山區裡的走走趯趯: 浦井韓食居酒屋 Pojang Korean Izakaya：浦出美味樂章

2017年6月6日星期二

浦井韓食居酒屋 Pojang Korean Izakaya：浦出美味樂章

一講居酒屋，就諗起食日本嘢，食吓串燒、小食，再飲吓啤酒，鋪仔細細，跟廚師互動交流，氣氛熱鬧。最近，無意中聽朋友講晌iSquare有間韓食居酒屋，不過，定位跟日式居酒屋就唔同，但啲韓食定價唔貴，且份量十足，都幾抵食。既然咁推介，就即管走去試試。

嚟到就認得個鋪位，因為前身喺家賣薄餅嘅意大利餐廳，原來已經變咗韓國菜館。因為餐廳有賣韓燒關係，所以，內裡裝修非常眼熟，一貫韓燒店格局，圓形不銹鋼枱，上抽式抽風，電油桶櫈，設計務求精簡。

餐廳一角牆上放好多手工啤啤酒樽，喺想話俾客人知佢哋有唔少手工啤賣。再者，敢加上居酒屋自稱，酒精類飲品又點會無料到呀！

從飲品餐牌所見，日本清酒、燒酌、韓國甜米酒、自家調雞尾酒、生啤、韓啤……等等，多款酒精飲品供應。

半開放式廚房，以近年晌韓國幾流行嘅貨櫃車箱餐廳作設計藍本。而餐廳周圍設置多部大型電視，不斷播放韓國MV及綜藝節目片段，對韓迷嚟講自然感覺親切。

咁講到食又有咩選擇先？攤開個餐牌，以烤、鍋、板、併作為4大分類，此外，仲有繼續喺韓熱嘅炸雞，以及沙律、飯、湯、麵、小食……等等多種選擇。

韓式前菜小食

嚟到韓式餐館，大多數都會免費供應三數碟韓式涼菜，浦井亦無例外，每位客人奉送3款涼菜：爽脆酸香嘅醃蘿蔔、辛辣十足嘅韓式泡菜及充滿麻油香嘅大豆芽，正所謂各有特色。

除咗睇落啲菜式定價唔貴之餘，店員仲推介咗一個歡樂時光優惠（5:00pm-730pm / 900pm-10:00pm），就喺半份炸雞配兩杯特飲或生啤都只喺賣$138，又或一份浦井炸薯堡配兩杯特飲或生啤亦都只喺賣$128，對比番單點價，差唔多近乎送兩杯飲品俾客，咁抵無理由錯過，況且我哋本身都打算嚟試佢啲炸雞，啱使啦。落單前都再次問清錯，時間喺以入單計定埋單計，免費誤會，確實好喺以入單計，就點一套炸雞嚟食。

佢哋嘅炸雞共有5款口味，分別有原味、辣味、芥末味、蜜糖醬、黃金芝士，而且，又分半份、全份選擇，不過睇價錢就知全份抵好多啦。此外，又分單選、雙拼，甚至三拼，極有彈性，好啱香港人多心嘅心態。

蜜糖醬炸雞（單點價$128）

依幾年都食過好幾家嘅韓式炸雞店，大部份都做得唔錯，今晚浦井嘅炸雞，我都覺得有水準。其中一個特別之處，就喺醬汁多，面面淋上大量蜜糖醬，食起嚟特別滋味，但亦因此為免整腍個脆皮，盡快食喺不二之法門，除皮脆，雞肉亦比預期嫩滑有肉汁。炸雞下仲有炸薯角，熱辣甘香有薯味，點熱氣都要食埋去。

熱辣辣嘅炸雞配杯超冰涼嘅沙冰，咁樣配搭真喺叫人無限爽快。沙冰共有6款口味，店員特別推介青檸及覆盆子，不過，今晚小弟就鍾情多少少菠蘿，其實，咁多款口味我都啱。

覆盆子沙冰（單點價$38）

深紅色嘅覆盆子沙冰，細心再睇，有粒粒微細嘅籽粒，足証堅用鮮覆盆子嚟打成，同埋睇落都幾挺身，感覺幾足料，朋友話酸香鮮活，又夠大杯，抵飲到極，最讚喺無咩冰粒感，打得夠幼細。

菠蘿沙冰（單點價$38）

其實，蜜桃同菠蘿之間諗咗好耐，最後投菠蘿一票，金黃嘅菠蘿沙冰加片薄荷葉，望見都心涼啦。啜一啖，菠蘿味好突出，清甜帶微酸，仲感覺到一絲絲微細嘅菠蘿肉，果然真材實料。

浦井沙律 $88

友人最喜歡沙律，點都要叫番一客，就揀咗冠以店名嘅浦井沙律，本來喺以軟殼蟹及三文魚為主材料，不過，店長話改咗蟹棒及吞拿魚，咨詢大家都覺得為所謂。

個沙律睇起嚟頗大份，沙律菜墊底，非常爽脆，淋上柚子醋，酸香中有份柚子味；蟹棒入口唔似喺啲平價貨，至少唔會喺得嚿粉做嘅劣質嘢，而吞拿魚除炙燒過，更沾滿黑白芝麻及以黑椒調味過，所以，食落有丁點辣勁，啲吞拿亦好新鮮。

牛盛 $228

今餐已食咗炸雞，友人都唔想太熱氣，所以，揀個牛盛鍋以取代食韓式燒肉。包括肉眼、牛腹扒、薄片卷牛及牛舌嘅「牛盛」，送到上枱真喺有啲眼傻，比起餐牌裡嘅圖片，好似大份咗好多，而且勁多肉，不愧稱之為牛盛，只喺賣$228咋喎，一比預期多就自然開心好多。

雖然個名叫「牛盛」，包含4款肉，但成個鍋仲有好多其他食材，如豆腐、豆卜、泡菜、蘿蔔、紫洋蔥、白菜仔、大豆芽、椰菜、年糕，總之超豐富，並由店員幫手處理，先將幾款肉另以餐碟盛開，滾起個湯之後慢慢食啲蔬菜先。啲菜十分鮮甜，豆腐又嫩滑，年糕煙韌有咬口，真喺就連啲白菜仔都好似好食啲，哈哈。食咗大部份蔬菜，可以叫店員加點湯，再以涮涮鍋形式食啲肉。