2017年3月30日星期四

Tartes & Pop:脆味手工撻

本身一向嗜甜,單單只喺講甜品中嘅撻類,已經喺無限大,唔同國家、唔同地區都有自已地道嘅出品,香港有蛋撻,澳門有葡撻……,當然唔少得法式嘅甜撻,上環嘅Tartes & Pop喺其中一家做得出色嘅小店。
白與橙喺店家嘅主調,店內裝修簡單俐落,置身裡面有種好醒神嘅感覺。有一邊牆身掛滿唔少外國歌星、名人嘅親筆簽名,足證有一定嘅支持度。
走近餅櫃瞄一瞄,櫃內共有9款選擇,款款單價只賣$45,以質素而言,絕對物超所值。店主簡單介紹除有6-8款恆常嘅主打款式外,亦不時加入新款,標示黑色名牌嘅就喺新品。由於全部甜點都喺鋪後工場新鮮即做,個別款式差唔多賣完,餅廚再做補貨,所以,保證所有出品都夠「新鮮」。
除「新鮮」以外,佢哋嘅所有出品都用料講究,食材更有不少喺法國貨,當原產地嘅靚貨,睇見晌收銀旁嘅「宇治抹茶証明書」,喺咪有種好俾你信心十足嘅感覺呢?
曾經試過佢哋嘅香橙伯爵茶撻(Orange Earl Grey)、蘋果焦糖撻(Apple Caramel)、檸檬榛子朱古力撻(Lemon Gianduja)及黑芝麻抹茶撻(Sesame Matcha),雖然佢哋啲甜撻晌賣相上甚少搞咩花巧嘢,但全屬高水準之作,今回自不然打算試試其他口味,一口氣就試咗其中3款。
bowl花生香蕉撻(Peanuts Banana)$45
店內嘅出品分為兩種撻底,一種喺厚身,只有底層,另一種喺薄身,圍晒邊,依一件花生香蕉撻就屬於前者,雖然喺「厚底」,但仍然好鬆化,甚有牛油香。餡心有一層淺啡嘅花生蓉,入口好濃香嘅花生味;而包圍住外層喺雪白嘅香蕉慕絲,再晌花生蓉之上加多一層香蕉果肉,口感柔滑就唔在講,清甜嘅香蕉味十分突出,高水準依然不變。
bowl法式咖啡忌廉布丁撻(Coffee Crème Brûlée)$45
咖啡、焦糖依類味道向來喺小弟嘅心水,所以,依一件法式咖啡忌廉布丁撻早已睇上眼。撻底採用另一種薄身圍晒邊嘅,入口甘金脆口,再向撻殼上加一超薄層海綿蛋糕,再注滿忌廉布丁,布丁既滑溜,又富奶香;去到面層,做咗一層軟滑嘅咖啡焦糖,有別常見法式燉蛋嘅脆焦糖,但咖啡香中滲出焦糖味,一口過由上而下咬落去,口感、味道都層次分明,實在出色。
bowl新鮮青檸撻(Fresh Lime)$45
再嚟另一件薄底嘅新鮮青檸撻,以白朱古力及青檸作為主題,撻殼內塗咗一層白朱古力,喺做撻嘅慣常工序,以防止撻殼被其他濕潤嘅食材潮化。餡心雪白嘅青檸泡沫酸香細緻,非常清新,而白朱古力慕絲做得幼滑而少甜,跟青檸十分合拍,作為最後先品嚐嘅甜點,清新嘅青檸香確有一種中和、平衡嘅作用。
事隔年多再食佢哋嘅法式甜撻,唔單止水準無令人失望,定價都仲喺無變,絕對喺好值得繼續支持嘅撻品小店。

個人評分
味道:9/10
環境:7/10
服務:9/10
抵食:8/10
平均每人消費:HK$45(試食邀請)

餐廳資料:
Tartes & Pop
上環摩利臣街2號地舖
6597 6667

沒有留言:

發佈留言