山區裡的走走趯趯: PappaRich Malaysian Delights：分金同味

2017年6月13日星期二

PappaRich Malaysian Delights：分金同味

雖然唔喺成日食馬來西亞菜，但就幾鍾意依個菜系，2008年第一次同老婆去馬來西亞，第一站唔喺去首府吉隆坡，反而喺先去檳城，對檳城印象好唔錯。而事隔6年，2014年再飛過大馬玩足9日，到訪文化小鎮檳城、陽光海灘浮羅交怡、大馬之都吉隆坡及醉人古城馬六甲，玩得非常開心，試盡不少地道美食。所以，今晚友人揀嚟賣馬來西亞菜嘅「金爸爸」，啱晒我口味啦，仲有一班人一齊食飯，分甘同味，夠晒高興！

究竟呢位老爸有咩來頭？翻閱餐牌時，就睇到佢嘅自我介紹，自2005年成立，足跡遍佈世界各地，問問店長，原來全球已經超過100間分店，仲會繼續擴展版圖，實力真喺唔講得少。

一出電梯就喺餐廳嚟，地方比預期細，雖然裝修唔喺好馬來風情，但不失雅致。而最特色相信喺牆上嘅彩繪，細看喺一幅又一幅描繪地道情懷嘅景物。招呼亦都不俗，添水、換碟等基本嘢都做足！

主餐牌可以講喺一本大相冊，裡面羅列所有菜式，印刷精美，不過，就無標示價錢，而價錢就印晒晌落單紙上，一目了然。

面對數十款食物，睇嚟睇去心多多唔知揀咩好，可以簡簡單單晌餐廳所排出嘅「十大美食」作考慮，當中已包括多款代表性菜式，睇見都食指動。

再唔喺嘅，亦不妨集中火力晌另個兩個「廚師推介」小餐牌度作選擇。既稱為廚師推介，就當然要揀番幾款啦。

仲有個點菜懶人包，就喺嗌套餐，店家提供咗兩款套餐俾客人揀，有2人及4人，由$298-$888，計落比散點好划算，如果有包埋飲品就更好喇，哈哈！

囉惹鮮果沙律 $65

第一次去檳城，第一晚到關仔角所嘅第一道地道馬拉菜就喺「囉吔」（Rojak），即喺晌度叫「囉惹醬蔬果沙律」，晌馬來西亞周圍都食到，現場即點即切即撈。家家店所做嘅都喺大同少異，以多款水果、蔬果，溝埋檳城蝦醬、馬六甲棕櫚糖，後加油炸鬼，撤上花生碎同芝麻就搞掂，味道甜甜酸酸鹹鹹，好鬼過癮。個醬做得夠神髓，唯可惜啲喺油炸鬼唔知何解乾硬咗，影響食味。

巴東牛肉 $98

巴東牛肉屬於印尼名菜，但晌星馬都好流行依道菜，不過，星馬版好似落香料會重手少少。一客大概有6、7條牛肋條，條條「烏瘁瘁」，入口口感鬆化極緻，滲出少少椰奶香之餘，淡淡嘅辣香點到即止，唔會太嗆喉，而啲汁醬其實配飯或印度薄餅都唔錯。

胡椒蝦 $128

黑胡椒蟹晌星加坡好出名，晌度都有得食，不過，以時價計，用上斯里蘭卡靚肉蟹，都咪話唔平。但另一道同樣喺廚師推介嘅胡椒蝦，價錢親民好多啦。雖然外觀唔靚仔，但絕對喺有「內涵」，唔單止蝦肉爽彈，蝦殼咬落都脆脆哋，陣陣黑胡椒香，再加上金蒜片，惹味十足。

海南雞（半隻）$138

人少嚟，就梗喺索性點一客海南雞飯（$88）啦，有齊海南雞、雞飯同湯，不過，人多嘅話就可以考慮點例牌（$88）半隻（$138）或一隻（$248），咁大家都可以試到多啲嘛，另外再配雞飯就$18碗。

半隻海南雞嘅份量，睇落好足秤，雞肉嫩滑而脂肪少，就連雞皮食落爽口而不膩，事後店長問客人意見時交流吓，先知原來佢哋做海南雞時仲加入少少秘製香料，以減少脂肪帶嚟嘅油膩感，而米飯除以雞湯去煲之外，更放啲班蘭葉去煮，增加香氣嘅層次，不過，班蘭嘅香氣稍為薄，而且，飯粒未夠好分明。。

此外，唔可以唔提埋伴海南雞嘅紅黃黑三色醬（薑蓉、特製辣椒醬、甜黑醬油），不過，由於佢哋啲薑蓉又加咗班蘭，所以色澤帶青綠。其實，啲醬除點雞食之外，薑蓉同黑醬油撈飯都好正。

蝦麵 $98

有地道特色，又可以飽肚吓，呢個廚師推介嘅蝦麵喺上算嘅選擇。賣相十分吸引，橙紅色嘅喇沙湯底，除大大隻鮮蝦，仲有怡保芽菜、通菜、烚蛋、雞絲，並放有少量炸蒜，喝一口湯底，濃郁鮮香，猶如啖啖鮮蝦精華，想必用咗唔少時間熬煮。而麵底採用傳統做法「摻摻」，即喺米粉溝油麵，口感獨特，更窩心喺伴有一小碟自家製参峇辣椒醬，鹹香帶微辣，撈麵食真喺別有一番滋味。