餐廳嘅名字意譯就喺「宇宙」，雖然，裝修上無咩科幻嘅元素，但一室蘋果綠襯白，加上好好坐嘅梳化椅，整體感覺舒服。柔和嘅燈光，加上枱上嘅蠟燭燈，散發出絲絲情調。店員都好好招呼，殷勤有禮，添水、換碟基本嘢都做到足，上菜速度啱啱好，一道菜接一道菜。
我哋簡單啲，就點兩客晚餐，晚市喺以4道菜嘅晚餐為主，包沙律、餐湯、主菜及甜品，奉送啡茶，定價$128-$328 +10%，尖沙咀區而言算合理。
有機藜麥田園沙律
雖則只喺一啲沙律菜、車厘茄、青瓜、櫻桃蘿蔔做成嘅田園沙律，但「有機」、「藜麥」就為個沙律嘅健康值加分，淋上簡單嘅油醋，清新健康。
野菌忌廉湯
個湯嘅野菌味好濃郁，睇都睇得見落咗唔少菇菌，所以，多份粒粒彈牙感，喺稍微質感上厚身啲。伴湯嘅香草蒜蓉多士，熱辣芳香，入口軟熟帶鬆脆，做足基本以上。
主菜嘅6款選擇，部份都頗有特色，如白酒海鮮紫薯忌廉飯、法國春雞釀泡菜年糕，揀咗前者試試，另外揀多個食肉獸之選T骨牛扒。
白酒海鮮紫薯忌廉飯 $178
個海鮮忌廉飯賣相扮到小型西班牙海鮮飯咁款，型格有心思。唔喺亂吹，個紫薯忌廉飯真喺好紫薯，唔止顏色好紫，味道都好紫薯，同埋，軟綿嘅飯內有紫薯蓉及菌粒，絕對唔喺搵紫薯粉開沖嚟做，有誠意，個人覺得再做濕潤少少就更理想。海鮮方面，白酒味唔強，但海鮮不論大蝦、蜆隻、魷魚圈或魚柳，食落幾鮮甜，唔似雪藏貨。
烤美國安格斯T骨牛扒（14安士）$328
14安嘅T骨牛扒真喺唔嘢小，大大件平放上嚟，好有睇頭，要上五成熟，切開一睇色澤保持艷紅而唔會有血水滲出，拿捏啱啱好。T骨右面細邊喺牛柳，好腍好夠肉汁，另一面大邊喺西冷，雖然師傅燒得剛好，但有啲韌同埋頗多筋，只可以講喺夠肉味。反而好欣賞啲伴菜，新薯、露筍同啲焗過嘅車厘茄都好好食。事後跟店員反映，佢都有解釋貨源質素比較唔穩定，所以，不如只賣其他質素穩定嘅部位仲好。
芒果奶凍
精美甜品只有一款，知有啲朋友唔鍾意食奶凍，因為嫌肥，但小弟就幾鍾意奶凍嘅質感，軟柔得嚟比慕絲挺身啲，而且，好有牛奶香。而芒果未夠熟透，所以，帶微酸，但親友反而覺得唔錯，因為少少酸味平衡番奶凍嘅甜味。
咖啡
餐飲我哋不約而同都揀咖啡，都喺搵咖啡配甜最啱我自己喜好，醇香嘅咖啡味，令人心情舒暢。如果啲牛奶熱番先奉客，感覺會更好。
個人評分
味道：7/10
環境：8/10
服務：8/10
抵食：7/10
平均每人消費：HK$280
味道：7/10
環境：8/10
服務：8/10
抵食：7/10
平均每人消費：HK$280
餐廳資料：
Cosmos Restaurant & Bar
尖沙咀寶勒巷27號東滙商業大厦地舖
2948 2828
尖沙咀寶勒巷27號東滙商業大厦地舖
2948 2828
沒有留言:
發佈留言