2017年5月28日星期日

悅來酒店咖啡室 Panda Café:快閃午餐

Panda Cafe嚟過一次,但已經喺5年前嘅事,跟上次一樣嘅都喺老婆教會搞活動,包晒成場,唔同嘅喺上次食夜晚,今次就嚟食晏晝自助餐。因為又喺有嘢幫手,所以,比人遲食,但又比人早要食完,不過,又唔喺要搏命回本,個半鐘時間都OK嘅。
我哋團體包場,當然有優惠價,但實際幾多就唔知。不過,都影低佢哋門口個水牌,有晒自助餐嘅詳情,俾大家當喺參考。
個場環境喺點,一張相講晒,一就喺環境夠晒大,地方闊落;二就喺樓底高,空間感十足。總體俾人個感覺唔錯,服務亦算妥貼,收碗收碟頗快手。跟住就講吓有咩食,當然,唔及上次食晚餐多選擇啦,至少無咁多貴嘢。
bowl刺身、壽司、冷麵
晚市有多幾款和式小食,而午市就只有3款刺身(吞拿魚、三文魚、鯛魚)及幾款壽司、壽司卷,都見佢哋有輪流轉吓款;此外,仲有啲冷麵供應吓。老實講,試就無試架喇,但睇外觀啲質素都唔差,同枱教友都話有質素。
bowl自選沙律吧
沙律吧有多款沙律菜做膽,配搭上10款配料及7款醬汁,已經可以做出好多配搭。
bowl冷盤
當期時實在太多人,都唔方便影相,隨意影咗張打底,記得晌眾多冷盤嘢,巴馬火腿、烤意大利黃青瓜、煙火腿粒就最得我心。
bowl凍海鮮
午市自助餐嘅凍海鮮當然一早無咩期望,但都介紹吓有咩,分別喺大螺、凍蝦及青口,陣容就肯定唔太吸引,但配搭埋啲沙律、冷盤一齊食,其實都唔錯。
bowl頭盤
小弟嘅頭盤就由沙律、冷盤、凍海鮮,再加少少鮮果組成,夠晒清新健康。基本上啲食材質素唔失禮,沙律菜冰涼爽脆,巴馬火腿油潤鹹香,凍蝦爽甜,伴以法式香草醬,簡單味美。
bowl熱盤、餐湯、麵包
依幾類食物就放晒晌餐廳中央嘅大長枱,菜式乜都有,有中式小炒、西式料理、印度咖喱、亞洲風味、和風精選、雞牛豬魚……等等大概13、4款,湯品就有中西湯各一款,不過,都喺大路嘢,唔似夜晚咁有燉湯飲;兩款麵包睇相就知亦喺普通款式,所以,整體嚟講,款式確喺唔少,屬大包圍式,但就唔會有咩意外驚喜。
bowl開放式廚房
另一邊廂晌餐廳尾,有即煮粉麵、泰式粥品、天婦羅、烤肉……等等自助餐常有嘅項目。
bowl主菜
小弟嘅第二碟食物喺以肉類為主,拎咗烤西冷、燒豬柳、叉燒、烤雞、咖喱牛腩,再配少少蔬菜搭個芝麻餐包用嚟沾咖喱汁,唔好嘥。對住成碟肉就梗喺食得開心啦,啲西冷同烤雞燒得唔錯。
bowl飲品
未講甜點,先講吓飲品方面,當然喺自助,但選擇普通,一邊有百事同七喜,另一邊就喺咖啡機,印象都好似唔覺有茶包或紅茶供應。
bowl甜品
大部份甜品放晒喺中央位置嘅甜品枱上,亦有少部份放晌餐廳尾左邊嘅小枱,又不時會轉款,夾夾埋埋十多款,都唔憂無選擇。
bowl甜點拼盤
小弟慣順次序嚟食嘢,所以,第三碟食物就喺我嘅甜點拼盤,出到去甜品枱有咩就食咩。詳細就唔多講,因為唔喺好有特色嘅款式,都喺來來去去嘅大路嘢,慕絲蛋糕、芝士餅、奶凍、布甸之類,不過,質素都幾平均,算得上幾好食,雖然拎咗一大碟,但清晒半啖都無剩。
bowlMovenpick雪糕
較為驚喜,喺午市竟供應Movenpick雪糕,一大櫃雪糕,無刻意考究有幾多款口味,一切隨遇而安,有咩味咪食咩味。見同枱對面幾個細路喺咁食,無5杯,都有4杯,佢哋仲喺收兒童價,翻晒本啦,小弟都唔弱,前後食咗3杯,哈哈!
前後試咗士多啤梨、意式奶凍及瑞士朱古力,呢個品牌唔使多介紹,雪糕底本身喺軟滑而富奶香,喺質素嘅保證。雖然3款口味都好食,但意式奶凍就最得我歡心,因為加入咗紅桑莓果蓉,令奶味更突出之餘,酸香細緻。
雖然有「工作」晌身關係,但用餐時間都算啱啱好,變相嘅「三道菜」午餐,食得飽之餘,感覺都好滿足。

個人評分
味道:7/10
環境:8/10
服務:8/10
抵食:8/10
平均每人消費:HK$130

餐廳資料:
悅來酒店咖啡室 Panda Café
荃灣荃華街3號悅來酒店3樓
2409 3218

沒有留言:

發佈留言