2017年4月5日星期三

Bouchon Bistro Francais:美味法電機

相約一位老同學食晏,知佢食嘢一向有要求,所以都唔敢太隨便搵間,再者,中環區一放午飯,真喺多人多到不得了,要形容就好似蜂群而出。為咗同老友好好傾吓偈、食餐飯,就專登行上少少揀咗較靜局位處蘇豪區嘅法式小館「Bouchon Bistro Francais」。
雖然諗住蘇豪呢邊會人少啲,但估唔到午市嚟到Bouchon客人已唔少,不過,斯文客多,所以,都唔好嘈吵。正好餐廳嘅定位「法式小館」(Bistro), 環境非常古風雅致,近門口嘅酒吧區故然搶眼,但餐廳內嘅一枱一木,牆上嘅掛畫、古鐘、裝飾,都令到整個環境瀰漫一派古典氣息。
較吸引小弟嘅,喺天花一組嘅古典吊扇,靠幾組滑輪加上索帶,來驅動吊扇,夠經典,又有趣。
全店都喺以高腳酒吧式枱櫈為主,但餐廳尾有幾組梳化椅(都喺高腳),小弟覺得喺好坐舒服嘅最佳位置。
午市主打嘅套餐分為兩道菜($138)或三道菜($158),另加一服務費,每一環都有數款選擇,只喺部份菜式需要另行加錢,如法式洋蔥湯。大家都喺好甜品之人,就唔介意俾多$20食埋件甜點啦!
bowl百吉包籃
平常我哋稱百吉包叫長法包,不過,今次嘅法包唔可以稱上長喇,喺一般嘅長法包1/3長度,但兩個人夠晒食啦。好鍾意佢哋加張紙墊住個籃,又將啲牛油加張蠟紙隔一隔,讓人感覺更衞生。
法包喺熱烘烘,外皮硬得嚟唔會咬到損,非常脆口有麵粉香,而裡面軟綿綿好軟熟,卻又有重煙韌感,搽啲牛油,增加少許鹹味,簡單好食。
bowlSoupe a L’Oignon(+$18)
嚟到法式菜館,老友話唔飲過法式洋蔥湯就好似無嚟過,可能咁講會誇張啲,但洋蔥湯又確喺法式經典。賣相已經好對辧,以小鐵窩盛載滿滿嘅洋蔥湯,一揭起面頭塊艾文頓芝士,洋蔥香氣就一湧而出,一大片厚厚嘅百吉包吸透湯汁,夾雜芝士一齊食,朋友話喺滋味嘅享受;再者,洋蔥味很濃郁,帶甜而完全無澀味,令人喜出望外。
bowlSalade de Figues Rôties
雖然唔識法文,但每道菜都有所用食材嘅英文名稱,依道以烤無花果、羊奶芝士、合桃,配上沙律菜、青瓜粒、車厘茄非常清新,而且,份量可不少。整體味道好又元化,多變而和諧,鹹甜相互平衡,而撈沙律菜嘅紅酒醋加咗蜜糖,酸度平衡番,感覺就更好食。
bowlChicken Leg
主菜方面5揀1,老友揀烤法國雞脾,聽落食雞脾好似無乜特別,其實主要食食材質素。雞脾烤得金黃,外皮脆卜卜,肉嫩而富雞肉味,唔喺嗰啲雪到死晒可相比,而啲法式香草牛油(Café de Paris Butter)溶溶哋滲落雞皮、雞肉中,令味道就變化得更為芳香;底下墊滿法式綠扁豆(Puy Lentils),口感腍腍,有啲似煲腍咗嘅綠豆咁。
bowlSteak Frites
幾款主菜,都喺牛扒最滿足到我依個食似獸,甫上枱,份牛扒份量十足,應該唔止慣常嘅8安士吧!牛扒煎得焦香並帶有坑紋,睇外觀已引得人流晒口水,伴菜有大量幼身薯條及炒洋蔥,前者甘香脆口,重點喺唔油,後者則炒至清甜。
小弟要五分熟,落刀嗰吓手感真喺一流,感受到啲肉質既軟腍,又富彈力,睇睇啲肉嘅橫切面,色澤嫩紅、紋理清晰,一啲血水都無,足證大廚晌火喉上拿捏準繩。小試一口,實在妙不可言,因為外皮焦脆、口感軟腍、肉味濃郁、又富肉汁,食到尾都食唔到有筋,伴點自家調製嘅法式牛油蛋黃醬(Bearnaise),香滑帶微酸,有少少似荷蘭汁,總之就精彩滋味。
bowlTarte du Jour
如果得啲法文字真喺唔知喺乜,其實喺是日撻品,不過,與其稱之為「撻」,喺是日蛋糕啱啲。之但喺,件香梨蛋糕仍屬高水準之作,下層海綿蛋糕好鬆軟,上層香梨蓉好清甜,伴以鮮打忌廉及紅桑莓,賣相清新怡人。
bowlMousse Au Chocolat
老友則點選朱古力慕絲,小弟滔一小羹試試,已經食得出朱古力味夠晒香濃,而且,啲慕絲做得細滑輕盈,仲好手工一層層咁由底唧上去,比起填滿式做法更見心思,賣相更靚仔。此外,仲加埋少少海鹽焦糖漿、紅桑莓,令味道更豐富。
試過Bouchon嘅午餐,質素確喺高水準,用料無欺場,怪唔之得位置咁吊腳都有咁多人嚟幫襯食晏,再者,甚有法國小館子嘅氣氛,值得嚟食餐好嘅!

個人評分
味道:9/10
環境:8/10
服務:8/10
抵食:8/10
平均每人消費:HK$185

餐廳資料:
Bouchon Bistro Francais
中環蘇豪伊利近街49號地下
2525 9300

沒有留言:

發佈留言