山區裡的走走趯趯: Urban Coffee Roaster：細緻晚餐個性咖啡店

2016年11月15日星期二

Urban Coffee Roaster：細緻晚餐個性咖啡店

依家香港有好多特色嘅咖啡店，各有個性，但晌香港租貴人工貴，開一家具質素嘅咖啡店，而只喺單賣咖啡真喺恐怕維唔到皮，所以，食物做得出色有特色，亦喺生存之道。咖啡迷嘅老友推介尖沙咀橫巷碧桃仙路嘅UCR，話佢哋咖啡出色，食物亦具特色。

搭級而上，餐廳嘅環境就睇晒，以往見唔少咖啡店都以工業風作裝潢，但大都位處晌廠廈，地鋪嘅唔太多，水泥地加上昏黃烏絲燈，配以新色木櫈，環境唔錯。

隨後店員遞上餐牌，嘩！成本書咁厚？唔使驚，本書用嚟營造吓文青效果啫，幾頁紙嘅食物餐牌只喺夾在其中，仲加埋一份飲品餐牌。

食物餐牌內就列出一系列早午餐、沙律、是日餐湯、小食、主菜同甜品，由於套餐只有午餐及早午餐系列，故晚市只好散點。

而飲品餐牌包括多款自家烘焙嘅咖啡、熱茶、紅白餐酒、多款本地釀製嘅手工啤及其他飲品。

烤大菇沙律 / 意大利黑醋 / 黑松露油 $78

嚟個沙律開開胃先，啲沙律菜、車厘茄、紫洋蔥唔單止以意大利黑醋撈勻，更加上黑松露油，好難會唔好食囉，除非啲沙律菜唔新鮮啫，咬落索索聲，喺新鮮嘅聲音。而件烤大菇好厚肉，極有菇香，軟綿多汁，正。

香煎帶子 / 粟米蓉 / 蕃茄乾 / 炸大蒜 $88

估唔到只喺作為一間咖啡店，菜式嘅賣相都唔失禮，睇睇依一道香煎帶子，真喺好有大餐廳嘅模樣。雖然一客只有兩件，但帶子都喺大呎碼級數，好軟腍，帶微爽；蕃茄乾同炸大蒜就唔見有，換咗喺入口無渣嘅鮮露筍。

秘製炸魚薯條 / 他他醬 $98

友人對炸魚薯條情有獨鍾，所以，點一客共嚐。一客有兩大件魚柳，仲有好多薯條，伴自家調製嘅他他醬，魚柳炸得外觀金黃閃亮，外層粉漿做得薄，入口香脆不膩，而且，雖然唔知用咩魚，但卻喺好有魚味，又夠嫩滑，唔似雪到死嘅雪藏貨。他他醬，酸咪咪，沾魚柳，抑或薯條都好食。

南瓜蓉 / 蟹肉 / 烤虎蝦 / 火箭菜 / 意大利飯 $168

意大利飯喺小弟心水，之前曾晌Fiat Caffe試過一款栗子菠菜南瓜意大利燴飯，水準極高，所以，見到依度有一款類似嘅意大利飯，不期然試試比較一下。店員囑咐將啲火箭菜溝勻會好食啲，不過，個人覺得分別唔大，飯粒煮得有咬口、夠濕潤，更充滿南瓜香味，虎蝦去晒殼方便食用，鮮甜爽口，不過，蟹肉由頭食到尾，只喺好弱嘅存在感！

烤M4和牛腹肉 / 扒雜菜 / 火箭菜 / 燒汁 $178

又一道賣相精緻嘅菜式，牛腹肉燒完唔喺原件上，而喺再切件疊起嚟，加啲火箭菜做裝飾，好有立體感。外觀睇起嚟有啲血紅，入口好鮮嫩、富肉汁，細嚼更體會到嗰份肉香，小弟就覺得水準相當高，不過友人就略嫌生生哋，有啲客人唔喺好食得太生，落單時問問客人要幾多乘熟可能貼心啲。而墊底喺茄子同薯仔片，扒燒得啱啱好。

UCR Signature

咖啡煮啤梨 / 朱古力金寶 / 開心果碎 / 雪糕 $78
眾多款甜品中，以店家招牌甜點UCR Signature最有亮點，法式甜點紅酒煮梨變成咖啡煮，單喺依一點已吸引人去試試。啤梨去晒芯，內裡填滿雲呢嗱雪糕，入口啤梨軟腍帶爽脆感，味道清甜，反而個人就覺得咖啡味較薄；以朱古力金寶及開心果碎作伴碟裝飾，不過，金寶做得太碎濕濕，兩者夾埋裝飾大過實際，食起嚟又唔方便，不如索性焗一小兜金寶嚟得實際。