2017年5月1日星期一

甜入心 Heart's Dessert:鹹甜皆宜

五一勞動節就梗喺要勞動吓,趁未到盛夏,天氣仲喺廿度鬆啲,約咗朋友行吓山,由城門行去金山,正正喺衞奕信徑第6段,全程5.3公里,上山落山多,平路少,有啲挑戰性,唯一缺點喺無乜景,但勝在樹蔭多,唔使點曬住行。搭埋頭頭尾尾出入口位,成段路慢慢行,行咗3個鐘,大家都夠晒皮,再落番沙田食嘢。
都幾年無嚟「甜入心」,都喺知道佢哋新加咗啲鹹食,專登順路入嚟撐吓朋友場。所以,午市嚟到,都見有唔少客幫襯,相信好多客同我一樣,食啲鹹點後再試佢哋甜品,始終,佢哋嘅甜點一向有水準。
bowl芒芒不忙 $28
行完山就梗喺要補充多啲水份,芒果一向喺「飛弗」,本來喺想要杯凍鮮奶咖啡,可惜話部咖啡機有問題,無得供應,所以,要杯「芒芒不忙」,其實即喺芒果汁,不過,就加入啲咬口嘅水晶珠,而個芒果汁嘅芒果味鮮甜濃郁,但有些微偏甜。
bowl北極光 $28
友人嘅「北極光」賣相極之靚,紫紫紅紅,有少少極光感喎,不過,味道又唔算好特別,辨別唔到咩味,只可以講喺酸酸甜甜,清涼得嚟有啲似梳打飲品,底下同樣有啲水晶珠。
鹹食方面,多咗幾款意粉、全日早餐及班尼迪蛋,定價$58-$78,都唔算貴,當然,如有啲加餐飲嘅優惠就更好啦,哈哈!
bowl全日早餐 $68
從餐牌所見,都已經幾豐富,賣$68都覺得幾抵食。成份「早餐」有齊芒果汁沙律菜、煙肉、牛油多士、車厘茄、豬肉腸、黑松露炒蛋、蜜瓜及茄汁豆,而仲有一客椰奶焦糖布甸喺餐牌嘅相片無,即喺額外奉送,抵得無嘢講。啲沙律菜幾清爽,淋上芒果汁就自然升級咗;煙肉都喺肉多過肥膏嘅貨色,煎得甘香;牛油多士脆到不得了;黑松露炒蛋夠嫩滑,又充滿黑松露嘅幽香;焦糖布甸好好食,香滑富蛋香,微微焦糖香混和椰奶,夠晒正。
bowl蜜桃鴨胸班尼迪蛋 $78
個班尼迪蛋賣相幾清爽,因為伴上唔少沙律菜,同樣淋上清甜嘅芒果汁,不過,啲沙律菜可以唔使刴得太細碎,食起嚟較為碎濕濕。而兩件班尼迪蛋以美式鬆餅做底,加入蜜桃片及煙鴨胸,味道都算夾,而驚喜位喺仲加咗啲菠菜晌鴨胸下面,口感再多層次啲;蛋面嘅荷蘭汁亦做得唔錯,但最失望喺隻蛋煮過籠,變成溏心蛋。
bowl榴槤飄香椰皇子 $56
甜品只喺點個招牌嘅椰皇子共享,因為之前已試過佢啲椰皇子,好嘢不妨再「安哥」,但就選加入榴槤嘅榴槤飄香椰皇子。榴槤果肉唔算多,亦唔算少,但濃香軟綿,面頭又見水晶珠。下層喺以椰皇水做嘅果凍,冰涼清爽,味道清甜;仲有唔好錯過椰皇內嘅果肉食,皆因清甜好食。
試咗兩款鹹點,以份全日早餐最抵食,又好味,相反,份班尼迪蛋就衰咗晌蛋黃方面,明顯可能喺水準唔夠穩定,依點需要改善吓。不過,佢哋嘅甜點始終都有番咁上下。

個人評分
味道:7/10
環境:7/10
服務:7/10
抵食:7/10
平均每人消費:HK$130

餐廳資料:
甜入心 Heart's Dessert
沙田橫壆街1-15號好運中心地下L8F號舖
2243 4868

沒有留言:

發佈留言