整間餐廳裝修好有特色，唔止摩登、型格，由入門口一刻，已經睇到唔少心思位。就好似門面以啡黃色理石砌成，有無一種酒窖或地庫入口嘅感覺呢！入到去，望番轉頭，原先晌門口沉沉灰灰嘅玻璃被商場嘅燈光照一照，變得吸晴，猶如教堂常見嘅彩色玻璃，立時有份古典氣息。
就晌門口位橫掃一下整個餐廳環境，火辣鮮紅嘅梳化椅，即時想起嘅有鬥牛、蕃茄節。而高樓底嘅空間，偌大嘅用餐區，闊落嘅通道空間，精心佈置嘅燈光，一一都令人感到輕鬆、舒服。
講到鬥牛，天花之上猶如太空飛船嘅藝術裝置，有9分似牛頭形狀，喺咪就表示出呢個西班牙嘅國技呢！
走到餐廳尾，可以講喺酒吧區，多組高腳枱櫈，嚟輕酌就最好不過。雖然有定性為酒吧，但音樂並未太嘈吵而影響客人傾談。
環境設計花咗好多心思，就連餐牌都喺，第一眼真喺望唔出乜嘢，但老友勁，果然喺周遊列國，認出封面畫有西班牙國花「石榴花」，如將本餐牌做西班牙國家地形就一絕喇！
菜式方面，沙律、西班牙小食、薄餅、石燒牛扒及海鮮、主菜、火腿冷盤、拼盤及甜品，餐牌印刷精美，部份菜式更附有圖片作參考。
而飲品方面，一張喺餐酒餐牌，另一張喺啤酒、烈酒、果汁、汽水都有嘅餐牌，價錢一欄分咗非歡樂時光（N.H.）及歡樂時光（H.H.）,唔使多講，都喺後者會平啲。
飲酒其實我哋兩個都唔多好，不過，輕度酒精嘅Apple Cider就啱口味啲，而餐廳提供Strongbow品牌嘅「仙地」，啱啱好有兩款，正正可以各點一杯細嚐。
Strongbow Gold Apple $46（歡樂時光價）
原支奉上，並由店長幫忙倒埋入杯，色澤金黃剔透，友人話佢杯Gold Apple有點果香味，似喺青蘋果嘅果香，又有種悠長嘅甘苦味，酒精度低，冰涼爽口，極易入口。碰碰杯，順祝老友生日快樂。
Strongbow Elderflower $46（歡樂時光價）
小弟就揀另一款，由於無試過友人杯Gold Apple，所以，無從對比，唯一明顯嘅分別喺我杯Elderflower色澤較淺，但喺咪有接骨木花味，恕小弟見識少，真喺唔太識分，唔知接骨木花喺咩味，但細心嗒真啲，又似有點花香及青檸味。
既然嚟到西班牙餐廳，好難唔試佢啲西班牙小食Tapas，選擇有近20款，普遍一客都喺6、70有交易，個別三幾款先要過百，定價親民。
西班牙炒辣肉腸 $62
曾經晌西營盤嘅Chico Chica試過依一款菜式，最啱餸啤酒或凍飲，所以，點一客嚟一邊食、一邊傾。一客確喺有好多片，啲辣肉腸入口煙煙韌韌，極有咬口，滲出微微辣味，帶點刺激，唔沾沙律醬仲正，老友既讚好食，又贊喺好介紹。
西班牙香燒乳豬仔 $68
乳豬仔做得精緻，配搭見心思，以百吉包墊底，塗點沙律醬，加上青瓜片、乳豬件、車厘茄篤坐一串做成小食模樣。百吉包烘過，所以好脆口，而乳豬件亦香脆可口，肉質軟熟，帶點油香；青瓜及沙律醬令到食起嚟無咁油膩，繼續以我哋杯「蘋果仙地」嚟襯，好夾。
馬德里燴藍蟹肉配香脆多士 $88
第3道小食揀咗個燴藍蟹肉，亦喺小弟是晚嘅重點推介，睇外觀真喺好似好簡單，但個蟹肉超好食，一來小鍋內有好多絲絲蟹肉，兼有啲蟹膏在其中，二來燴得香濃好味，大羹大羹蟹肉搽上啲超脆口多士，美味到極。因為小鍋份量唔細，單以4片多士都用唔晒啲蟹肉，所以，等陣叫咗個西班牙海鮮飯，仲可以將啲蟹肉加埋落去。
西班牙海鮮炒飯 $138
如果嚟到西班牙餐廳唔食西班牙海鮮飯，就好似有啲若有所失咁。原本喺點一客西班牙海鮮炒飯，但店員見我哋得兩個人，可以選半份，晚平咗，又唔怕食唔晒，當然好啦，不過，見餐廳無半份嘅選擇，相信喺後期順應顧客嘅要求而作出嘅改變。
因為喺半份開係，有別以成隻大鑊呈上咁有亮點，但咪睇份量似喺唔喺好大咁，但已經好夠兩個人食。飯粒炒得分明，以海鮮湯熬煮過，飯粒軟硬適中又有鹹鮮味，之後撈埋啲燴藍蟹肉醬就更鮮香；飯內混滿多種海鮮：蜆肉、大蝦、青口，除咗隻蝦好彈牙鮮甜外，啲魷魚好好食，柔韌有咬口。
雖然只喺食啲小食，再加半份海鮮炒飯，但都食得我哋好飽。甜品只有兩款，都富有西班牙特色，不過，因為非常飽而無試。餐廳環境、氣氛都非常好，食物水準又高，招呼亦夠貼心，唯一要鬧嘅喺，唔知落單嗰個店員喺唔喺聽唔到我要求海鮮炒飯待食晒啲西班牙小食先後上，點知中段就嚟埋個飯，一來堆到成枱都喺嘢，二來太早上易攤凍晒啲食物，其實就算個客無提出咁嘅要求，店員亦應該喺上菜時間上識得處理，喺成晚招呼上美中不足之處。
個人評分
味道：9/10
環境：8/10
服務：8/10
抵食：8/10
平均每人消費：HK$250
味道：9/10
環境：8/10
服務：8/10
抵食：8/10
平均每人消費：HK$250
餐廳資料：
Cocina 3 Tapas Restaurant & Bar
大角咀海泓道1號奧海城三期地下G22號舖
2362 2313
Cocina 3 Tapas Restaurant & Bar
大角咀海泓道1號奧海城三期地下G22號舖
2362 2313
沒有留言:
發佈留言