2017年1月16日星期一

龍島美食店 Lucullus:公朱同好(17)

好耐無寫過朱古力系列食評,一來有啲朱古力小禮物無得寫,唔通收盒金莎都寫一大篇咩,二來有時喺朋友買嚟一大棚人一齊分享,咁就唔太方便影相、寫食評。最近過年前就收到朋友嘅大禮,龍島朱古力嘅「雞年賀歲朱古力及曲奇禮盒」,紅底金線年花包裝盒,連埋金絲帶,一片喜氣洋洋嘅感覺,送禮真喺非常得體。
禮盒內包括10款朱古力,粒粒都唔同,立體造型並有唔少款式喺同賀年相關,此外,亦有10片曲奇,共5款口味,全獨立包裝,衛生方便。怕你收到盒禮盒唔知咩味打咩味,一大張示意圖就清楚不過。
右邊喺朱古力,粒粒的骰,但造型別緻,10款口味包括番石榴軟心朱古力、榛子奇脆牛奶朱古力、杏仁糖碎純黑朱古力、福雞報喜榛子脆米純朱古力、福字牛奶軟心朱古力、富貴大吉橘味朱古力、大吉蘋果軟糖純朱古力、桃花黑加侖子朱古力、四兄弟原粒榛子純朱古力、威士忌酒心朱古力。小弟只試咗其中部份款式。
bowl番石榴軟心朱古力
外層嘅朱古力殼做得夠薄,一口好脆口,內餡嘅番石榴軟心既柔滑,又帶有好出嘅番石榴味,真喺好食。
bowl福雞報喜榛子脆米純朱古力
外形就自然最應節,呆呆嘅雞樣內裡喺榛子、脆米、純朱古力嘅組合,食落非常有口感。
bowl福字牛奶軟心朱古力
依一粒除咗心朱古力面做咗個福字,其實,就唔算好特別,中間嘅軟心亦無番石榴嘅軟心咁滑。
bowl富貴大吉橘味朱古力
除咗外形做成大吉之外,唔止有姿勢,仲好實際,中間嘅橙味朱古力好突出,真喺講得好有橙香。
bowl大吉蘋果軟糖純朱古力
跟以上幾粒,依一粒做法又有少少唔同,中心都喺純朱古力,而蘋果味喺嚟自中間粒軟糖,煙煙韌韌,又幾好食。
bowl桃花黑加侖子朱古力
跟富貴大吉橘味朱古力差唔多,除咗外形有少少別緻之外,味道上黑加侖子味香甜突出。
bowl四兄弟原粒榛子純朱古力
比較難切開,就一啖放入口,薄薄嘅純朱古力外殼下包住香脆嘅原粒榛子,簡單而好食。
而左邊一排喺曲奇, 5款口味分別喺金元寶原味曲奇、紫薯曲奇、士多啤梨雲石曲奇、朱古力糖薑曲奇、亞麻籽曲奇,因為每款口味有2片,所以,全部口味都試一片。
bowl金元寶原味曲奇
原味嘅牛油曲奇,雖然牛油味唔算好犀利,但口感好鬆脆。
bowl紫薯曲奇
一身紫衣,不過,無期待中咁有紫薯味,嚟得比較淡淡嘅紫薯而已。
bowl士多啤梨雲石曲奇
5塊曲奇中,最靚就喺依一塊,做成雲石紋,味道帶少少士多啤梨香味,味道唔錯。
bowl朱古力糖薑曲奇
咁多款,最得歡心要數依一塊,因為既有濃郁朱古力味,薑味又夠突出,個性最鮮明。
bowl亞麻籽曲奇
曲奇內混有好多亞麻籽,咬落質感就更加鬆脆有口感。
以往食過好幾次龍島嘅朱古力,都知有一定嘅質素,今次應該喺第一次食佢啲曲奇,估唔到同樣有水準,再次多謝朋友嘅餽贈。

個人評分
味道:8/10
環境:- /10
服務:- /10
抵食:- /10
平均每人消費:HK$0(朋友送贈)

餐廳資料:
龍島美食店 Lucullus
葵芳興芳路223號新都會廣場L3層358A號舖
2426 2121

沒有留言:

發佈留言