仙桃源 Fairy Farm：我的星期六美孚早餐 ~ 難桃厄運？

晌屋苑附近嘅盈暉薈商場，裡面有數間食肆，但一般都喺做唔長，正所謂一雞死，就一雞鳴，新加入一員喺賣台式食品嘅「仙桃源」。其實，幾個月前佢開檔之初，夜晚即興嚟食個粉麵，但服務極度混亂。今早又約咗老友行山，所以，兩公婆走過嚟幫襯佢早餐先出發。

雖然話喺賣台式嘢，但環境跟一般茶記無異，大部分座位以卡位為主，橙色主調睇落就令人醒神。

既然嚟食早餐，其他嘢就唔多介紹，A4紙一頁有咩早餐選擇，一眼睇晒。早晨全餐、西式早餐、粉麵餐、三文治餐、吐司餐……都哋嗰啲啦，例包熱飲一杯，選擇唔算多，亦有欠特色。

早晨全餐 $32

餸料5揀2配牛油方包，揀咗餐肉及紅腸，除咗用料普通、縮水之外，「迤」絕對最啱形容佢哋做菜嘅心態。餐肉唔喺白豬仔牌，並只得半片，而紅腸就貪其快手落油炸，最慘喺隔一隔油都懶，明顯見到啲紅腸兜起攤油。仲要迤啲就喺片方包，點迤？唔講，睇相！

沙嗲牛肉公仔麵

個麵反而正常啲，雖然唔喺出前一丁（+$3可轉），但食得出喺好過大光麵，問店員，卻喺答唔出咩牌子，哈哈！而個沙嗲汁幾好，頗香，但牛肉得好少，又碎濕濕得幾炷仔。

雙拼粉麵餐 $25

餸料共有11款，老婆揀咗冬菇、菜心兩款素菜拼上海麵嘅組合，佢話啲冬菇幾香幾好食，但就細粒啲無咁肉地，菜心新鮮唔似擺成晚嘅貨色，麵條柔韌有咬口，比預期好，湯頭就只喺普通嘅清湯。

台式咖啡、熱檸水

餐飲較一般茶記多選擇，因為多咗啲台式飲品，而小弟都揀杯台式咖啡試試，問我跟港式咖啡有咩分別，其實小弟都唔喺好分得出，感覺眼前杯咖啡偏向多奶，但入口仍然醇香不俗。

雖然餐肉、紅腸、牛油方包製作求其，但未至於難食，所以，整體都算勉強OK嘅！盈暉薈喺一個無咩好嘢食嘅商場，開一間就執一間，但執一間又開番一間，然而，以今早晌度食早餐，加埋之前食粉麵嘅經驗，對仙桃源着實唔睇好，但會唔會難逃厄運又做唔長，只有拭目以待。行入少少，之前一心主打搞婚宴嘅百樂門宴會廳，晌度都做唔住，靜俏俏咁轉為同集團嘅鳳城皇宴，打着「鳳城」招牌（雖然同老店鳳城有別），已經訂咗枱同朋友嚟食團年飯，到時又睇睇質素如何！

個人評分
味道：5/10
環境：6/10
服務：7/10
抵食：6/10
平均每人消費：HK$29

餐廳資料：
仙桃源 Fairy Farm
美孚景茘徑8號盈暉薈1樓116A號舖
3520 1088