2017年9月12日星期二

Springfields:法式小清新.抵食二人餐

中環一入夜都幾靜,旺嚟旺去都只有蘭桂芳同雲咸街或蘇豪一帶,皆因酒吧林立,吸引唔少買醉嘅人或遊客。知道表姨甥女極鍾意窩芙、法式薄餅一類嘅甜食,早前食完晏經過擺花街嘅「Springfields」,晌門口睇見大大個餐牌,原來餐廳主打法式薄餅,更有鹹有甜添,所以,是夜就嚟到「Springfields」。
雖然餐廳入口非常窄,但以白磚牆作門面,晌寂靜嘅擺花街都幾易認得出。而餐廳實際位處地庫層,拾級而下,就發覺裡面別有洞天。
一室白磚牆、白梳化椅,再拼淺灰色雲石枱,有種純潔、清雅嘅感覺。由於是夜客人亦唔多,直到我哋8:45pm離座,整晚都喺三數枱客,故此,用餐時更幽靜,更輕鬆寫意。
餐牌貫徹番餐廳嘅主色調,打開餐牌,印刷精美而簡潔,類別分為前菜、沙律、湯品、意大利麵及鹹甜嘅法式薄餅,而法式薄餅一欄肯定喺重中之重啦,整整兩大版。
主餐牌背頁就羅列咗各款飲品,有非酒精及酒精類,前者包括熱茶、咖啡、汽水、果汁、奶昔……等等,算選擇不少;而後者除啤酒,更提供紅白餐酒添。
除咗散點,仲有個二人套餐,計過數,超抵喎,因為$340已包咗兩個前菜、兩道主菜、 一客甜點及兩杯飲品,更唔收加一,而且,個餐可以一之4過試晒鹹、甜法式薄餅,絕對喺超值之選。
bowlApple Cider
餐飲唔喺普通啡茶,除可以揀果汁,竟然可以揀嚟自法蘭西嘅Apple Cider,因為晌餐牌見單點要$55支。樽身嘅招紙已好有型,蘋果公仔畫成貓頭鷹,酒精度只有4.5%,加上蘋果果香,極之易入口,口感清爽,配稍後上枱嘅炸魷魚圈,絕配呀!
bowlChamomile
表姨甥女一向鍾意飲熱茶,尤其伯爵茶同洋甘菊。洋甘菊以整壺上,茶味比較淡雅。佢話最吸引喺隻茶杯,粉藍色甚有少女情懷味道。
前菜共有4款供選擇,分別喺是日餐湯、炸芝士、炸魷魚圈及沙律。小弟揀咗飲Apple Cider,就刻意揀魷魚圈做配搭,而表姨甥女喜歡食多啲蔬菜,所以,揀沙律。
bowlCalamari
雖然只喺套餐嘅前菜,份量可不少,炸成一大碟,件件金黃,入口外層鬆脆又唔油,咬落咯咯聲,而內裡嘅魷魚柔韌有咬口,沾上有啲似蕃茄莎莎嘅Marinara Sauce,再唧下檸汁,搭一啖Apple Cider,認真爽呀!
bowlSpring Salad
命名得「Spring 」,有種店中招牌嘅感覺。以沙律菜做底,加上車厘茄、青豆、雞肉、牛油果、松子仁,淋上油醋,雖然做法簡單,但勝在落料無欺場,口感豐富,而且,味道亦頗清新。再者,啲雞肉唔會「嚡烚烚」,牛油果又夠熟夠腍。
主菜類同樣又喺4揀2,一款意大利麵及3款鹹法式薄餅供選擇。意粉喺鐵定之選,作為墊肚用,而薄餅則隨心揀咗Farm口味。
bowlGoat Cheese Pasta
用上全麥意粉,色澤比較深色啲之外,其實,煮得出色嘅話,口感同樣有咬口。意粉內混入唔少炒蘑菇、菠菜、香脆合桃碎,口感有層次;而啲羊奶芝士竟然唔喺碎濕濕,仲專登加咗嚿晌面,啲芝士奶香濃郁又唔太羶,大滿足。
bowlFarm
鹹食嘅窩芙都曾經試過,而鹹食嘅法式薄餅印象中都喺第一次。薄餅皮有份脆口感,而內裡填滿薯仔粒、蘑菇、菠菜,全蔬菜素食,加入艾文頓芝士及忌廉,配搭出嚟嘅效果又比預期好喎,一來鹹食唔會覺得好怪,二來有種田園新鮮感,而且,咪睇佢扁扁哋咁,份量可不少,幾飽肚。
最後去到甜點環節,個二人餐提供兩款甜法式薄餅作選舉,分別喺配雲呢嗱雪糕嘅Vanilla Love及配朱古力雪糕嘅Choco Bay,我哋都喺偏鍾意朱古力,所以,揀咗後者。
bowlChoco Bay
個法式薄餅無捲起「雪糕筒」形,只喺平鋪晌碟上,再放上一大球朱古力雪糕、棉花糖、杏仁片及唧上大量忌廉,以及淋上朱古力漿,賣相唔算有驚喜,但濃濃嘅朱古力香,搭上幼滑嘅忌廉,跟煙韌嘅薄餅皮一齊入口,令整體食味唔錯。
等上菜期間,晌餐廳周圍望望,其實落嚟時已見到有個餅櫃,牆上嘅介紹印有多款杯子蛋糕,賣相可愛,大可作為甜點嘅另類選擇。
臨走,仲晌櫃枱拎咗啲單張,午餐就預咗會有,原來,仲有下午茶供應,但只限星期一至五,應該無機會幫襯到。
香港人一向精打細算,成人想覺得自己好精明,不過,點呢個套餐就一定喺好精明,因為專登同佢計計數,如果將以上食物散叫,足足要俾$499,所以,個套餐價足足慳咗30個巴仙,難得超值又好食!

個人評分
味道:8/10
環境:8/10
服務:8/10
抵食:8/10
平均每人消費:HK$170

餐廳資料:
Springfields
中環擺花街11號地鋪
2367 5055

沒有留言:

發佈留言