山區裡的走走趯趯: 野玩田店 Something Wild - The Farm：星期一嚟，有啲野喎！

2017年5月29日星期一

野玩田店 Something Wild - The Farm：星期一嚟，有啲野喎！

同老友麵包班同學仔約食飯由3月約到依家先成事，3月小弟去咗旅行，4月就輪到佢去，跟住老友病咗一輪，啲時間夾嚟夾去，所以，先搞咗咁耐。老友嘅病未叫痊癒十足，仲要戒口，咁由佢負責搵餐廳，揀咗以健康食材入饌為理念嘅「野玩田店」，咁就當然好啦，況且，我自己都未食過。

雖然餐廳地7寫住Shop 201，行到鋪面唔似餐廳，原來喺一個以Natural為主題嘅區域，裡面由多家鋪頭組成，好彩門面有水牌指示。

晌門面，最留意到喺「逢星期一，全日89折」嘅優惠牌，所以，我哋無啦啦變相唔使加一。

由於要就一就老友飲食，所以，今晚食咩就由佢同佢老婆搞掂，我就一於等食，慢慢影吓東、影吓西。先講環境，晌門口睇唔出餐廳都頗大，入門口處有開放式「柴房」，頂位「簷篷」真喺放咗唔少柴枝架，下面則有唔少竹製器具，帶出餐廳主題。

再走入啲啲，就已經喺用餐區，全以淺木系作為主調，裝修頗為簡約，無咩花巧，由於樓底有留番咁上下高，空間感強。如果再多放少少植物，感覺更強，更有郊野嘅感覺。

就連餐墊、餐巾，都極盡田園氣息！

主餐牌封面，大大隻字印住「Tastes of Nature」，再次表達餐廳嘅理念。

翻開第一版，有餐廳嘅自我介紹……自然山野風味。

繼續翻，就圖文並茂列出所有菜式，類別包括芝士拼盤、湯品、小食、沙律、主菜、薄餅、意大利飯、意大利粉、伴菜……等等。

此外，仲另有一張「精選本地農場系列」餐牌，食材都喺本地優先，如本地黑毛豬、本地盲鰽及本地水耕沙律菜。

講到健康營養，除採用本地水耕沙律菜之外，晌餐牌中間大頁，更特別介紹自家種植嘅迷你菜，迷你菜好處喺乜？據佢哋介紹，迷你菜泛指蔬菜及香草嘅幼苗，待發芽不足一個月就收割，所以，營養含量比熟成嘅菜大大提高。

自家製麵包籃

先上一小籃麵包，以小竹籃盛載，內有餅乾條及幾款小圓包，小圓包好軟熟，卻好有咬口，富麥香。

飲品方面唔止有特色，更喺健康行頭，除多款招牌特飲、冷壓果沙，好幾款健康特飲都吸引，此外，餐酒、雞尾酒、啤酒、手工啤、花茶、咖啡一樣有供應，可以講一應俱全。

奇亞籽檸檬蜂蜜 $58

簡單嚟講，就喺一杯檸蜜，只喺加咗大量奇亞籽，究竟有乜好？奇亞籽小弟都喺第一次接觸，據店長講，佢喺鼠尾草嘅種籽嚟，有幫助改善消化系統、促進心臟健康、控制糖尿病、增強體能……等功效，甚至修復髮膚和指甲都得，不過，成杯嘢味道就唔特別。

Something Wild $68

小弟就揀咗以店名命名嘅健康特飲，睇睇有幾特別。由西芹、菠菜、蘋果、檸檬及蜜糖打做成嘅沙冰，晌依家咁炎夏日子，超冰爽。味道以西芹最突出，又有少少果香，整體感覺清新，唯挑剔位喺沙冰打得未夠細緻，有唔少冰粒。

蟹肉蘆筍忌廉闊條麵 $158

所有菜式由老友拍版，小弟就只有食食食，先登場有一道「闊」條麵（Pappardelle），而唔喺寬條麵（Fettuccine），比寬條麵更闊，記得年初晌西環嘅Little Creatures見識過一次，仲因為未有中文名，幫佢稱為寬「帶」麵，因為有成兩隻手指闊，甚具咬口。汁底喺忌廉香蒜白酒汁，又有唔少鮮味嘅蟹肉同爽嘅嫩蘆筍混晌麵度，好好食，只喺份量有啲少。