2016年11月13日星期日

M.U Cake & Sweet:關西直送滋味

小弟喺曼聯迷,一見到「MU」兩個字,就下意識以為喺曼聯相關嘢,早前晌報紙見到介紹一家甜點店「M.U Cake & Sweet」,初以為跟曼聯有關,原來喺一個美麗嘅誤會,再細看詳聞,才知喺一家主打日本直送賣關西幾家名店嘅蛋糕。
鋪位細細,設計精緻,鋪前、鋪後都有相片顯示晒店家代理嘅產品,當然,仲有餅櫃所擺放嘅實物。
拎咗張單張睇睇,產品款式都幾多,細看之下,主要嚟自大阪、京都、神戶及和歌山嘅出品。
跟店員了解過後,所代理嘅蛋糕無添加防腐劑之類,大部份都喺需要存放於-18°C或以下,一般可以擺3-6個月,但一解凍就要幾日內食晒,故會以全個售賣(只有少部份能作散賣),而且,亦唔以可擺晌餅櫃做展示,怪不之得餅櫃只擺得數款產品啦。
此外,亦見有款嚟自神戶嘅白草莓朱古力,包裝精美小巧,紅紅白白,幾襯聖誕,買嚟當聖誕禮物真喺唔錯。
bowl宇治抹茶芝士撻 $145(京都)
日本甜點,真喺好難唔想起抹茶,敢用「宇治」,抹茶味道理應預期會甚具質素。撻面放上幾粒十勝紅豆,賣相精簡卻見功夫,唧花幼細,味道上,果然抹茶味唔單止香濃,仲好有一份回甘帶微微苦,加上口感柔滑,確喺用料不賴嘅出品;或許喺抹茶味嘅突出,好老實,芝士味就變得唔明顯。反而,饀內加入糖漬納豆,卻帶嚟絲絲驚喜。
bowl比利時特濃朱古力卷 $185(神戶)
橙色嘅包裝盒,睇落好醒目,打開一睇外型如一般卷蛋,但卷蛋面加咗一層朱古力漿及灑上唂咕粉,令賣相變得典雅啲。整個卷蛋嘅朱古力味實在濃郁,中心更有一整條濃滑嘅朱古力條,而卷心嘅忌廉香滑不膩,但最估唔到喺解凍後,外層嘅朱古力蛋糕唔單止唔會硬實實,仲幾鬆軟添。
如果喜歡食日本蛋糕嘅朋友,真喺唔使飛過去,仲咩時候都可以品嚐到原裝正貨,計及埋質素,真喺覺得佢定價唔算高。

個人評分
味道:8/10
環境:8/10
服務:8/10
抵食:8/10
平均每人消費:HK$25

餐廳資料:
M.U Cake & Sweet
尖沙咀彌敦道63號iSQUARE國際廣場6樓Kiosk 1
5966 8262

沒有留言:

發佈留言