2017年5月2日星期二

屋喔 O'Casa:情調台屋

老婆有局,所以,今晚就得一支公搵飯食,因為喺臨時臨急臨忙,所以,都費事約人,一條友收工過嚟機利文新街嘅「屋喔」回味吓佢個黑松露野菌蚵仔燉飯,因為年多前曾光顧過旺角店,對依個蚵仔燉飯印象幾深。再者,辛苦咗成日,都想食好少少嘅。
上次到訪旺角屋喔,一來喺日頭,二來兩邊都喺大玻璃窗,三來店內有唔少植物裝飾,感覺充滿活力,一派悠閒嘅台式咖啡店。但今晚到訪嘅中環屋喔,地方同樣唔太大,但昏暗嘅燈光,天花嘅燈泡裝飾,又有啲酒櫃,感覺正正相反,家有氣氛嘅西餐廳。
雖然嚟食晚餐,坐落都已經喺打算叫晚市套餐,不過,都會睇睇主餐牌,睇睇有無咩變化。對比番年幾前晌旺角店影嘅餐牌相,菜式都真喺好唔同,當然仍以台式為主打,加入唔少洋食,如沙律、意大利飯、意大利麵、牛扒……等等,但竟然仲有西班牙海鮮飯。
不過,我都喺簡簡單單點客晚市套餐就算,兩版紙嘅晚餐,一面喺賣台式家常菜,另一面喺洋風滋味,兩者夾埋都有十多款選擇。小弟講明喺嚟重溫佢個蚵仔燉飯,就梗喺揀洋風晚餐,包沙律、餐湯、主菜及$32或以下飲品。
bowl雜菜沙律
沙律2揀1,揀前者雜菜沙律,喺少少油醋配沙律菜,雖然喺普通啲,但啲沙律菜夠冷涼爽脆,喺唔知點解食到尾有少少辣味。
bowl粟米忌廉湯
老實講,個湯就真喺普通咗,喺好普通嘅粟米忌廉湯,即喺好舊式快餐店嗰隻,唔喺話唔好飲,少少失望啫。
bowl黑松露野菌蚵仔燉飯
散點一客賣$78,依家叫俾多$50,多一客沙律、餐湯及$32或以下飲品,但以以上嘅沙律及餐湯質素,感覺唔算話着數好多。幸而,個燉飯保持到水準,燉飯即喺我哋常講嘅意大利飯,唔止蠔仔多,而且粒粒飽滿肉厚,鮮甜蠔味足,餅粒咬口,且混入唔少菇菌,更加埋黑松露醬嚟做,好幽香,要挑剔嘅喺個飯濕咗啲,唔喺濕潤嗰種,直情飯底下有微微「水漬」咁。
bowl玫瑰咖啡
依個喺小弟有少少無留意而睇錯,以為喺鮮奶咖啡,原來只喺普通咖啡底,再加層奶泡,故感覺似意大利泡沫咖啡。然而,個咖啡本身都幾醇香,玫瑰味都突出,當然,玫瑰味只不過源於加咗玫瑰糖漿。
bowl提拉米蘇 +$12
有啲衰貪心,見佢哋食套餐加$12就有一客指定甜品,3款甜品都唔喺普通嘢,就點咗「提拉米蘇」試試。做成盆栽形,又做得大大杯,賣相真喺唔差喎,但並非傳統版本,而喺簡單版,下層蛋糕底除無浸咖啡酒,中間嘅餡料亦非用馬卡風芝士,只可以講喺忌廉配朱古力蛋糕。作為一道甜點,不過不失,但作為提拉米蘇,感覺就唔喺嗰種風味喇。
晚上嘅屋喔,環境確喺唔錯,有氣氛,店員嘅招呼唔錯,有禮貌。整個套餐,主菜嘅燉飯不俗,但配套就需要調整吓,唔知個台式家常菜套餐會唔會好啲呢?

個人評分
味道:6/10
環境:7/10
服務:8/10
抵食:7/10
平均每人消費:HK$154

餐廳資料:
屋喔 O'Casa
中環機利文新街26-28號地舖
2503 2032

沒有留言:

發佈留言