2016年11月2日星期三

金功夫點心火鍋 Kung Fu Deluxe Dim Sum Hot Pot:火鍋靚料真功夫

最近晌FB見到金功夫點心火鍋晌灣仔開咗間旗艦店,叫得旗艦店地方大就唔在講,最重要見到為慶祝新店,推出一蚊雞湯底優惠,去到11月18日止,因為都曾經到訪過北角店,知道佢哋用料都有水準,所以,就趁限期前趕去享用個咁筍嘅優惠,剛啱香港天氣轉涼咗,入夜更有少少寒意,打鞭爐就更正。
講番個優惠先,只限瑤柱白玉滑雞鍋,逢星期一至日都得,限於晚市時段18:00-21:00,亦只限新開嘅灣仔分店。其實,除一蚊雞湯底外,同步仲有一蚊蝦餃皇優惠,主要供應於午市時段,就連星期六、日都有。 
餐廳環境幾雅致,以深啡色襯金,感覺唔會太老套,近窗一邊全部落地大玻璃,加上高樓底,都令整體空間感更強。一邊圓枱,一邊卡位,悉隨尊便。
摺頁嘅點菜紙分類為餐前小食、刺身、精選鍋底海產、新鮮手切牛肉、特色推介、肉類、滑類、餃子類、丸類、蔬菜及麵類,而刺身又有多款拼盤選擇。
原以為得火鍋,原來亦有晚飯小菜、燒味、海鮮,所以,嚟依度又豈止食火鍋咁單一選擇。
行經洗手間時,見到原來近門口旁有大大座魚缸,目測所見都喺貴價海鮮,游水生猛,所以,如果嚟食海鮮,食材應該有一定嘅保證,當然,消費就肯定高好多啦!
仲有一張餐牌,主要羅列各款飲品,打鞭爐諗住點竹蔗水嚟潤吓,可惜無貨,改為飲夏枯草解吓燥熱。
落好單後,侍應就會捧上醬料架,有沙嗲醬、蒜蓉、紅椒、辣醬、蔥花、金蒜粒、麻醬等,任由客人自由組合,不過只可攞一次,茶芥及醬油費$18位。沙嗲醬、蒜蓉、蔥花喺小弟是次嘅心水組合,加點湯撈勻就用得。
bowl餐前小食 $15
除茶芥及醬油,一小碟嘅脆花生及炸魚乾仔亦喺收順項目之一,當然,加一服務費就走唔甩。
打鞭爐鍋底嘅吸引力好重要,從點菜紙所見,餐廳足有16款供選擇,要豪嘅有濃湯雞煲翅鍋、濃湯花膠雞鍋、雜菌花蛤蟹鍋,慳慳哋要實惠啲嘅有秘製沙嗲鍋、香茜皮蛋鍋……等等。
bowl瑤柱白玉滑雞鍋 $1(原價$188)
晌樓下已經見到佢哋楝咗個牌,個滑雞鍋真喺堅$1就有。白玉喺指冬瓜,所以,見高湯中有個冬瓜環,內裡放滿滑雞件及瑤柱絲,待滾起就有侍應切開件冬瓜,再滾多一陣就食得。
啲雞入口非常嫩滑,所以,所喺要趁快食,否則可能越滾越嚡,冬瓜亦好清甜;由於啲雞本身唔肥,加上有啲冬瓜吸吓油,故個湯好清,趁未淥嘢食先飲兩啖,香甜而不膩。
打鞭爐必點嘅項目之一:丸類,依道都有唔少選擇,但最正喺可以逐粒點(兩粒起),變咗彈性更多,可以純以個人喜好嚟揀。
bowl手打鮮蝦丸 $10粒(兩粒起)
外觀睇起嚟十分新鮮,蝦丸色澤鮮紅光亮,自家手打當然要試吓喺咪咁堅。粒鮮蝦丸果然好得,淥好後夾上手都感覺到份彈性,認真爽彈蝦味足,沾丁點豉油提鮮就夠晒。
bowl自製墨魚丸 $10粒(兩粒起)
墨魚丸食落同樣彈牙,有別出面一啲雪藏貨色,入口較實,加上墨魚十足,就證明出貨真價實,唔喺溝粉嘅出品。
bowl手打鯪魚丸 $8粒(兩粒起)
雖然喺手打,但口感就唔喺以爽口行先,卻喺有份鬆化感,而且,鯪魚味濃,兼滲出絲絲陳皮幽香。
bowl新鮮豬肉丸 $8粒(兩粒起)
只喺一般豬肉打成,但食得出喺新鮮貨色,所以,啲豬肉無陣臊豬味,入口亦喺爽口彈牙。
bowl包心蟹粉丸 $8粒(兩粒起)
依類包心丸應該喺來貨,雖然喺咁,個質素都唔差,內裡有唔少蟹籽。不過,事後都喺覺得有少少揀錯,應該試試佢啲自家包嘅餃子。
上次晌北角店試過其新鮮手切本地牛肉,用料確喺有一手,不過,親友唔太食牛,所以,牛肉、牛丸、牛乜牛物就無點過,而晌眾多肉類中,就試試日本黑豚肉。
bowl日本黑豚肉 $88
一客有12片,色澤紅潤,油花都分布均勻,單睇外觀感覺唔會太肥,而片片攤翻開其實都幾大片。灼熟後,厚薄啱啱好,入口真喺好軟腍,又有肉味,蘸試沙嗲及蒜蓉,好食。
海產類(唔喺海鮮類)有17款食材,主要都喺啲蚌同魚片、魷魚類,較有興趣喺啲脆肉鯇,所以,點一客試試質素喺點。
bowl脆鯇魚片 $78
碟脆肉鯇賣相就一流,鋪成小小花塔形,而啲魚片色水有光澤,帶點晶瑩之感。輕灼變白就食得,入口好有魚鮮味,不過,就無預期中咁有份爽脆感,口感比較腍身。
bowl野菌雜菜籃 $78
蔬菜類有近30款選擇,不過,點雜菜籃就最划算,一大盤夠多元化,包括多款菇菌、粟米、娃娃菜、生菜,底下仲有滿滿嘅白菜仔,兩個人真喺超夠食,今餐比平常嘅打鞭爐可以講喺少肉多菜喇!
bowl夏枯草 $15 / 支
夏枯草喺健康工房嘅出品,夠冰涼解渴,又可以清熱下火解吓燥。
餐廳有免費wifi,環境舒服好坐,食材又具質素,所以,唔可以跟啲任食火鍋相比。雖然,幾個侍應都服務殷勤,又有禮貌,但就有少少生手,睇落好年輕,應該喺初出茅廬,不過,只要踏實去做將會練就一身好功夫,只識怨天尤人喺無乜用嘅。

個人評分
味道:8/10
環境:8/10
服務:7/10
抵食:7/10
平均每人消費:HK$230

餐廳資料:
金功夫點心火鍋 Kung Fu Deluxe Dim Sum Hot Pot
灣仔灣仔道223-227號1及2樓
2788 3038

沒有留言:

發佈留言