2017年7月7日星期五

東海滬 Shanghai East:滬相輝映

老婆啱啱搞完個活動,所以,趁開心星期五就一於唔好煮,落街食慶祝吓,雖然話「落街」,但就由街頭行到街尾,因為我哋都較少行嚟美孚廣場、曼克頓山呢邊食嘢。今晚就專登試試「東海滬」,話時話,作為美孚街坊一員,都真喺第一次到訪。
餐廳裝修幾骨子雅致,以杏啡色為主調,配以柔和嘅燈光,予人感覺舒服。靠窗對住屋苑平台一邊有啲馬蹄位,配搭帶點時尚。加上今晚客人唔算太多,環境顯得清靜,比起去隔離嘅富臨真喺好好多。
主餐牌內先有「自我介紹」,了解到佢哋晌傳統上海菜式之上,都加入創意,期望做出物超所值嘅美饌。
再翻開睇睇,有一大頁「主廚推介」,10款菜式配合圖片及文字介紹,確喺幾吸引,所以,我哋都揀咗幾樣嚟試試。
其次,主餐牌內嘅類別分為冷盤、湯羹、海鮮、肉類、蔬菜、點心、麵飯、年糕、甜品及飲品。我哋是夜就以細細份嘅冷盤、點心為主,務求試多啲款式。
順便就講埋其他收順俾大家參考!
另有張不定期嘅總廚推介,叫「總廚」嘅質素喺咪仲勁啲呢?不妨作為參考。
此外,亦提供2人、4人及8人自選小菜套餐($208、$448、$888,另收茶芥加一),既實惠,又彈性,喺我覺得最划算嘅套餐。
仲有兩款經濟套餐,分別喺2人或4人,定價非常親民,包晒冷盤小碟、湯羹、熱葷、點心、甜品,前者賣$268,後者都只不過$498,另收茶芥加一。
豪少少又人多嘅,就不妨考慮6人或12人套餐,叫得豪少少就更喺菜式豐富啲,所用嘅食材又高級啲,如河蝦仁、遼參、鮑魚……等等,前者要$1,688,後者要$3,680,同樣另收茶芥加一。
古雅嘅茶壺,盛載嘅香片很有茶香,配合今晚我哋以小食、點心為主,猶如飲夜茶。順帶一講,茶芥每位$12,另加一服務費,就當然飲多兩啖香茶。
bowl慢煮煙燻溏心蛋(2隻) $30
煙燻蛋、溏心蛋都喺鍾意嘅食物,因為唔難做,但做得高水準就唔易,東海滬嘅煙燻溏心蛋真喺掂,睇半凝嘅蛋黃已頗對辦,放入口嗰種黏綿溏心感好稠密,蛋味凝香,隨後嘅煙燻味好似爆發咁湧出嚟,雖然形容得有點誇張,但堅好食。
bowl香煎素鵝 $52
雖然被列為冷盤類,但碟素鵝喺微暖,腐皮咬落十分甘脆而不膩,內裡嘅甘筍絲、冬菇絲增添口感。
bowl揚州肴肉 $60
啲肴肉切成菱形,再排成花狀,賣相已經好有美感,再睇睇,下層嘅豬蹄肉佔嘅比例非常多,入口有種鬆化感,而上層嘅凍膏清爽有點柔滑感,整體做得幾有水準喎。
bowl乾隆文思豆腐羹 $48
文思豆腐羹之所以出名在於顯出師傅嘅刀功,將豆腐切成幼絲喺其精髓,更加上竹笙、髮菜,雖然實物唔及餐牌中嘅相片咁靚,但都睇到豆腐確喺切到幼細如絲,而味道偏較清淡。
bowl宋嫂魚羹 $48
對比個文思豆腐羹,呢個宋嫂魚羹我就覺得好飲啲,外觀跟文思豆腐羹幾相似,但入口有唔少嫩滑嘅魚肉,亦多一入鮮甜味。
bowl小揚多汁生煎包 $35
通常食生煎包多數貪其脆底,但呢個生煎包就加埋爆汁,因為無諗過有咁多湯汁,所以就一口咬落去,差啲濺到自己。加埋鬆化有肉鮮嘅豬肉餡,同焦脆嘅包底皮,非常好食,不愧喺主廚推介嘅款式。
bowl山東香煎韭菜盒 $35
又喺另一主廚推介嘅點心,加上喺素包點,就更合老婆心水。一客有2件,再一開二,扁圓嘅韭菜盒塞滿韭菜,入口真喺好有韭菜香味,此外,仲混有蝦米、粉絲、冬菇,口感極有層次;由於兩面都煎過,所以,底面都咁脆口。
bowl野菌素花煎餃 $40
就老婆口味,點多款素包點,不過,又喺煎餃嚟。睇落好似無咩特別,細心睇其實佢啲摺紋包得幾工整,咬開一啖,啲餃皮薄而平均,配野菌一皮好食。
最尾喺嚐甜時間,甜品都有7款供選擇,一口氣點咗兩款:金陵驢打滾及十勝紅豆宮廷豌豆黃,揀佢哋嘅理由好簡單,較特別,又少機會食,兼且亦喺主廚推介。
bowl金陵驢打滾 $35
單睇個名真喺唔知乜嚟,幸而餐牌有特別介紹,不過,記得喺「樂天皇朝」食過,約一年前嘅事。本來想叉起一件影相,但層糯米皮太煙糯喇,捲起嘅紅豆蓉好清甜,沾滿黃豆粉,十分有特色。
bowl十勝紅豆宮廷豌豆黃 $35
貴為慈禧太后鍾意嘅糕點,點都要試吓嘅。吸成小花型顯得精緻,上層以日本十勝紅豆做嘅紅豆糕,清甜有好濃嘅紅豆味,而下層以豌豆做嘅豌豆糕,有輕輕豆香,口感柔軟而綿密。
對於今晚嘅冷盤、湯羹、點心,出品相當有水準,可謂互相輝映,我哋都食得稱心滿意,不過人少就未有機會試到多啲菜式,如海鮮、肉類、蔬菜、麵飯、年糕……等等,老婆已講定下次做節飯不如喺度搞。

個人評分
味道:8/10
環境:8/10
服務:8/10
抵食:8/10
平均每人消費:HK$170

餐廳資料:
東海滬 Shanghai East
美孚百老匯街69-119號美孚新邨第4期美孚廣場3樓
2370 9618

沒有留言:

發佈留言