2017年1月3日星期二

Les Saveurs Private Kitchen:法人深省

新一年,又喺同啲食友聚一聚嘅時候,幾位老友嚟過Les Saveurs食晏,知道佢哋啲質素甚高。晚市就未到訪過,就一於嚐嚐佢哋晚市嘅手勢,兼友情共聚法菜夜。講到食法國菜,小弟經驗唔多,但知道法國菜用料夠精選,烹調如藝術,可讓人有發人深省嘅感覺,所以,落足力慢慢細嚐箇中真味。
既然餐廳名字帶有Private Kitchen,當然有別一般法國菜餐廳。先講環境,以私隱度為賣點,整間餐廳間開為多組房間,絕對唔怕受其他客人騷擾。再者,房間佈置簡潔而幽雅,又不失氣氛,更可以遠眺維港夜景,睇煙花一流,但就相信定價更高。
食物選擇,主打一個7道菜嘅晚餐,餐前小點、3個前菜、1道湯品、主菜3揀1,再加1份甜點,定價$788,另收加一服務費,主菜揀牛肉需另補$88。當然以普羅大眾食餐飯近成千銀,絕對喺唔便宜嘅一餐,但以一餐高質素嘅法國菜而言,應該喺物有所值。
bowlFrench Bread
人齊又未正式上菜,最好食啲麵包嚟打發吓時間,以小木盒盛咗嘅都喺法式麵包:牛角酥、百吉包,前者酥香富牛油味,後者外脆內軟,搽點自家製軟滑嘅牛油,感覺已好唔錯。
bowlL'Amuse Bouche
小巧細細杯嘅餐前小點究竟喺乜,侍應話會次次都唔同,而今晚嘅喺椰菜花忌廉配炸櫻花蝦、海膽及龍蝦油,單睇依個組合名單就覺得大廚好有心思,極期待,賣相又好精緻。椰菜花忌廉口感好柔滑,估唔到椰菜花味咁出,加埋啲海膽及龍蝦油,味道好融和,炸櫻花蝦帶出點點脆脆感好有驚喜。
上文都講過有3道前菜加一款湯品,單睇菜名,款款都好吸引,又富創意,全都喺叫人引徑以待嘅菜式。
bowlPoached Blue Lobster
第一道前菜就嚟道藍龍,都咪話唔落重本,但作為前菜,無理由俾隻龍蝦過你架,賣相唔喺震撼,卻精緻漂亮。主題龍蝦肉配牛油果、松露片,都喺精貴嘅食材,藍龍好爽,味道夾而多層次;棗紅色口嘅喺鰲蝦啫喱,暖暖哋,好蝦味,感覺好得意;伴碟嘅生菜沾沾奶黃色嘅檸檬乳酪醬,都可以講喺有神來之筆嘅感覺。
bowlFresh Smoked Salmon
第二道前菜,以玻璃蓋冚住,玻璃內瀰漫嘅煙霧為大家賣少少關子,侍應話需要等兩分鐘先可揭盅,喺要讓煙燻嘅效果突出啲,而一打開,煙燻三文配黑魚籽華麗登場。睇菜名知道三文魚喺以42°C慢煮,所以,三文色澤鮮明油潤,柔滑到不得了,頗有煙燻香,加上黑魚籽,集鹹香鮮;所配嘅醬汁喺紅菜頭蓉及以分子啫喱去處理嘅蘋果辣根汁,前者好有紅菜頭味,後者出奇咁清新喎。
bowlCream of Watercress Soup
食咗個小食加兩道前菜,喺時候飲個湯,是晚嘅餐湯喺西洋菜,但西式做法就肯定喺第一次試,大廚都真喺有膽色搵西洋菜做西湯,仲鬼馬到以茶壺嚟倒出墨綠色嘅餐湯。估唔到西洋菜做西湯都掂喎,打得好溶,又隔渣隔得清,所以,質感非常滑溜,西洋菜味強勁。倒完湯,第一時間要食喺嗰兩片脆餅,因為仲喺脆口,且富牛油香;而黑毛豬火腿鹹鹹香香,象拔蚌仔柔韌有咬口,整個湯都滿有驚喜!
bowlPoached and Pan Fried Foie Gras with Malibu
以餐湯潤一潤個喉嚨,接住就上第三道前菜,以為喺普普通通嘅一道煎鵝肝,卻喺繼續一道精彩接另一道精彩,而精彩在於啲細節位。鵝肝大件厚切,口感好嫩滑,外層帶點焦脆,又甘香,加咗椰子酒煮,有點點椰子味,仲伴啲香脆炸椰子片及甜甜酸酸嘅焦糖化菠蘿,令食味唔單一,而鵝肝上有啲分子葡萄醋珠珠,微微酸,有中和鵝肝油膩之效。
bowlYuzu Sorbet
過場嘅小清新就喺一小羹柚子雪葩,好強勁柚子味,帶有少少柚子皮,酸酸甜甜好清爽。
嚐過雪葩,等無耐就輪到主菜,是晚嘅主菜共有3款,包括豬頸肉拼豬頰肉、美國頂級肉眼及是日精選魚鮮。
bowlSous Vide Iberico Pork Collar, Braised Pork Cheek
延續法國菜講求賣相精細,一道豬頸肉拼豬頰肉同樣做得細緻,採用西班牙黑毛豬火腿已經喺質素嘅保證,前者以香煎處理,超脆口,又有肉香,襯個芥辣忌廉汁,正呀;後者則以炆燉方式處理,既腍又鬆化。伴菜亦唔喺大路貨色嘅喺薯菜,當中嘅紫薯蓉做得好幼滑。
bowlPrime USDA Ribeye
見到「肉眼」,不其然就會諗住成件扒咁款,法國菜又點會做得咁粗,再者,之前已經嚐過多道前菜,依家個份量就啱啱好。賣相跟上面個豬頸肉有幾分相似,不過,經過炭燻加慢烤,再煎到五乘熟,色澤嫩紅,落刀嗰下已知好軟腍,入口肉質果真好柔嫩,外層有炭火香味。依碟嘅伴菜同樣有啲精彩位,椰菜花三重湊,椰菜花做出3種唔同口感,原粒烤蒜燒到化透,好香軟。
bowlFish of the Day
侍應每上一道菜,都有詳細介紹,而是日魚鮮就喺嚟自日本嘅金鯛魚,亦喺店中嘅招牌菜之一,半煎炸方式令金鯛魚嘅魚鱗泛起,令賣相別樹一格,入口亦脆卜卜,至於魚肉,鮮嫩至極,佐以龍蝦泡沫,怪唔之得友人超讚!
bowlGreen Tea Mills Feuille
最後一道經典法式甜品綠茶千層酥登場,可以講喺完美作結,千層酥酥脆富牛油香,而中間嘅綠茶慕絲,綠茶味突出,甘苦而柔滑。雖然餐牌寫住柑橘沙律及雪葩,但依家改為鮮什莓及雲呢嗱雪糕,一樣唔錯,尤其啲雪糕睇到粒粒香雲呢嗱籽,雲呢嗱味嚟得天然芳香。
或者食晚餐你會覺得花費貴,尤其女生又可能怕食唔晒,所以,不妨星期六、日嚟食個高質素嘅法式午餐,3道菜$198 + 10%,4道菜$238 + 10%,小弟覺得絕對超值。

個人評分
味道:9/10
環境:9/10
服務:9/10
抵食:8/10
平均每人消費:HK$820

餐廳資料:
Les Saveurs Private Kitchen
銅鑼灣告士打道229-230號宇宙商業大廈10樓
2116 8883

沒有留言:

發佈留言