2017年7月29日星期六

心選 Choice Cafe:最佳選友

九月中準備咗一趟花東之旅,機票、酒店亦一早訂好,行程基本上已度掂晒,喺有啲細位要執執,所以,趁出發前個半月,喺時候約啲「團友」開吓茶會,就番各人,選址旺角,揀咗數上咖啡店嘅「Choice Cafe」,貪佢環境夠迤,讓我哋可以慢慢傾。同人去旅行都要講夾唔夾,今次嘅旅行組合,可以講喺最佳「選」友之一,啱傾啱講!

啱啱遇着大廈維修,現場通道比較亂同垃雜,不過,入到餐廳感覺就唔同晒,全場都喺大型梳化位,配以仿磚牆,感覺挺悠閒。但座位編排令有啲位嘅出入通道好窄,出入頗不便。而且,部份梳化用咗一段日子,梳化內嘅彈簧有啲移位或變形,雖然闊落,但變得唔算好好坐。
天花嘅吊燈,牆邊壁櫃上嘅蠟燭燈、木偶,都顯示出店主都花過心思晌環境上,走一種精緻嘅路線。
不過,另一賣點喺佢哋提供好多小玩意,我見有幾位媽咪,帶埋啲小朋友嚟,大人就食嘢、吹水,細路就周圍走、玩玩具,真喺好過上酒樓。
翻翻主餐牌,選擇唔算多,但叫一應俱全,包括全日選套餐、早晚餐、下午茶餐、沙律、小食、飲品,以及一個額外套餐餐牌。始終見佢哋喺無火煮食,地方又唔喺好大,廚房都唔可以設定得太大。
bowlAll Day Choice 全日選 $98
全日選等同慣常見到嘅全日早餐,唯一唔同喺可自由選食材,晌12款食材中任揀5款,部份貴價啲嘅食材或額外加食材款式先要加錢,此外,包$36以下飲品,選其他飲品只需補差價,彈性非常大。
小弟份全日選就揀咗炒蛋、煙肉、薯角、凱撒沙律及多士,份量幾足料,炒蛋好夠嫩滑,煙肉唔喺平價貨,而且,無話煎到好乾好硬,薯角香脆唔油,凱撒沙律喺簡單版,配芝士粉及煙肉碎,味道不俗,唯一喺啲多士烘得迤咗啲,未夠香脆。
bowlLunch Choice $68
另外,都試咗一客午餐,9款食材中任揀2款食材,再選意粉、長通或飯,配一款醬汁,同樣包$36以下飲品,選其他飲品只需補差價。
午餐就由友人揀食材,要咗蘑菇同煙鴨胸,選長通粉配忌廉汁,出嚟嘅效果唔錯喎,長通粉好有咬口,汁底唔算太濃重,但都夠讓長通掛滿汁,啲煙鴨胸軟腍又有煙燻香,如果多番少少蘑菇就更好。
bowl小食拼盤 $88
有位朋友本身食咗少少嘢嚟,唔喺太餓,所以,就點個小食一齊過過口癮,餐廳提供超過十多款小食,但亦有一款「小食拼盤」,可晌指定小食中揀5款。
最後,我哋個小食拼盤揀咗雞翼、咖喱角、春卷、椒鹽花枝丸、炸魚手指,照睇就喺個3人份,樣樣小食有3件,但唯獨是炸魚手指得兩件,有啲奇怪嘅感覺。依啲都喺現成貨,所以,唔期望話好好食,炸得唔油我都收貨。
bowl焦糖咖啡 +$10
咖啡喺小弟首選,外間天氣太炎熱,所以,都少有哋要杯凍焦糖咖啡,夠晒冰凍,飲兩啖就爽番晒,亦夠焦糖香,而咖啡底本身都唔錯。
bowl榛子咖啡 +$10
榛子咖啡面層打咗一層厚厚嘅奶泡,溝勻之後,友人話個口感頗順滑,既有咖啡香,又有榛子味,冰涼好飲。
bowl熱情果紅茶 $36
老婆就喜歡熱情果種香氣,本來喺想配綠茶,但竟然無供應,不過,紅茶都OK,啲紅茶入口滲出果香,帶微微酸,雖然喺熱茶,感覺又有啲清爽。
整體以一間樓上小咖啡室而言,食物水準算唔上好高,但都算用心製作,再者,定價唔高,環境悠閒,又有多款遊戲提供,食完亦唔會催你走,比起去某幾間連鎖咖啡店更划算。

個人評分
味道:7/10
環境:7/10
服務:8/10
抵食:8/10
平均每人消費:HK$115

餐廳資料:
心選 Choice Cafe
旺角豉油街21號昌記大廈2樓B號舖
2388 1655

沒有留言:

發佈留言