三郎麵燒屋：拼麵三郎

最近，晌元朗賣車仔麵賣到成名嘅「永年士多」衝出咗元朗，晌尖沙咀插旗，引嚟少少話題，不過，小弟甚少慕名去幫襯，因為怕人多又要排。最近，誤打誤撞嚟到晌長沙灣保安道尾嘅「三郎麵燒屋」食車仔麵，唔喺話好食到驚為天人嗰種，但就非常抵食。

小店地方唔大，左右兩排高脚吧枱位，中間再兩排枱櫈，裝修簡單，但就勝在乾淨企理。咁嚟食車仔麵，都唔會對環境有咩要求，但求坐得舒服就算。

話就話喺車仔麵店，但另一特色喺佢哋做埋串燒，所以，店名叫麵燒屋。雖然，格局較街坊，唔可以跟居酒屋一類餐廳相提並論，但串燒嘅款式之多都足見店主嘅誠意。

此外，牆上有塊黑板，列出多款燒烤推介，喜歡串燒嘅客人不妨多向此等推介考慮。

講番個抵食車仔麵，$23包兩餸，其後加餸又以總數最低嘅價錢計算，另點冷熱飲品又有優惠。

淨餸菜底（貢丸、豬潤、柱侯牛腩）$29

菜底可以揀菜芯、生菜，配腩汁，3款餸夾埋都唔少，除咗啲豬潤稍為韌身啲又唔起沙，貢丸同牛腩都好食，前者爽彈咬落有菇香，而後者鬆化有肉味。

凍檸茶 +$8

親友話個茶底唔錯，唔會淡而無味，只喺加$8，大大杯，清爽抵飲。

油麵（花枝丸、脆豬頸肉、蝦香卷）$29

小弟就鍾意油麵多啲，配咖喱汁，貪佢夠惹味。睇勻咁多款餸，呢3款喺我嘅最心水， 花枝丸嗰種質感最得意，軟軟腍腍又有啲花枝粒，脆豬頸肉燒得爽脆，喺嫌切得太細件，蝦香卷嘅蝦肉就唔太多，但好味在甘脆不膩。

凍奶茶 +$8

單睇啲顏色幾對辧吓，飲兩口，喂！估唔到又幾OK喎，記住唔喺茶記啲奶茶會差少少，飲落真喺唔差，好滑算唔得上，但茶底夠香。

順帶一提，枱上有罌自家製特色醬料，有啲似XO醬一類，嗒落鹹鮮惹味，裡面好足料，伴麵真喺幾正。原來仲有得買走，$50一罌啫。

三十零蚊連埋嘢飲，食到飽飽，果真抵食。如果唔夠，麵底加底都喺$5，包食到飽，友人打趣咁講，呢度喺糧尾救星。

個人評分
味道：7/10
環境：7/10
服務：7/10
抵食：9/10
平均每人消費：HK$37

餐廳資料：
三郎麵燒屋
長沙灣保安道401-405號昌暉大廈地下12號舖
3705 2161