2016年12月20日星期二

JL Cafe.Kitchen:清風送爽

表姨甥女卒之考晒試,所以,專登搵佢食番餐,知佢喜歡花茶,又喜歡窩夫,遷就番佢晌港島依邊放學,所以,揀咗幾間心水,最後選址位於清風街嘅JL Cafe. Kitchen,睇過友人嘅食評,貪佢地方夠大夠闊落。
踏進店內,環境真喺唔錯,非常寬敞,白磚牆配原木餐枱,簡約嘅佈置,卻又有唔少心思嘅配搭擺設。日頭嚟,陽光透過落地大玻璃映入嚟,應該幾有小清新嘅感覺,而晚上嚟到,利用壁燈,令餐廳顯得有氣氛,再者今晚人客唔太多,感覺更感恬靜閒適。
餐牌分兩本,深啡色喺晚餐及所有散點菜式,包括前菜、意粉、小食、漢堡、熱狗及薄餅。
另一本湖水藍色喺飲品及甜品,選擇都頗多元化,有經典咖啡、JL特色咖啡、鮮奶飲品、茶品、沙冰,就連雞尾酒、餐酒及生啤都有。而甜品主要分為窩夫、芭菲、木糠系列、芝士蛋糕及其他。
我哋打算揀晚餐,因有唔少主菜菜式都啱食,晚餐包餐湯或頭盤(2揀1)、主菜(5揀1)及餐飲,定價$158-$320,另外可加錢配甜品。
bowl意大利雜菜湯
個雜菜湯好足料,酸香濃郁,飲落好醒神,有時見有啲餐廳會落意粉,小弟就唔太喜歡有意粉版本嘅意大利雜菜湯。
bowl巴馬火腿凱撒沙律
一客晚餐揀湯,另一客就自然揀沙律。凱撒沙律嘅基本材料:羅馬生菜、煙肉碎、烘麵包粒、芝士碎都包含在內,但拆散嘅造型、並以巴馬火腿捲起對生菜就幾有新意,不過食起上嚟就有少少「拿搞」。但食得出用料不賴,生菜又脆又甜,啲火腿落得無手軟,而且,油潤甘香!
晚餐嘅主菜有5款,我哋揀咗兩個中價位嘅,分別一客意大利飯及一客意大利珍珠麵,後者都喺第一次試,頗特別。
bowl炸軟殼蟹蕃茄意大利飯 $188
對意大利飯確喺有少少偏愛,所以,揀咗炸軟殼蟹蕃茄意大利飯作為其中一份主菜,橙紅色嘅意大利飯,濕潤而充滿蕃茄酸香味,嗰份酸香喺鮮活嘅蕃茄香味,唔喺茄醬、茄膏嗰種味;不過,飯粒以我個人而言,有些微煮過火,雖仍有點點咬口感,但近乎軟熟嗰種。至於軟殼蟹,有兩大隻,炸得香脆,咬落又唔油,好食。
bowl香煎加州鱸魚配意大利珍珠麵配芒果牛油汁 $258
曾經晌Fiat Caffe食過一道米形意粉,今回所嚐嘅珍珠麵,跟米形意粉有異曲同工之妙,因為兩者本身就喺意粉嘅質感,只喺形狀有別而已,食落咬咬口口,的確幾得意。而件鱸魚煎得上乘,皮脆肉嫩,好有魚味,配上芒果牛油汁,襯上魚肉,好有種相得益彰嘅效果。不過,鱸魚份量唔多,男生可能唔夠飽,感覺定價都似乎有點高。
bowl水果花茶 +$20
表姨甥女甚愛花果茶,所以,要咗水果花茶,透明玻璃壺內,除咗花菜3葉,就放滿唔同嘅水果,概略望望,有士多啤梨、荔枝肉、蘋果……等等,茶中滲出陣陣果香,幾有舒緩精神嘅感覺。添水沖多一兩泡,味道仲叫OK喎。
bowl焦糖拿鐵咖啡 +$20
佢愛花茶,小弟就喺咖啡粉絲,單睇拉花已賞心悅目,杯面拉出一朵玫瑰加一隻天鵝,紋理細膩,無花無假真功夫。奶泡跟濃縮咖啡撞得平均而綿密,所以,入口順滑感強,醇香中又滲出焦糖香,果然具質素。
bowl煉乳士多啤梨窩夫 $68
都講明表姨甥女鍾意窩夫,所以,雖然晚餐可以加少少錢換啲迷你甜品,但點都唔及點一客窩夫嚟滿足佢嘅心癮啦,揀咩口味就由佢發辦。煉乳士多啤梨口味,都有啲冷門,就即管試試。份量比一般嘅多,除了好多士多啤梨之外,雜莓雪糕球都俾到兩球。窩夫嘅鬆軟度唔錯,但老實講,蛋味就一般般,幸而煉乳配士多啤梨嘅效果唔錯,酸酸甜甜,而且,啲雜莓雪糕酸香莓味十足,拼埋一齊確喺幾好食,$68依個定價都確喺物有所值。
唔好話一街之隔,都唔知點解只喺一彎之隔,電氣道就好旺,但轉個小彎嘅清風街,靜得緊要。就好似今晚嚟到JL,環境闊落地方大,悠閒舒服,食物做得用心有水準,定價亦合理,但就唔知何解人氣咁弱。所以,如果想同朋友食餐好,又想迤住慢慢傾偈,JL絕對喺個上佳嘅選擇。

個人評分
味道:8/10
環境:8/10
服務:8/10
抵食:7/10
平均每人消費:HK$305

餐廳資料:
JL Cafe.Kitchen
天后清風街1A-1B號地舖
3106 0949


沒有留言:

發佈留言