2017年5月26日星期五

Basilico:意菜情意結

意大利菜喺眾多菜系中頗喜愛嘅菜系之一,可能對香草情有獨鍾,有時晌屋企炒蛋或做蛋治都會加少少香草碎,所以,引伸出對常以香草入饌嘅意大利菜就討好啲。賣意大利菜嘅Basilico,自不然喺對啱胃口嘅餐廳!
餐廳位處銅鑼灣永光中心食廈,都非第一次到訪呢座食廈,預計到餐廳地方唔會太大。踏入餐廳,一字長形一眼望晒,裝修平實,木啡主調,走輕鬆路線,是夜客人唔多,所以,環境靜局。
不過,餐廳亦以酒吧定位,所以,飲品餐牌內提供多款酒精類飲品,餐酒、烈酒、啤酒、雞尾酒……等等一應俱全,可惜我同朋友都唔好酒,而非酒精飲品嘅選擇就極之少。此外,為配合酒吧嘅風格吧,中段音樂明顯加強咗好多,有嘈吵嘅感覺,想三五知己傾吓偈就唔太適合。
飲品餐牌尾頁喺一眾小食,唔使多講,就知點解啦。
主餐牌設計精美,羅列出多款美食,類別由沙律、湯品、前菜、意大利粉、意大利飯、薄餅、主菜,以至甜品,粗略估計都有超過50多款。
bowlSeared Scallops Salad $119
餐前來一客沙律,絕對喺可以開開腸胃,沙律共有7款,揀依一款炸帶子都喺隨心。
沙律底有沙律菜、火箭菜及紫洋蔥,配橙汁醋,都幾開胃,稍嫌下橄欖油重手咗啲。帶子唔算好大粒,但都稱得上爽口,外層亦炸得甘脆,趁快食,否則變腍。
bowlMix Antipasto $139
反而前菜方面,一早有打算試依個什錦意式前菜,因為百零蚊,就可以一次過試多款意式風味嘅食材,包括風乾火腿、橄欖、莎樂美腸、意大利辣肉腸、鵝肝、蒜蓉包。
不過,店員話部份食材無貨,會改以其他食材代替,其實,我哋都無乜所謂。結果,個前菜拼盤有風乾火腿、黑橄欖、青橄欖、意大利辣肉腸、意大利乾蕃茄、鮮蘑菇及蒜蓉包,但份量十足,讓我哋慢慢食,慢慢傾。
啲火腿好正,睇樣都知唔錯,有光澤,入口油潤鹹香,甚具質素。
辣肉腸一口一片,鹹鹹辣辣,夠晒惹味,如果飲酒嘅朋友就啱晒,用嚟餸啤酒一流。
小弟就最鍾意佢啲乾蕃茄,經橄欖油浸過,油香而蕃茄味濃。
不過,啲蒜蓉包個蒜味好淡口,所以,索性夾啲蘑菇、火腿、辣肉腸一齊食,過癮好味。
bowlProsciutto de Parma $159
好多意大利餐廳都會餐前供應麵包,配點油醋,不過,呢度就唔興。對我哋嚟講都無乜所謂,因為都打算點一客薄餅食。5款薄餅,都喺配巴馬火腿最合我哋心水。
批底做得薄脆,尤其啲邊位,如果烘燶少少就仲正;批面除眼見嘅巴馬火腿、火箭菜、莫沙里拉芝士外,仲塗咗層蛋漿,所以,入口細嚼慢慢你會發覺有陣陣蛋香味,當然,睇佢哋加咁多芝士,芝士嘅香氣又一定走唔甩;配搭上油潤嘅火腿,雖然整個薄餅唔花巧,卻喺好好食,鹹香細膩。
bowlUnbaked Cheesecake $119
原意喺意屬意大利芝士餅,不過,竟然喺無貨,朋友話唔食甜點感覺好似差咗啲,結果就試試依個「無焗」嘅芝士餅。
都等咗近15分鐘先上枱,原來件芝士餅喺即點即製作,再加少少藍莓及士多啤梨作點綴,賣相精簡。以消化餅乾底,配搭由馬卡風芝士打成嘅芝士餡,由於馬卡風芝士本身芝士味唔喺好濃,但就挺柔滑,加上混入雲呢嗱籽嚟做,嗒到少少雲呢嗱香!整體味道算唔錯,但就稱唔上有驚喜,再者定價小弟就覺得有少少偏高。
全店店員都喺外藉人士,但非常有禮,招呼唔錯,不時幫忙換碟、添水,故對Basilico整體感覺不俗。如果唔介紹環境有少許嘈,都喺因為啲節拍強勁嘅音樂,嚟飲吓嘢,食吓飯都唔錯嘅。

個人評分
味道:7/10
環境:7/10
服務:8/10
抵食:7/10
平均每人消費:HK$295

餐廳資料:
Basilico
銅鑼灣登龍街28號永光中心9樓
2526 6168

沒有留言:

發佈留言