功德林上海素食 Kung Tak Lam Shanghai Vegetarian Cuisine：健康德力素

細個嘅時候，有種葡萄糖沖劑叫「得力素」，嗰陣時大行其道，依家好似已經唔見咗，連得力素糖都無埋，不過目前健康產品五花百門，「得力素」個名應該唔喺咁多人識，尤其後生一輩。但講到健康產品，與其靠依等藥物，就不如先晌飲食方面着手，哈哈！講健康飲食，小弟就唔及老婆，佢食素都多年，雖然唔喺全素，但白肉以外，紅肉就極少食，除自家煮之外，亦不時幫襯素菜館。尖沙咀嘅功德林算喺經常光顧嘅食肆，因為以前佢晌依頭返工，反而，小弟就第一次嚟，故此，平時一向由我點菜，今次就得佢出手。

北京道一號嘅食肆，賣點其一就喺靚景，嚟到功德林同樣單邊落地大玻璃窗面向維港，鳥瞰整個1881，感覺相當唔錯，只可惜今日天色灰懞懞。

而餐廳環境亦舒適寫意，除咗地方寬敞，樓底高，亦無話好似一般中式食肆咁逼夾，一室以青綠色為主調，加上自然光（當然有啲陽光就更好），讓人感覺清爽。此外，唔似啲齋鋪咁滿天神佛，又「煩」（梵）音不斷，亦喺佢多嚟光顧嘅原因之一。

安頓好先點一壺鐵觀音，順帶一提，茗茶每位收$15/位，小食就收$12碟，喺紫菜花生，紫菜磨碎混和啲花生，面面黐滿糖粒，鹹鹹甜甜又香脆。

打開餐牌，內頁第一版就喺餐廳嘅介紹，原來，不經不覺功德林晌香港紮根都超過30年，作為健康啲素食店，不加味精、不含色素、少監鹽少油近乎指定動作。此外，過往多年，更贏取唔少本地及國際榮譽，質素自然有一定嘅水平。

再翻翻餐牌，由前菜冷盤、滋補燉湯 / 羹、特色名菜、香辣系列、蔬菜 / 菇類、暖胃鍋物、鍋巴、飯、年糕、一品素麵、點心到甜品，一應俱全，睇吓、數吓，食物近百款。

尾頁仲有飲品一欄，唔少新鮮果汁、健康嘅蔬菜果汁供客人選擇。

功德林三拼盤 $158

雖然餐牌嘅圖片喺脆皮素鵝、綠豆糕、無錫脆鱔，但原來哋可以轉款，老婆就推介我試吓佢哋啲上海烤夫，話非常好食，既然佢喺常客，就梗聽佢話啦，結果我哋嘅三拼喺脆皮素鵝、上海烤夫、無錫脆鱔。

脆皮素鵝

果然脆皮，脆得嚟好香口，香口得嚟又唔油，富豆香，裡面包住好多冬菇絲、甘荀絲、木耳絲，好有咬口，蘸點醋，感覺更酸香去膩。

上海烤夫

啲烤夫吸滿鹹鹹甜甜嘅醬汁，入口綿柔，又帶點根性；更伴有花菇片、木耳及毛豆，整體嚟講，真喺唔錯喎。

無錫脆鱔

搵冬菇做嘅脆鱔賣相幾可亂真，當然，小弟就喜歡食真嘅脆鱔，不過，依道「偽鱔」又OK喎，咬落脆卜卜，每條都掛滿甜酸汁，酸香味十足。

蘿蔔絲酥卷 $35

講到上海點心，蘿蔔絲酥卷喺小弟心水之一，無他嘅，香口嘢喺自然易討人喜心，個酥皮又考手功。而功德林嘅蘿蔔絲酥卷做得上乘，酥皮紋理清晰好酥化，完全無油膩感，內裡嘅蘿蔔絲熱辣辣，又清甜，更混入少許冬菇絲增加口感添。

蘑菇包 $32

近年晌素食店好流行嘅一款中式包點，就算唔喺素食店，有賣點心嘅地方都見到佢蹤影。外觀唔多講，因為普遍間間都做得維肖維妙，大多數似冬菇，呢個菇紋無咁深，色偏淺，似蘑菇多一點，所以，理所當然叫番蘑菇包。咬開內有唔少雜菌，包身質感好鬆軟，又唔黏牙。

牛肝菌菠菜生煎包 $48

豬肉做嘅生煎包食唔少，素嘅生煎包就應該喺第一次喇，牛肝菌配菠菜效果不俗，既有菌香，菠菜刴得細碎，口感細緻，配合鬆軟包身，掂喎！

砂鍋獅子頭 $118

從餐牌所見，喺店家嘅特色名菜，經理亦推薦我哋試吓，而老婆亦話無試過依道菜，就一於見吓佢真章。餐牌已列明獅子頭喺以頭菇、素肉、馬蹄及素翅製成，配以素上湯煮製，黝黑嘅獅子頭口感鬆化，非常足料，個人覺得精彩位喺加咗啲素翅，鬆化嘅「肉感」添加咗啲爽口嘅口感。伴有黃芽白、冬菇及小棠菜，配合砂鍋上，保持住滾熱辣，確喺招牌菜。

埋單時，經理仲介紹佢哋推出咗啲「優惠自選午餐」，分4人及6人餐，最難得個價已包晒茶芥及加一，可惜，只限星期一至五（公眾假期不適），不過，啱晒老婆約朋友出嚟食晏。

正所謂創業難，守業就更難，做素菜嘅就更唔容易，香港老字號食店賣少見少，功德林30多年仲屹立不倒，重點都喺要靠菜餚做得好，招呼又恰到！

個人評分
味道：8/10
環境：8/10
服務：8/10
抵食：8/10
平均每人消費：HK$230

餐廳資料：
功德林上海素食 Kung Tak Lam Shanghai Vegetarian Cuisine
尖沙咀北京道1號7樓
2312 7800