2017年7月26日星期三

Non Kitchen:晴non的一天

同表哥講咗好幾次,觀塘有唔少廠廈餐廳,好多都好有特色,佢就一次都未試過嚟依類餐廳,所以,今次短聚就揀咗一間帶佢試吓,順便交收啲旅行用品,去旅行最緊要天氣好,順祝佢哋一家三口下個月中嘅關西之旅,一切順利,日日都喺晴朗天。non kitchen雖然話喺屬觀塘區,但其實近牛頭角地鐵,行過嚟都喺5分鐘,挺方便。
廠廈餐廳,對我嚟講都唔喺第一次,所以,驚喜度唔會太高,但對表哥而言,感覺就幾特別,明明外邊如工廠咁,但一入到餐廳就唔同晒,地方好大,確有尋幽探秘之感。一室裝飾簡約,水泥地,白牆身,唔喺好工業風,但就因為座位安排寧舍闊落,空間感十足。
餐廳逢星期五、六做緊「無限任食牛扒之夜」,有自助沙律吧、熱盤,任食澳洲穀飼肉眼,仲包一客甜品及基本餐飲,成人$238一位,如果喜歡食扒嘅人,計落確喺超划算。不過,一來表哥非狂牛之人,二來個任食有90分鐘時限,輕鬆嚟到就唔想咁趕,再者咁着數嘅嘢一定吸引好多人,環境有可能嘈雜啲,我哋就寧願靜靜哋食餐飯、吹吓水。
回歸晚餐餐牌,喺兩道菜晚餐,包是日餐湯及主菜,並奉送啡茶,視乎主菜選擇,主菜選擇都頗多,A到L共12款,定價$88-$248 + 10%,正所謂豐儉由人。
如果你唔鍾意一般檸水、紅茶、咖啡,餐廳提供多款特飲、非酒精雞尾酒、花茶、果汁、梳打、特色咖啡……等等,全部都可以以半價轉款。
故此,我哋都貪口爽揀咗轉特飲。不過,建議店家可以晌啲特飲下列出基本成份,因為,有啲單睇名字真喺估唔到喺咩嚟,如果寫低咗就唔需要客人吓吓煩住侍應嚟問。
bowl盛放之初夏 +$21
表哥呢杯可以講吓冰凍版嘅花果茶,賣相清爽,佢話茶底清醇,有茶香,混有多款水果,如蘋果、水蜜桃、士多啤梨、藍莓……等等,令茶中滲出果香,尤其飲到近尾,果香更突出。
bowlOreo薄荷朱古力特飲 +$21
小弟呢杯就明顯喺加入薄荷糖水嘅凍朱古力,所以,飲落陣陣清爽感,而朱古力味不俗,當面頭嘅忌廉跟朱古力再溝勻啲,口感就更滑溜,而當中又確喺飲到少少Oreo餅碎。
bowl麵包籃
隔無耐,麵包籃就送上,內有蒜蓉包同多穀麥包,兩款包都各有特色,前者蒜香十足,件法包又脆身,而後者軟熟有咬口,甚富麥香。當然,再熱烘烘啲就更一流啦!
bowl是日餐湯
同時間,青豆蓉忌廉湯亦都上埋枱。豆蓉個色就麻麻靚,不過,豆味濃,個湯亦打得頗滑溜,水準不俗。
上文都講過主菜足有12款之多,有素、有肉,有意粉、有漢堡,有部份主菜更以高級食材入饌,如美國安格斯,鹿兒島黑豚,總之不愁無選擇。
bowl巴馬火腿卡邦尼忌廉汁扁意粉配溫泉蛋 $118
以原隻鐵煎鑊呈上,夠晒氣勢,而碟扁意粉份量唔少,睇外觀,個忌廉汁底夠厚身,每炷意粉都掛滿汁,入口有咬口,兼且裡面有唔少蘑菇同巴馬火腿,令個意粉多添一份鹹香味;而面頭隻溫泉蛋做得啱啱好,一篤開,蛋黃就湧流而下,撈勻啲意粉就更好味。
bowl澳洲肉眼牛扒配黑松露牛油汁 $158
表哥對牛扒就情有獨鍾,所以,佢嘅心水就喺款澳洲肉眼扒,件牛扒燒得非常靚仔,炭燒嘅坑紋十分清晰,要上7乘,燒得恰到好處,食落肉質軟腍富肉味,伴上黑松露牛油汁,味道幽香;配菜都唔馬虎,有扒意大利蕃茄、燒雞脾菇及焗新薯,薯菜睇出佢哋有誠意。
食晚餐,可以以$25加配甜品,有朱古力心太軟及雪糕蘋果批,咁嘅價,絕對諗得過啦!
bowl朱古力心太軟 +$25
個心太軟啱啱送到嚟就穿咗,相信喺焗得未夠火喉,個外殼較薄未成晒形,不過,對我哋嚟講都好小事,只喺影唔到佢個原形,而睇到啲朱古力漿澎湃咁流出嚟,總好過焗過籠實晒心。外殼脆脆哋,啲朱古力味好濃郁,然而,球雲呢嗱雪糕就普通啲,但賣相就睇到喺花過功夫。
bowl雪糕蘋果批 +$25
近年食咗唔少蘋果批,做法都各有千秋,而呢度嘅處理就用咗千層酥皮嚟做個批底,再一片疊一片咁鋪上薄薄嘅蘋果片,賣相好有層次。要趁快食,先食到酥皮嘅酥脆,否則因為雪糕溶咗落去變腍就無咁理想,而蘋果片好清甜,如加多啲玉桂就更正,更啱小弟口味。
對於今餐廠廈晚飯,表哥就好讚賞,加上第一次到廠廈食飯,新鮮感十足。其實,依家廠廈餐廳都發展得頗成熟,唔止觀塘,仲有荔枝角、新蒲崗、火炭、黃竹坑……等等傳統工廠區,都開枝散葉分佈晌唔同區域,咩菜系都有,更有不少喺卧虎藏龍。工作唔開心就好影響心情,但食番餐好嘅,喺心靈嘅調節,人都開「non」番晒!

個人評分
味道:8/10
環境:7/10
服務:8/10
抵食:8/10
平均每人消費:HK$200

餐廳資料:
Non Kitchen
觀塘鴻圖道12精棉工業大廈1樓
2783 0313

沒有留言:

發佈留言