講明迤評，真喺樣樣寫得「喺咁二」，就連點心紙都喺隨意拎，印象好似唔止呢兩張。
八味滑豆腐 $31.5
「八味」唔知何解，「七味」就會諗起日式嘅七味粉，不過，都唔好理佢喺乜，總之啲豆腐細細粒，一口一粒，外脆內滑，入口不膩。
蜜汁叉燒包 $20.8
個叉燒包包身好鬆軟，咬落唔黏牙，餡料又夠多，大家就鍾意佢無乜肥豬肉囉。
百味蒸鳳爪 $29.8
雖然依家啲酒樓創作出唔少新派點心，但依類舊款嘢佢大有捧場客。鳳爪非常入味，骨肉輕易分離，但叫「百味」又有啲亂嚟。
薑蔥牛柏葉 $33.8
牛柏葉一喺打鞭爐，一喺飲茶先會食到，簡單薑蔥蒸，食落清新爽口。
北菇棉花雞 $23.8
啲雞件滑就滑喇，但味道比較淡口，墊底就有好多魚肚，幾爽口喎。
鮮肉小籠包 $33.8
雖然佢哋唔喺主打滬菜，但啲小籠包比想像中好喎，皮夠薄，喺肉汁差少少，唔夠爆。
迷你糯米雞 $33.8
大家都話珍珠雞無乜餡唔抵食，見有款迷你糯米雞，就不妨試吓。做得唔錯，糯米煙韌，兼且有好多餡料，好食。
潮州蒸粉果 $29.8
無食到，唔知味道喺點，不過，睇樣就似乎做得不俗，皮薄透餡。
蒜香蝦春卷 $35.0
呢個春卷正，香脆不膩，入口真喺堅有蒜香味，未影得徹相，已經被人快手夾咗件走，哈哈！
山竹牛肉球 $16.8
一般般咁啦，牛肉球都搓得鬆化嘅，有少少馬蹄粒，但如果加啲陳皮就更好喇。
焗叉燒餐包 $29.8
跟傳統嘅叉燒包，雖然餡料一樣，但叉燒餐包喺另一種韻味，包身鬆軟得嚟有陣陣芳香感。
蒸芋頭糕 $16.8
雖然唔喺煎，無咗香口感，但件芋頭糕好足料，又甚有芋頭味，沾點豉油已夠好味。
南瓜煎軟餅 $18.8
南瓜餅喺心水點心之一，餅皮軟糯，當然，南瓜味算唔上好突出，但豆沙餡甚為清甜。
排骨蒸腸粉 $18.8
啲排骨做得有啲迤，好似無乜點醃過之餘，又無豉味，連帶墊底嘅腸粉都好淡口。
栗茸千層馬拉糕 $20.8
馬拉糕就食得多，依一款加入栗子蓉嘅千層版本，超好食喎，糕身軟綿富栗子香。
豬頸肉乾炒河粉 $68.0
啲炒河炒得均勻，條條粉都上晒色，頗惹味，而改用爽口嘅豬頸肉作配搭，效果一啲都唔差。
魚湯野菌浸時蔬 $41.5
詢眾要求，加點一客浸時蔬，個魚湯幾香濃，真喺可以當湯飲，啲時蔬亦頗清爽。
咖啡糕 $33.8
咖啡糕一層又一層，做得工整，入口咖啡味幾突出，冰涼清爽。
鳳梨甜心鼠 $33.8喺媽咪級嘅組員點俾啲仔仔食，賣相生鬼絕對吸晴，以糯米滋包住菠蘿蓉，問個細路好唔好，佢實話好架！
紅豆桂花糕 $33.8
上次嚟都有食過，底面做成兩層桂花糕，落足桂花，中間夾一層紅豆糕，紅豆大粒清甜，又帶桂花香。
腐竹薏米 $12.8、紫米露 $12.8
是日嘅特價糖水，十幾蚊碗去邊度搵，質素唔錯，至少有腐竹香。另一款特價產品，稀杰度OK，又少甜，算喺交足貨，況且，佢哋都喺過過口癮，唔喺太高要求。
「譽宴」嘅點心質素唔算話好高，定價亦唔算好大眾化，但勝在地方好坐，夠舒服，地點更方便到大家，總之大家食得開心，傾得盡興，算喺出乎預料啦。
個人評分
味道：7/10
環境：8/10
服務：8/10
抵食：7/10
平均每人消費：HK$100
味道：7/10
環境：8/10
服務：8/10
抵食：7/10
平均每人消費：HK$100
餐廳資料：
譽宴 U-Banquet
太子彌敦道750號始創中心始創中心6樓
2811 1983
譽宴 U-Banquet
太子彌敦道750號始創中心始創中心6樓
2811 1983
沒有留言:
發佈留言