一點喺,雖話放題,分類包括刺身、小食、野菜類、燒物、海鮮類、炸物、壽司,但平板內並非全部嘢喺任點任食,例如酒類、飲品類、另外追加類,有個銀碼顯示晌下面,就知要額外收費,故稍不留神,隨時誤墮陷阱,餐飯就使大咗。
bowl刺身船
晌官方FB專頁表示2位送刺身船, 4位送鮮活魚刺身或海膽船, 8位送鮮活龍蝦刺身船+龍蝦粥,但只限晚市,有啲可惜。不過,午市人客唔多,刺身有時間擺到靚靚仔仔,燒玉子卷、松葉蟹棒、甜蝦、八爪魚、三文魚、榮螺肉,整體質素都算唔錯,甜蝦好鮮甜,三文魚夠油潤、榮螺肉爽口柔韌。
墊枱紙有簡單嘅燒肉鮮說,燒牛肉就放中間大火鎖肉汁,燒雞肉或豬肉就放爐邊細火慢燒,咁燒海鮮又點燒呢?野菜類又點?老實,張墊枱紙講得過份簡單,只好一笑置之。其次,留意到墊枱紙左上角有幅「伊賀燒肉頭盤」插圖,喺店家嘅燒肉捱介?
bowl伊賀燒肉頭盤
除咗隻刺身船,未落單先再嚟一碟「燒肉頭盤」,晌墊枱紙就列出安格斯牛肉、加拿大醬油豬頸肉、加拿大醬油豬柳蓋、極上牛小排、牛舌、比利時五花肉、薄切裡肌肉及伊賀一口牛,不過,到正式送嚟嘅喺安格斯牛肉、豬頸肉、五花肉、裡肌肉、一口牛,無咗豬柳蓋、牛小排、牛舌,但多咗單骨雞翼,所以,碟所謂頭盤都喺花巧嘢,有咩出咩咁啦!
分開幾次燒,由於所有嘅肉都切得又薄又細塊,基本上放爐中好易燶,放邊位燒就穩打啲。安格斯牛肉同一口牛幾好食,有肉味得嚟又有油香,不過,最好食反而喺啲雞翼,又香又惹味。
墊枱紙話啲豬肉有醃過,豬頸肉就喺,但啲五花肉點睇、點食都唔似醃過,幸好枱上備有芝麻醬油,再唔喺晌平板選項中,有醬油一欄,蒜蓉、海鮮醬、酸辣汁、燒烤酸汁……多款供選取。
所謂小食類,其實「垃垃雜雜」,有沙律、湯品、白飯、烏冬、冷盤……等等,睇勻興趣都唔大,只喺點客沙律開開胃。
bowl伊賀沙律
始終喺嚟主打食燒肉,其他類別就隨意點點,小食就點咗客伊賀沙律,初時,仲諗住用得店名冠名,應該喺大製作,原來喺三文魚、蟹籽配點生菜,淋上油醋汁,食味……OK啦。
基本上,炸物喺人都啱,所以,我哋點啲炸物當間場兼過過口癮。炸物類選擇多多,超過廿款,故此,我哋都前後點咗幾轉,第一轉就一口氣先點3款。
bowl香芋丸、芝士年糕、吉列炸蝦
一擊即中,3款都好好食。香芋丸炸得外層甘脆,咬落軟滑充滿芋頭香;芝士年糕口感軟糯煙韌,淡淡芝士香,好食;吉列炸蝦雖然細隻咗啲,但仍有份鮮甜味,脆而不膩。
bowl帆立貝、虎蝦、墨魚咀
回本心態就梗喺要燒海鮮,不過,海鮮類選擇唔算多,叫有9款,但已經無咗蟶子、活蜆,有啲睇落麻麻哋,所以,點咗帆立貝、虎蝦、墨魚咀。帆立貝喺伴芝士,非蒜蓉,但成品同樣美味,不過,啲帆立貝比較細隻,無乜肉地,口感一般;虎蝦就好唔錯,雖然並非最大呎碼,但入口爽彈,蝦味算濃;墨魚咀明顯喺貪得意叫一客,原兜放晌爐中燒,口感爽爽韌韌幾得意。
大魚大肉一餐,又點可以無啲菜落肚平衡吓,輪到講講野菜類,一共有16款蔬菜供選擇。
bowl冬菇、茄子、雞脾菇、南瓜、糖心菠蘿、牛油粟米
晌多款蔬菜中,揀咗呢6款,其實,蔬菜類無咩特別嘢,隨心意揀就喺,味道就靠你自己燒得好唔好喇。不過,呢度乜都切到薄一薄,所以,好似啲燒菠蘿咁,太薄食落無口感。
燒肉類本身有成廿多款,之前嘅頭盤肉都只喺佔當中嘅6款,當然仲有好多未試啦,所以,嚟多一輪燒肉,點啲特別嘅款式一試。
bowl手切哈姆豬大腸、伯爵茶漬羊肉、漬壺牛、牛舌、伊比利亞橡果一口豬、芝麻雞翼、黑椒腸
今轉嘅燒肉名稱都比較特別啲,手切哈姆豬大腸食落同平食豬大腸無咩分別,幸而無啲豬臊味,羊肉就唔喺好食得出伯爵茶漬味……其實,店員送到上枱,放低就走,都無咩點介紹咩肉打咩肉,所以,如果你有心搞清楚啲肉喺點樣,最好唔好一次點太多,寧願點多幾次,每次點唔同類別嘅肉,例如雞牛豬羊各一款,就比較易認清楚所點嘅肉。
bowl雙皮奶卷、娘惹山葯
最後,燒完多款肉類、海鮮、野菜,仲有空間,就點多兩輪炸物,第二轉有雙皮奶卷及娘惹山葯,兩款都幾有驚喜喎,雖然今次炸得有啲油,但前者裡面喺好滑嘅奶糕,而後者入口極似紫薯,唔似平時接觸嘅山葯咁爽爽哋,究竟喺咪已經轉咗呢。
bowl日式一口甜薯、薯格、榴槤炸彈
第三轉嘅炸物喺心水嘅甜薯及預咗留肚必試嘅榴槤炸彈,而薯格喺表姪女嘅「飛弗」。啲甜薯夠晒粉甜,榴槤炸彈餡心柔軟,好強勁嘅榴槤咪,正呀。
午市嚟到,唔食燒肉,都可以試午餐有多款午市定食,定價都喺$48-$88,並免費送汽水一罐,仲見有4人同行1人免費優惠,不過,詳情喺點要問問店員。
燒烤嘅食物種類其實選擇多嘅,又有其他放題食物,兩個鐘都夠,一邊燒生嘢,一邊食住啲熟嘢,二、三百蚊個價差唔多啦,只喺食材嘅質素唔好太高期望。招呼方面,午市客唔多所以人手少,故做得無咁熨貼,例如我哋離開之後先醒起未有送上Mövenpick雪糕,唔知喺咪午市打咗75折就無雪糕送呢!

個人評分
味道:6/10
環境:7/10
服務:7/10
抵食:6/10
平均每人消費:HK$255

餐廳資料:
伊賀日本燒肉料理
尖沙咀赫德道4號The Hart 3樓
2887 1028

沒有留言:

發佈留言