靠窗一邊落地玻璃喺個人覺得嘅心水位，因為光線足，感覺開揚，又可以睇吓彌敦道的街景。
講明食晏就梗喺睇午餐有咩食，午市套餐包是日餐湯及蒜蓉法包，主菜8揀1，定價由$58-$128 + 10%，仲包一杯$34飲品，$34以上就只需補回差價就可以。
甘筍忌廉湯
是日餐湯喺甘筍忌廉湯，色澤幾鮮橙色，但味道就唔算好突出，始終甘筍唔喺強悍嘅味道，但口感算幼滑，又夠熱辣辣，試過有啲餐湯只喺得微暖咋，好影響個感覺。
蒜蓉法包
烘得香脆，又重蒜蓉香，交足貨。
扒大蝦墨魚汁意大利粉 $78
賣相做得唔錯，不過，得一件扒大蝦感覺都喺無夠睇頭，但蝦肉幾爽，肉質帶點鮮味；而啲魚汁意大利粉有別常見咁「烏卒卒」，反而食得出啲意粉搵蒜蓉炒過，質感咬口，又有好多菇菌。
香烤雞扒南瓜意大利飯 $88
哈哈，初頭以為喺嚟錯客煎蛋餅，因為啲意大利飯平鋪，又煮得金黃，兼烘過少少。講到啲飯幾對辦，咬落煙韌，飯內有菇菌粒同翠玉瓜粒，南瓜味唔明顯，但芝士味好濃，覺得用上兩種芝士，車打及莫沙厘拉，前者令飯粒色澤帶橙，而且好濃芝士香，後者令飯粒拉到少少芝士絲，飯面再焗一焗，又帶微微焦香，做法有啲心思。雞扒都唔錯，至少唔嚡先啦，份量又的確多，抵食。
美國安格斯西冷牛扒﹒黑椒汁伴意粉 $128
客西冷友人要求7乘，但嚟到切開就似乎5乘多少少，幸好友人都接受到。件牛扒煎得焦香，肉質入口軟腍，有肉味，又富肉汁，伴上惹味嘅黑椒汁，算做得有水準。
餐飲包一杯$34飲品，依個價只喺包幾款熱茶，不過，餐飲與其揀普通啡茶，就不如加少少飲好啲。
榛子鮮奶咖啡 +$12
杯榛子鮮奶咖啡明顯拉花衰咗，還好味道都唔太差，口感順滑，榛子味都幾突出。
焦糖鮮奶咖啡 +$12
小弟杯焦糖鮮奶咖啡雖然拉花花紋未臻細緻，但都叫做拉得靚仔啲，個人覺得明顯喺打奶泡未熱透唔夠起，唔夠厚身就承唔起啲濃縮咖啡，手勢欠成熟，猶幸咖啡粉本身唔太差，味醇入口帶微苦。
青檸梳打 +$12
簡簡單單新鮮青檸汁加梳打，唔太酸，透心涼，依個最啱配個意大利飯，因為個飯比較濃味同「漏」，青檸梳打就可以中和一下。
外間天氣好，食嘢嘅心情都會好啲，加上同兩位老友吹吓水，啱傾啱講，食吓嘢，自然餐飯食得更暢快。
個人評分
味道：8/10
環境：7/10
服務：8/10
抵食：8/10
平均每人消費：HK$120
環境：7/10
服務：8/10
抵食：8/10
平均每人消費：HK$120
餐廳資料：
Plato Cafe & Bistro
油麻地彌敦道483-485號2樓
3426 2700
Plato Cafe & Bistro
油麻地彌敦道483-485號2樓
3426 2700
沒有留言:
發佈留言