2017年9月8日星期五

Picada:南美美食之旅

唔知友人喺咪睇到小弟晌大坑嘅「Andy's Garage」食評,講到南美洲好多引人入勝嘅景點,如秘魯天空之城「馬丘比丘」,玻利維亞天空之鏡「烏尤尼鹽湖」……等等,但飛行時間長,旅行成本超高,有生之年都應該無乜機會到訪南美。故此,就推介我到中環嘅「 Picada」,因為主打就喺賣南美菜,唔單止墨西哥,仲有秘魯、哥倫比亞、阿根廷菜……等等。
南美菜晌香港未算大行其道,至多都喺只賣一國嘅菜,較少有一次過提供南美多國嘅菜式。踏進餐廳,左手邊一角喺酒吧位,既然附近就喺蘭桂芳、雲咸街,賣酒喺好自然嘅事。
內裡環境非常闊落,枱櫈拍得唔密,空間感都幾足。本身對南美唔太認識,唔知點為止喺南美風情,大抵有啲仙人掌、食人䱽、亞馬遜河森林之類嘅裝飾吧!
大大個餐牌,底面兩版,翻一轉餐牌,雖然已分門別類,但一大堆頗陌生嘅詞匯,一下子都唔知喺咩。有啲英文輔助吓,總算大概都明喺咩,樣樣新鮮就樣樣都想試,定價亦無想像中貴,而且,確喺有幾多選擇。初時見啲侍應全喺外藉人士,原來部份講廣東話都OK架,唔使擔心溝通唔到。
bowlPicada Garden Salad $148
一上枱個份量嚇得我吖,個盛器成個面盆咁大,望落去材料豐富,基本材料喺沙律菜配黑醋,不過,加上大大球水牛芝士、牛油果、杏仁片、紅腰豆及藜麥,即時變得唔同晒。整體味道清新,口感富層次。
bowlPeruvian Ceviche $148
依道喺店長推介嘅前菜,屬秘魯菜,主要喺以是日魚鮮,混合秘魯粟米、脆粟米粒、紅洋蔥、特色嘅秘魯醬汁所做成,並伴以蕃薯蓉。
賣相好有心思,啲蕃薯蓉一抹過在湯碗邊,型呀!而且,仲冰鎖住,啲魚鮮切粒煮到半生熟,有啲似刺身嘅口感,魚鮮味盡出,加上各種食材及「秘」製醬汁,酸香細緻,越食越開胃,店長果然好推介。
bowl3 Cheese Empanadas $198
Empanada呢樣嘢喺小弟第一次接觸,可以講喺南美人經常食用嘅餡餅。
外型有少少似角仔,焗得外層香脆,內餡喺三重芝士,所以,非常香,無論沾香草醬,抑或牛油果醬,都極之好味。
bowlCarne Anticucho $128
睇餐牌嘅介紹,Anticucho喺秘魯嘅傳統街頭串燒,有牛肉、雞肉及三文魚選擇,咪睇佢百幾蚊一客,份量可不少,而我哋揀牛肉,仲喺以西冷入饌。
以小鐵剷為盛器,幾盞鬼,一客有兩大串,嚿嚿西冷都好大粒,入口好軟腍、好嫩滑嘅感覺,肉味又不俗,所淋上嘅醬汁惹味;底下墊咗好多新薯,有薯香又帶少少爽口感。
bowlThree Duck Rice "Arroz xon Pato" $238
最後來一道飯品,咁就啱啱好喇。飯品方面有3款,包括海鮮、鴨肉、豬腩,雖然索價唔平,但絕對份量十足,一客夠4-5人食,所以,人少就千祈咪嗌。
所謂「Three Duck」喺包括鴨胸、鴨腿及鴨蛋,啲鴨胸軟腍帶濃濃煙燻香,鴨腿酥化好食,鴨蛋就跟平常嘅煎荷包蛋唔喺有太大分別。至於個飯底則頗有特色,墨綠晒色咁但又唔會太俗味,飯粒爽兼混有好多雜菜及紫洋蔥粒,整體真喺唔錯。
對於第一次食全南美菜,印象幾好,加上是日中午客人唔太多,環境舒服。聽店員講,餐廳設有Live Band,9:00pm後中央位置更變成舞池,讓客人盡情載歌載舞,洋溢一片南美風情,真喺越夜越精彩。

個人評分
味道:8/10
環境:8/10
服務:8/10
抵食:7/10
平均每人消費:HK$235

餐廳資料:
Picada
中環雲咸街29號東方有色大廈2樓
3425 4037

沒有留言:

發佈留言