2017年8月6日星期日

Vegetarian Kitchen by Dickson Yoga:搵食好路素

搵地方食飯就梗喺搵啲啱口味架啦,而老婆喺講健康嘅人,又偏向素食,所以,就加多少少揀食肆嘅要求。姨仔早前極力推介間好嘢俾佢,當然要試試啦,就喺位處尖沙咀中心地庫下面一間瑜珈中心所附設嘅餐廳「Vegetarian Kitchen」,主打健康營養嘅料理。
雖然星期日嚟到,個商場靜,間餐廳都靜,我諗除做瑜珈嘅客人之外,都喺靠口碑相傳,個位置咁隔涉,相信生客唔多。
餐廳地方唔算好大,近門口有啲梳化位,適合坐低飲吓嘢。整體以簡潔為主,燈光亦調得光猛,予人有活力之感。
而較搶眼,應該喺入少少一排色彩繽紛嘅卡位,唔單只望落醒神,比起茶記啲卡位闊落好多,所以,寧舍好坐。頭上有啲玻璃櫃,全喺瑜珈相關產品。
牆邊嘅小型電視,部部播嘅嘢都唔同,我哋身邊嗰部正播緊黃淑儀嘅節目。
瑜珈中心開嘅餐廳,梗喺以健康先行,食材自然講求有「營」,所以,老婆話揀咩食都非常放心。翻一轉餐牌,其實選擇真唔少,種類包括湯水系列、冷盤系列、全日精選系列、下午茶餐、健康推介、甜品、推介及多款健康特色飲品。所以,嚟午餐、下午茶或晚餐都無問題。
仲有個座枱小餐牌,喺每日嘅精選套餐,5款主菜配沙律及一杯養生湯或生薑茶,全部定價$75,仲無加一,晌尖沙咀區而言,絕對喺好划算。
bowl田園沙律(跟餐)
跟每日嘅精選套餐所送,份量唔少,而且,用料種類多兼新鮮,淋上胡麻醬,簡單得嚟好清爽。
bowl是日精選素湯(跟餐)
部份主菜會奉送餐湯,無論寫喺是日精選素湯,還是養生湯,店員話其實都喺一樣。是日就喺合掌瓜,因為喺素湯,完全無肉,所以,就難免比較淡口,但勝在健康。
bowl生薑茶(跟餐)
其中一位友人揀咗熱生薑茶,雖然無試到,亦無問友人覺得點,但睇見杯底都有幾多薑片,薑味自然有番咁上下。
bowl鮮奶咖啡 +$12
難得見佢啲餐牌可以加錢要鮮奶咖啡,當然要試吓啦,可是跟期望嘅喺唔一樣。啲咖啡無打奶泡,只喺即磨咖啡,但飲到尾最奇怪加咗啲穀麥,所以,真喺稱唔上喺「Latte」,味道亦都麻煩哋。
bowl鮮牛油果黎麥沙律 $72
主茶陸續登場,老婆就揀依道沙律,純因為牛油果嘅關係。嘩!唔喺講笑,雖然只喺沙律,無諗過咁大份,而且,用料絕對十足,跟上文介紹嘅田園沙律有啲似,沙律底都喺沙律菜、車厘茄、珍珠提、青瓜片、粟米、火龍果、士多啤梨……等,同樣配胡麻醬,但牛油果及黎麥鋪滿碟面,撈勻後,入口清新、清爽、富口感,加上啲牛油果夠熟,非常好食,老婆勁讚。
bowl日式素叉燒炒烏冬 $68
以整個鑊仔盛載,比較平實、茶記款嘅一道菜式,同樣又喺份量十足。炒烏冬雖然無乜驚喜,至少食落唔油,算喺保持到健康,而素叉燒似似哋啲麵筋,軟腍帶點咬口感,整體叫做不過不失。
bowl新鮮藍莓意大利飯 $68
呢個飯就有驚喜,賣相砌得靚靚仔仔,睇個菜名咪以為就咁得藍莓同意大利飯做成,原來更加咗好多材料,如露筍粒、松子仁、合桃,幾片士多啤梨做裝飾。啲飯粒煙韌有咬口,藍莓味鮮活突出,又唔會有啲古怪感,而且,混入多種食材令口感極有層次。
bowl雜菌藍莓薄餅 $75
薄餅喺迷你批呎吋,份量比預期細少許,但就非常足料,批面放滿雜菌同藍莓,再鋪上莫沙里拉芝士。批底介乎薄批與厚批之間,唔算好出色,但口感仍算鬆軟,因為有超多雜菌及藍莓,食味不俗。學我老婆話齋,藍莓明目,多食無妨。
小弟天生喜歡動感啲嘅運動,好似太極、瑜珈依啲咗靜態嘅運動真喺唔啱我,不過,Vegetarian Kitchen嘅出品真喺唔錯,唔止得個健康,味道、賣相都唔錯,翻兜機率高。加上招呼幾貼心,就好似點菜前,侍應哥仔晌遠處留意住我哋,既唔會騷擾我哋,我哋一舉手準備落單,佢就第一時間過嚟招呼。餐後,亦主動提供清水,更着意叫我哋慢慢坐。

個人評分
味道:8/10
環境:8/10
服務:8/10
抵食:8/10
平均每人消費:HK$75

餐廳資料:
Vegetarian Kitchen by Dickson Yoga
尖沙咀麼地道66號尖沙咀中心地庫 LG02A
21382999

沒有留言:

發佈留言