2016年12月19日星期一

心の食堂 Love Cafe:心不可測

老婆卒之考完試,雖然仲有份功課要做,但月尾先到死期,所以,趁個空檔同佢食餐好好哋嚟慶祝一下。日本嘢佢都好耐無試,故走咗嚟心の食堂,貪有八折優惠,哈哈。
門面牆上畫咗好多櫻花,所以,一上到12樓就好易認。不過,初以為店家起名叫「食堂」應該內裡環境好有日式食堂感,但裝修卻頗摩登,有啲銅喉做裝飾,又掛上兩部單車,雖整體欠缺和風嘅感覺,但還是舒適好坐。
枱上嘅擺設唔多,一隻小豬杯杯,用作擺紙巾及牙簽,倒幾得意。
深啡色瓷餐具,印有少少櫻花圖案,算喺店內較帶有日式元素嘅嘢。
餐牌簡簡單單就印晒落一小張餐單紙上,類別分為創作壽司、刺身、燒物、炸物、主食及一品料理。不過,點菜卡有另一套,依家睇番先發覺點菜卡嘅選擇喺多少少,好似我哋點嘅魚生丼晌餐牌紙喺無嘅。
bowl心の創作壽司(知心好友系列)$88
創作壽司有祝福戀愛及知心好友兩個系列,以多樣化食材所組成,喺店家嘅招牌,我哋就揀後者,出嚟嘅賣相確喺幾靚幾有特色。
bowl歡聚
喺以蟹柳、青瓜、牛油果、甜蝦及蟹籽所組成,甜蝦喺比較最主體嘅食材,蝦肉鮮甜爽口;而其他食材就捲入壽司飯內,外層黐滿蟹籽,故口感都豐富多變,因此取名歡聚?
bowl刺激
刺激嘅元素在於用上自家調製嘅日式辣汁沙律醬,藏於壽司內,一陣陣辛辣卻點到即止。其他食材包括主體嘅吞拿魚及配角嘅蘆筍同京蔥,味道無上面「歡聚」嘅咗複雜,但吞拿魚細嫩鮮味,依然喺一件頗有水準嘅壽司。
bowl豐盛
用上碎吞拿魚腩、蟹膏、海膽應可以跟豐盛連上關係,再加埋洋蔥粒及芥末沙律醬,聽起嚟都吸引。一啖過放入口,油潤香濃盤旋於口腔,確喺滋味無窮。
bowl海膽蟹味噌燒皇帝蟹腳 $138
分大份$138及細份$98兩款份量,就算好似我哋點大份都喺平常所見嘅皇帝蟹腳,唔會話超大條。最好喺一開三,又去走而殼,方便食用,雖則蟹肉鮮甜,但海膽味較薄,味噌味稍為搶。
雖然老婆一向食嘢都講健康,不過,偶爾都會陪我食吓炸嘢過口癮。炸物只有7款選擇,紫薯喺佢心水,所以,一眼相中紫薯甘粟餅,我就想試試個蟹肉忌廉餅。
bowl蟹肉忌廉餅 $33
忌廉餅炸得一身金黃,餅身炸得香脆可口,一啲都唔油,炸功了得;但餅內以忌廉醬為主,好香滑,富奶油香味,不過蟹肉就唔喺好多,別期望會啖啖蟹肉咁樣。
bowl紫薯甘粟餅 $28
我見張點菜紙賣$33,但睇番張單實收$28,平咗?點都好,喺好值得推介嘅炸物,原因有三,第一,同蟹肉忌廉餅一樣,香脆不膩,第二, 紫薯蓉軟滑充滿紫薯味,第三,大大粒甘栗夠晒粉甜,老婆至鍾意。題外話,既然有大大粒甘栗在內,菜名應該錯打「栗」為「粟」,初時真喺以為裡面加有粟米粒架。
bowl三文魚茶漬飯 $38
雖然只喺茶漬飯,但諗住只買38蚊,只喺一小碗仔,但嚟到嘅份量比預期大碗,所以加埋另一碗魚生丼,飽到上心口。講番個茶漬飯,清清哋配少少三文魚,飯粒軟熟,都幾好食。
bowl香味切角魚生飯 $88
嚟之前已打算食魚生丼,因為,6月尾去完一轉北海道,真喺超回味當地啲魚生丼。魚生有三文、吞拿、油甘、劍魚,全部都新鮮鮮甜,亮點就喺食落好魚生多過飯咁,只喺賣$88,超抵食。
bowl日式炒雜菜 $48
老婆依家食素同加少少白肉,所以,專登加碟炒野菜,主要喺椰菜、洋蔥、甘筍炒埋一碟,加咗點點黑椒,唔叫得特別,但頗惹味。
餐廳取名食堂,當然以小店唔死板嘅作風做事,故聽店員講,菜式上可以為客人略作調查,務求讓客人感受到佢哋唔單用心製作食物,亦用心招呼每位客人,或者可能真喺間深不可測嘅日式食堂。

個人評分
味道:8/10
環境:7/10
服務:8/10
抵食:8/10
平均每人消費:HK$200

餐廳資料:
心の食堂 Love Cafe
銅鑼灣耀華街3號百樂中心12樓1203室
2321 1880

沒有留言:

發佈留言