Plumcot：好友狂嚐曲（69）

依一篇以「好友狂嚐曲」為標題，着實有少少抽水，因為，以往依個曲奇系列嘅食評，都喺皆因友人嘅曲奇餽贈，令小弟不斷可以嚐到美味曲奇而撰寫；但今次，純粹因為到大坑嘅「Andy's Garage」食完墨西哥菜後，途經「Plumcot」，好奇買咗包曲奇試試才撰寫出呢篇短評，故此，實際應該喺好奇狂嚐曲。

入夜嘅新村街真喺好靜、好靜，所以，有咩鋪頭仲有開，一見燈火通明就知道。以一家烘焙店而言，就喺見Plumcot咁夜都未閂，所以，走入去睇睇， 前鋪後工場，地方唔大，所有售賣嘅產品一目了然。

熱情嘅店主介紹佢哋嘅招牌產品之一就喺自家品牌無添加嘅杯裝雪糕，口味眾多，亦頗有特色，不過，小弟食完餐墨西哥菜真喺好飽吓，故只買點曲奇外帶。

另一款招牌產品喺牛角酥，當然，一早賣晒，枱上剩低嘅產品就有曲奇、件裝蛋糕、法式貝殼餅，法式金磚蛋糕……等等。而眾多產品中，買咗市面較少造嘅香橙曲奇一試。

香橙曲奇（$30）一包有兩大件，香脆嘅牛油曲奇底，上面薄薄一層香橙醬，可能你會疑惑點解啲香橙醬唔喺橙色，而喺奶黃色， 朕橙味又幾清新吓！其實唔需要加好多橙汁，刨多嘅橙青（橙皮蓉）落去已可以做到好香橙味。

臨走，晌另一邊貨架仲發現到啲骨頭形曲奇，幾得意，原來真喺俾狗仔食，同店主交流時，佢話大坑有唔少人養狗，所以，造就依款產品出現。

大坑啲食肆近年好似轉換得幾快，雖然有唔少卧虎藏龍嘅小店，但有實力嘅始終唔多，Plumcot能否有力成為一員，還需時間驗正。

個人評分
味道：7/10
環境：6/10
服務：7/10
抵食：6/10
平均每人消費：HK$15

餐廳資料：
Plumcot
大坑新村街10A號地舖
25736293