斯慕奇 Smuki：一斯脆味

同啲朋友為九月嘅花東之旅開「茶會」，晌旺角嘅上樓咖啡店食晏兼交待行程細節，因為店家嘅是日甜品只有普通嘅芝士餅一款，滿足唔到友人嘅喜好，所以，建議不如一齊試試一間主打法式泡芙棒嘅「Smuki 斯慕奇」，就晌兩個街口不遠處。

嚟到門口，有3數個客正在排隊，排隊期間已傳來陣陣香氣，皆因所有泡芙棒都喺玩場即焗。

現有兩款口味，分別喺原味及抹茶味，可能新張關係，試食價都喺廿零蚊一支，而後者售價會貴少評。不過，兩款口味夾埋買，又有啲優惠，平均$20支。

泡芙棒正名叫法國臻品奶脆，個名夠晒華麗，簡單而言，就喺加入唔同味道吉士嘅長形泡芙棒。

法國臻品奶脆（原味）$20

由於泡芙棒都喺即場烘焗，見佢哋唔會一次做得太多，所以，入口都挺脆身，又富牛油香，而且，外觀又鋪滿杏仁粒，更添口感。棒內填滿清涼嘅原味吉士漿，順滑的嚟「涼朕朕」，好有蛋香，又唔似一貫法式甜品咁甜，整體不俗。

法國臻品奶脆（抹茶味）$20

對比原味，就喺用上抹茶味嘅吉士漿，但原來，就連條泡芙棒都有加入抹茶成份去做，所以，外表嘅色澤深啲，同埋有少少暗綠。入口同樣鬆脆，而吉士嘅抹茶味一啲唔弱，茶香中帶點甘，故此，我哋都較鍾意抹茶味。

包裝紙後有食用提示，說明兩小時內食用最佳，不過，當日下午成34、35°C，吉士溶得快且好易變暖，有失風味，所以，真喺即買即食，等多陣都唔好呀！

因為近日天氣非常熱，小弟覺得如果啲吉士做得凍啲，㩒擺啲，無咁快溶之餘，冰火嘅效果應該會更理想。

個人評分
味道：8/10
環境：7/10
服務：7/10
抵食：7/10
平均每人消費：HK$20

餐廳資料：
斯慕奇 Smuki
旺角西洋菜南街60號地下3號舖