2017年6月25日星期日

原藝 Original Art:還原美味

「原」字有解作最先嘅意思,如原本、原來,亦有解作最基本,如原始、原料,小弟並非讀文科出生,個肚墨水都無半滴。只喺初時聽朋友講話去太子「原藝」食晏,因為花墟就晌太子,以為有家叫「園藝」嘅餐廳,當然喺搞錯啦,當得知正名喺「原藝」,英文為Original Art就明白店主做菜嘅路線,絕無故弄「原」虛。
走進餐廳,店子非常細,就只有6個吧位,枱局似酒吧,所以,較適合兩個人嚟食吓飯。然而,餐廳裝修幾骨子,尤其地板磚,有種歐陸味道。
晌入門口時,已發覺有座巴黎鐵塔嘅裝飾,言談間,原來極之後生嘅店主兼大廚喺從法國藍帶學院學成返嚟,廚房設計成半開放式加單邊吧位,就喺想同客人有多啲交流。
安坐後,發覺背後有幾樖小植物,並非普通裝飾用,有煮開嘢嘅朋友一睇啲牌仔就知喺啲香草嚟,堅真喺用嚟做菜。
講完環境,就講講餐牌,餐牌十分簡單,兩頁紙,一張喺散點菜式(前菜、鹹泡芙、串燒),另一張喺午市套餐,我哋嚟都喺以午市套餐為目標,定價$108,包前菜、主菜及飲品,唔收加一,另有湯品及甜品加配優惠。然而,主菜只有3款選擇。
bowl油封蕃茄
先嚟一道簡單前菜,油封蕃茄無論睇落、食落都跟意大利嘅乾蕃茄好相似,入口有朕油香,蕃茄味好濃郁。
bowl黑松露蘑菇濃湯 +$58
見個是日推介餐牌標示一客濃湯要$88,依家跟餐加$58就可以試到。雖然份量細細,但飲一口就已經感覺到個質素,黑松露嘅幽香好突出,又打得細膩幼滑,喺一道出色嘅濃湯。
bowl橄欖油蒜香意大利粉 $108
傳統而基本嘅意大利麵,最重點嘅口感合格,意粉咬落煙韌無過火情況,經橄欖油洗禮,油潤度啱啱好,而且,每口都帶蒜香,好平均。不過,以要求多多嘅香港人而言,可能會覺得單調、普通,又會嫌份量少。
bowl大蝦黑松露意大利飯 $108
相比個意大利麵,依個意大利飯明顯就做得精緻多啲,唔單話佢啲鮮蝦去晒殼仲砌得靚仔又立體,就連飯粒都倒模出嚟襯番個碗。食個意粉都覺得大廚手勢紮實,個飯同樣出色,飯粒煮得剛好,極有咬口,黑松露亦無落得手鬆,大蝦鮮甜爽彈,成件事都好完美。
bowl格雷伯爵茶
無咖啡,小弟就配杯伯爵茶,茶包採用川寧品牌,質素差唔得去邊。入口茶香,細味,讓人舒暢。
bowl特調果汁
友人揀咗果汁,佢話法嚐一口,先喺橙香,再慢慢滲出芒果清甜,感覺天然清爽,相信喺橙汁拼芒果汁。
bowl蘋果撻 $28
因為主菜嘅份唔算多,友人話再容下甜品喺絕無問題。從餐牌所見,亦只有兩款甜點。先試件蘋果撻,撻面放上一片蘋果軟片,再加朶食用花,賣相見精緻。
撻殼鬆化,帶點牛油香,撻內填滿蘋果蓉,質感十分軟滑,味道天然清甜,但有別蘋果批類甜點,喺無加入玉桂作味引,友人就鍾意佢少甜。
bowl伯爵茶蛋糕 $28
另一款甜點亦做得唔錯,清晰可見一層疊一層,海綿蛋糕、伯爵茶慕絲、朱古力慕絲嘅組合,亦加咗少少乾花做裝飾,當中伯爵茶味非常突出。唯一挑剔喺餅面切割有丁點巖巉,可以再做得順滑啲。
輕輕鬆鬆嘅一餐午飯,再加上食物具水準,喺一個周日悠閒好節目。後生仔有夢想確喺好事,盼望能越做越好,做到面面俱「原」。

個人評分
味道:8/10
環境:7/10
服務:7/10
抵食:7/10
平均每人消費:HK$195

餐廳資料:
原藝 Original Art
太子界限街23號地下A1號舖
3571 9208

沒有留言:

發佈留言